//本Page Patreon經已開通，請訂閱支持本Page運作（估唔到而家Run個Page都係要搵命搏），謝謝！ 連結： https://bit.ly/2TvzIaF //
趕客技術文：用初選同區議會黎分析究竟有無可能達到而家好多人追到好勁嘅「影子政府」。
話說飯民初選時，好多人想為呢樣嘢挖出更多剩餘價值以合理化成件事，其中一個講法就係「民間公投」。其實呢個講法亦唔新鮮，因為早響區議會選舉非建制大勝之後，已有人搬出「影子議會」呢個概念出黎，而十七區區議會反《國安法》聯合聲明更認為實踐概念嘅第一步。
「影子議會／公投」概念在於當政府響民主層面上進行打壓時，市民就以能夠促成市民參與政治嘅機制繞過呢種打壓，甚或進一步形成一個類政府嘅機制，慢慢擺脫政府嘅約束。
舉個例，既然響立法會機制之下無辦法奪取半數，咁咪響過半數嘅區議會推動議政同監察囉；如果17區議會往後唔單止討論地方議題，而係逐步推廣至全港議題，咁咪變成形成咗「影子議會」囉；
今次初選如果大家都認授咗係非建制派嘅一種投票議決方式，咪成為「民間公投」囉。咁當有齊「議會」同「公投」兩樣嘢，仲唔係一個政府嘅鶵形？咁只要市民慢慢習慣「影子政府」先至可以代表真正民意嘅機構，咁就可以逐步架空原有嘅特區政府，或至少以有系統、有組織嘅民意倒過來向政府施壓。
但區議會同初選搞得有聲有色係一件事，能唔能夠變成「影子政府」卻完全係另一件事：正如一個人點樣鍛鍊，一日佢生唔出一對翼，始終都唔會飛得起；一日生唔出一對鰓，始終都唔會變成魚。
咁區議會同民間公投能唔能夠轉化成一個「影子政府」，係要睇三大條件：'
1. 佢從何等程度上可取締政府功能；
2. 推動者本身有否執政意志；
3. 政府如何打壓、市民如何反應
先講第一點，我地又要番番去政治101：政治最基礎嘅用途係乜？就係權力同資源嘅分配，所以一個人嘅社會係唔會有政治；而一個無資源可分嘅政沿制度亦無存在嘅必要。
區議會嘅存在，係在於決定分配政府嘅地區預算；初選嘅存在，係分配議席嘅權力，兩者嘅先天局限都在於要「睇餸食飯」。政府批幾預算比你，你就只能夠分配幾多，唔批比你嘅權力，你係無辦法多要一分毫；無論初選搞得幾完美都好，最後都係要睇政府DQ定唔DQ你。
當然好快就會有人提出，所以我地要搞「黃色經濟圈」，自行產出資源比呢個「影子政府」分配：呢個係一個正確嘅思考方向，問題卻在於規模同方向都未能配合。呢一刻嘅「黃色經濟圈」更加似係一種經濟救濟多過係一個經濟體系，好簡單，你能唔能夠響每間黃店抽取一定「黃稅」然後撥歸中央分配？
香港人當然好有錢、亦願意為理念而比錢，呢個係一個優勢，但呢種收入如果唔能夠給予政府作中央規劃分配，咁呢個「影子政府」亦只會有名無實。最基本而家所有撐抗爭嘅「黃色媒體」、「黃標KOL」、各式各樣嘅眾籌捐款；所有區議員同立法會議員收入，加加埋埋收入隨時係每個月以千萬元、計甚至過億；呢班傳媒、呢班政客、呢班KOL、所有捐錢比佢地嘅人，願唔願意將呢筆錢交予「影子政府」作分配？
退一步，其實有啲嘢未必需要錢，只要有時間付出就得：例如民間衛生清潔隊、糾察隊等等「影子政府」有最低限度嘅人力調配；各個專業界別可以騰出不同團隊協助「影子政府」運作；甚至區議會申配資源本身唔再係用地區角度出發，而係容許跨區參與制訂一個整體性嘅預算，咁都可以勉強有一個「政府」嘅形態，而目前香港亦的確有呢個發展方向，但距離「完成品」則十劃仍未有一撇。
第二點，相比起資源更重要嘅，卻係執政意志問題：你地將透過區議會同初選促成「影子政府」嘅成立，人地有無咁嘅心先？早排「石排灣力量」發聲明批評民主黨同建制派合謀通過地區活動撥款，就係一個好好嘅例子：明明申領撥款果個係保皇黨組織，撥款比佢地就好似送鹽予敵，但民主黨又會包裝得好好聽咁話「唔用建制牌頭我地好難申請活動」、「我地可以一邊撥款一邊監察佢地」、「可以騎劫咗佢地個活動變成飯民活動」，一聽都知係自欺欺人。
有好多傳統飯民「區佬」，根本就只係甘心於做一個地區保長（就算僥倖比佢地選倒入去立法會，都係用區佬視野響立法會議政，胡志偉林卓廷尹兆堅之流就係好好嘅例子），只以自身利益出發同政府又傾又砌；喂霎時間你叫佢地升Lv做政治家，會唔會係強人所難？「影子政府」就係一個中央機構，響資源分配過程中必然會觸及地方利益，以地區票定生死嘅呢一班區佬，要佢地犧牲地區利益，同攞佢地條命無分別。
再講，政府係要有政策，恕我唔客氣講句，香港非建制嘅政客、佢地相信果班時事KOL、經濟「學者」同智庫，經已唔可以用弱智、而係直頭要以得人驚黎形容。即係點可能香港飯民嘅主流意見係足足反對派錢反對足10年？土地政策竟然走去信果班同共產黨無分別嘅「本土研究社」？無撚嘢下話？你有無走去睇過鍾劍華響《AM730》一星期兩篇、臭過扎腳布嘅所謂「政策分析」？
更加唔好講果啲亞投行撥款、公私營房屋同劏房問題（一味猛話起多D公屋、搞租管就解決倒）、被行業利益蒙蔽嘅教育同司法問題……即係如果你要反對港獨，最簡單嘅一個論點就係放眼呢堆「反中份子」，根本就無一個有能力治港嘅團隊，搵佢地做局長司長隨時同而家個林鄭爛班子無分別。
最後一點，當然就係政府如何反應，同埋香港人本身有抗壓力嘅問題。當年五區公投可以話係失敗，因為佢無辦法將呢個機制轉化為其他決策嘅「全民公投」機制；但至少佢迫使政府提出一個新版本嘅政改方案以作回應；但去到今日，你嘗試用公投「架空」政府，佢卻係將佢提升到「顛覆國家政權」嘅程度全力打擊。
有人會用「政府全力打擊飯民初選」，黎作為中共恐懼「初選演化成影子公投」嘅證據，我卻要響度問，就當中共真係好驚，驚到將「影子公投」提升為「港獨第一步」，無論搞手定投票者都可能因觸犯《國安法》被捕，咁呢個公投仲有無可能搞得落去呢？
如果中共政府為區議會制訂「國安守則」，將所有「僭越行為」定性為違反《國安法》，輕則DQ，重則坐監，咁到時又剩番幾多個區議員願意繼續推動「影子議會」呢？
講到呢度，當然又會有黃屍撲出黎話我潑冷水，其實啱啱相反，如果我真係一個悲觀派，我應該一早加入藍屍陣營，或者學班KOL咁立刻宣佈封筆收皮。正正我屬於一個樂觀派，我先要指正出而家抗爭路線大家一直逃避嘅問題，諗下點樣改善同突破。
