今日小編同大家傾下足球鞋嘅釘底，先同大家傾吓仿草鞋，市面上我地見到嘅仿草鞋主要為Turf釘同AG釘。Turf解作草皮，釘為密密麻麻而由細細嘅膠粒組成嘅鞋底，如圖中Tiempo Legacy 嘅鞋底。AG釘全名為 Artificial Grass，講到明為仿真草而設。鞋底則由兩種大粒啲嘅釘有調理咁組成，如圖中Hypervenom phatal 2 DF嘅鞋底。既然兩款鞋都係標榜仿草功能，咁佢地又有咩分別？同時應該晌咩場著咩鞋好呢？
話說仿真草有段故，話說六十年代，美國德蕯斯州有個人發明咗一塊人造草皮，叫做Astroturf。因為個時有個運動場館，叫做Astrodome，佢本身係用真草嘅，但係棒球球季去咗一半，佢地就發覺啲真草唔多掂，好多都死咗，就係咁，場館就引入咗果個美國佬生產嘅人造草皮，而個草皮名就順理成章叫咗做Astroturf。
基於仿真草嘅保養成本低，加上室內場難以有充足嘅陽光養草，人造草皮開始盛行，呢塊草皮亦update去到第二代，塊合成草皮厚啲之餘仲加入沙，令到草皮感覺更似真草地，尤其晌質感上面。一二代嘅人造草皮晌香港唔難揾，例如界限街仿真草足球場同樂富仿真草足球場。有啲場為咗模仿真草更似的關係，更加會晌節與節之間更加會灑水，令皮球好似晌真草上一樣去得咁快。
塊人造草皮不斷進化，由第一二代進入第三代。第三代嘅人造草皮係晌合成草皮上加入膠粒，加上草皮設計更厚，令草地質感更佳，皮球彈性更似真草，而且跌親時無咁易刷傷。香港大部份新落成嘅仿真草場都係踩納第三代嘅草皮，如觀塘遊樂場，九龍灣超聯場同馬山遊樂場等等。
講翻啲鞋，咁著咩鞋適合咩仿真草地呢？由於第一二代嘅仿真草地係較薄，有時更加會落雨或灑水，turf釘底嘅選擇就最好不過。小編就試過落雨時候著平底鞋，一個轉身作攔截，即刻成個扒低再跣咗成米，諗翻都有啲痛。至於AG釘，如果著住佢地晌第一二代草皮上，由於釘插唔入，踢波會好危險，一嚟易扭親受傷，二嚟更加會破壞草皮同自己對靚鞋。
至於第三代嘅仿真草皮，鞋嘅選擇又好睇球場嘅保養程度。AG釘底畢竟係後第三代草皮嘅產物，釘底較TF釘長而有規律，且設計呈環狀，絕對係非常合適保養好包括有充足膠粒嘅場上踢波，例如九龍灣超聯場，天業路足球場，觀塘遊樂場，同摩士二三號場等等。小編試過著住對AG鞋晌呢啲場踢，感覺係非常好，除咗感覺到跑動有種彈下彈下嘅感覺外，球感更非常之好；小編又試過拎對turf鞋去踢保養好嘅場，老實講係有啲易跣嘅，同埋啲力無AG鞋咁出。
至於至於保養得較差嘅場地，如九龍灣公園七人場，中山紀念公園同馬山遊樂場，由於球場膠粒大量流失，以及草皮失去彈力與厚度，TF底都已經好夠做，咁當然AG釘唔係話唔得，不過啲釘又真係插得無咁入，自然球感又差啲咁。
所以呢小編建議各位踢波前可以問下朋友個球場係邊類，再帶相應嘅鞋去；至於小編，佢去啲未去過嘅仿真草場就會帶曬兩種釘鞋去，再睇下邊款鞋底啱，畢竟安全性，抓地性同球感晌踢波都係好緊要。
有唔少人可能會問晌香市面買到嘅FG釘鞋踢唔踢到仿草場呢？咁HG呢？仲有好似見個金屬釘喎，又係點架呢？等小編賣個關子先，下回同大家詳談！
