以前接觸好多唔同行業，唔同年齡層嘅candidate，雖然我已經唔再係headhunt，但係啱傾嘅都會成為朋友，耐唔耐互相msg問候近況。
其中一位年過50歲嘅叔叔，當年成功介紹咗一份工作畀佢，好可惜喺疫情之下，呢間公司較早前宣布裁員，人工高嗰班全部要郁。
佢話分唔清係面子問題，抑或係唔想老婆擔心，被裁之後每朝如常7點起身刷牙梳洗，8點鐘準時出門扮返工，去連鎖快餐店叫一個早餐坐半日，行一陣等到兩點幾三點再去第二間，最緊要過咗lunch time，因為叫tea可以慳返啲錢。佢一坐低就會打開部MacBook不斷搵工，但係個市真係好差，send咗無數份CV出去只係換嚟3次interview機會，要求人工輕微加幅嗰份，人哋話呢個時勢比唔起；嗌平手嗰份，人哋驚佢騎牛搵馬；願意降薪嗰份，人哋懷疑佢有古怪。
以前份工好忙，覺得時間過得好快，而家日日要出去搵地方坐，捱到6點再搭車返屋企扮放工，原來時間可以過得咁慢。
心情愈嚟愈差，有儲蓄但同時供緊樓，見工完全冇曙光，夜晚又瞓唔著，終於鼓起勇氣同老婆講。其實佢覺得老婆一早feel到，只係唔講出嚟，等佢冇咁大壓力。
心理關口都過埋，佢決定放下身段，上個月開始做步兵－－－送外賣，收入少過以前好多，但總好過坐食山崩。
由於喺WhatsApp打文字，我聽唔到佢語氣係做得開心定唔開心，所以直接問：「適應嗎？以前嘆冷氣點人做嘢，而家做步兵，要日曬雨淋。」
佢回我：「適應到，還可以，呢排好多大廈唔可以送上樓，要啲客落大堂拎，對我嚟講舒服咗少少。」
至窮無非討口，不死總得出頭。
