［買樓到海防］買唔起海防道，不如買海防市。又，堆粉紅色嘅咩嚟？越南玫瑰（＊）？定黑頭粉刺（唧過就明）？。日本發展商咋喎，以為真係代代木公園？
1. 越南樓，冇乜出奇丫。香港啲樓盤廣告連保加利亞樓都有。咁越南樓，河內胡志明市，我都睇過（睇之嘛，有幾難？我睇過梅艷芳添）。不過去到海防，就真係挑戰我三觀了。
2. 但其實諗真啲，成件事好合理。海防都係越南第三大城市，雖然我估冇乜人去過。
3. 海防在邊？在北部灣。咁而北部灣，「就真係在北部」。唔好笑，呢個係越南嘅叫法。英文叫東京灣，台灣都好似係叫東京灣。大陸就好似都係叫北部灣。
4. 海防就在北部灣，其實就在下龍灣附近。去過下龍灣就知，由河內去相當近。呢個河內當然係越南河內，唔係「河內名將方悅」嘅中國河內。
5. 又，香港嘅河內道，咁睇路牌都知，Hanoi Road係name after越南嘅河內。河內道，除咗有邊爐打，仲係吳若希嘅成名地（喂，人人都知啦）。
6. 而海防道（個臨時街市臨時咗40年，而家卒之又開返），亦都係name after 越南嘅海防。睇路牌就知，Haiphong Road，唔係海防博物館Coastal Defence嘅海防
7. 咁大家應該仲知道，有條西貢街。亦都唔係香港嘅西貢，而係西貢小姐Miss Saigon（＊＊），胡志明市。咁胡志明呢啲當然係「解放」後嘅叫法，原名就係西貢，胡志明市個機場亦都係叫SGN 唔係HCM，正如北京係PEK唔係BEJ或BEI。
8. 而「西貢街」，「河內道」，「海防道」雖然都係越南地名，但覺唔覺「西貢街」特別唔同？位置都隔好遠，而且係街，唔係道。考古（即係Google）所得，三條街都係改過名，但同一日變成而家嘅名。「海防道」原名「伊利近道」，「河內道」原名「東道」。但「西貢街」呢？原名係「第三街」。咁另外嗰堆「第一街」「第二街」「第四街」「第五街」（其實去到「第七里」「第八街」）係乜？就係今日嘅「甘肅街」「北海街」「寧波街」「南京街」。點解成堆中國地名中間插一個越南？仲要係同期另外兩條街用越南地名？我都唔知。
9. 最後可以講埋，香港仲有，東京街。應該稍有常識都知同日本東京冇關係（＊＊＊），但呢個「東京」亦唔係中國開封（五鼠鬧東京唔係去咗日本），亦係越南嘅「東京」。越南「東京」在邊？上面咪講過，東京灣，越北。狹義嚟講，「東京」係指河內。即係，西貢＝胡志明市，東京＝河內。
10. 呀，真係最後，尖沙咀仲有「緬甸臺」，但同緬甸完全無關，係德國地名Minden 。綿登徑亦係呢個字。
11. 噢，最最最後，有人問埃汾係咪唔寫金融股票，就梗係唔係。但真係Patreon多了，請支持。（https://bityl.co/4RBj），講金融嘅文當然有價，一個月一舊水之嘛，我一星期寫六篇。昨晚就勁，由中概股可能被強制除牌，講到疫苗嘅雪櫃股（雪櫃都有得炒！梗係唔係三星科龍或者開利啦），RCEP嘅航運股，Telsa入標普指數，乜都有講。其中一日咋喎！所以真係要支持（https://bityl.co/4RBj）
12. 況且，呢度我都盡量繼續出免費文，對得住天地良心啦。
（＊）慎防年紀輕嘅讀者唔知，「越南玫瑰」是性病，係邊種就問下專家了。有嘅係名字，當然係污名化，特別係越南以前咁窮（而家都窮，但發展很快，城市先富起來）。名字應該係由英文嚟，就係越戰啲美軍周圍搞，生嘢，同伴就戲稱為「越南玫瑰」。然後就梗係講Susan Sontag，疾病的隱喻，Illness as Metaphor 。病本身已經係用嚟污名化，性病，性加埋病，更加係污上加污，當然只有「其他人」先有。本人最聖潔。所以，梅毒，對英國人來說，是「法國花柳病」（French pox），對巴黎人來說，是「日耳曼病」（morbus Germanicus），對佛羅倫薩人來說，是「那不勒斯病」（Naples sickness），對日本人來說，是「支那病」（Chinese disease）。
（＊＊）而西貢小姐正係美國大兵嫖越南妹嘅故事。不過有冇玫瑰呢啲就唔好講。呢套劇當然近年畀人鬧到七彩了
（＊＊＊）況且政治不太正確，就算曾經係都會畀人改，話晒日本打仗佔領香港，即係而家你地個個上街歡迎街路另一回事—正如納粹德國「連接」（＊＊＊＊）奧地利，啲奧地利佬都個個拍手掌，睇少啲Sound of Music。
（＊＊＊＊）真係「連接」，甚至唔係「吞併」，最多你話「合併」「加入」。人地用字好嚴謹，德文就係Anschluss，英文比較接近係叫Annexation。絶對唔係「吞併」或「侵略」。近代嘅，就係俄羅斯「連接」克里米亞
-------------------------------------------------
Ivan Patreon，港美市場評點，專題號外，每日一圖，好文推介。一個月一舊水唔使，三個月已近700人訂！仲有免費試睇：https://bityl.co/4RBj
越南第三大城市 在 越南城市列表- 維基百科，自由的百科全書 的相關結果
截至2022年4月20日，第1級城市共有22個城市，其中3個是中央直轄市，其餘19個是省轄市；第2級城市共有33個省轄市；第3級城市共有29個省轄市，另有18個市社；第4級至第5 ... ... <看更多>