【龔成問答信箱】（Q18481-Q18500）
Q18481：
老師, 唔好意思, 我諗左陣, 有少少問題想問一下:
投資是看長線, 優質股,長期持有, 在優質股質素不變的情況下, 繼續持有; 或者升一倍, 賣一半, 都要持有。我明白的。
優質股股價下跌, 我地應不受影響啦, 質素冇變, 我地繼續定期 review, make sure 佢冇變質, 咁就繼續持有。
在咩情況下, 優質股要換碼呢? 換碼, 當然都係換番優質股, 咁換咩係唔係睇值搏率? 換隻有機會增長多D的優質股?
早前你提及, BYD你由10買, 升去80, 再跌番10; 請問你是否有定期review, review 完都係好正面, 所以你繼續持有? 當時你有冇考慮換碼呢? 定還是你繼續不理會股價的變動, 長期持有。想了解一下你的想法。謝謝你。
龔成老師：
在原則上，我地投資優質股，會長線持有，甚至永遠持有，唔好太著重「賣出」的動作。
而我平時建議你「升一倍，賣一半」，是給大部分散戶的建議，因為佢地無長線投資的概念，我希望佢地，點都要有貨在手，唔好盡賣，而「升一倍，賣一半」，就等始收回成本，餘下全部都是賺，最好就唔好理。
但如果投資者有實力，其實可以全部長線持有，當然，實力與心理質素都要好好。
至於咩情況會賣出。
就是質素改變，如果一些好核心的因素改變左，例如蘋果的手機已無乜人買，品牌價值大不如前，而這不是短期情況，而是長期情況，就要賣出，轉其他。
我集比亞迪（1211）持貨12年，由$10上到$80，再跌翻$10，之後又上翻$100以上，我集中分析「企業本質」，而不是「股價」，我睇好佢的原因，有兩個好重要因素，就是「技術」、「配置」，過往這兩方向佢及中國一直發展中，並不是退步，而是「發展進行中」，所以，我根本唔會認為佢核心因素改變，只是純股價波動，所以我長線持有。
當然，我本身的心理質素都好好。
我地做長線投資，唔好比中短期的業績、消息、股價、市況、評論影響，要集中在「企業多年後會怎樣」，這個大方向去想。
------------------------------------------------
Q18482：
其實點先可以搵到潛力股？成個市場咁多隻好難睇哂幾千隻股
可以點做filter去選潛力股?
龔成老師：
你要有一套有系統的方法去選股，不要在市場已炒起，已好多人講，已有專家推介先去買，好多時已經升左。所以，你要有自行選股的能力與方法。
我在股票班，會教5種有系統的選股方法，希望以不同的角度去選股，早市場快d發現到這些潛力股。
------------------------------------------------
Q18483：
老師，可唔可以分析下老千股？點先分到老千股？謝
龔成老師：
近半年見到好多隻，都有以下特l點：
1）上市不足一年
2）細公司
3）業務很普通，甚至業績倒退
4）股價無原因升左幾倍（但企業業務一般，即是無實質支持）
5）股權集中（有時證監會會出通告話「股權集中」）
------------------------------------------------
Q18484：
老師，想問下近期的老千股點運作？
龔成老師：
自己人集中晒D貨，不斷左手交右身將股價推高，之後去到高位，利用投資群組推介（這年好多呢D，所以我好反對入這些群組），當散戶買左貨後，即是背後人將貨以高位賣晒比散戶，之後就唔會再有人為支持股價，還原基本步，大跌。
------------------------------------------------
Q18485：
Hello我想問如果我每月月供1000盈富 手續費50 會唔會蝕?
定係我一年買一手比較化算?
龔成老師：
如果月供的手續費去到5%，當然貴，唔建議你月供。
你可以試下找一些較平的地方去月供，否則，自己一年買一手，會更好。
------------------------------------------------
Q18486：
你好，老師 睇左你啲書，video 時常帶出一個訊息比大家「選優質股 唔理中短線」，但依家世界動盪，如果遇到大嘅軍事事件、更大嘅國際事件令世界停頓/重整，咁呢啲優質股都要繼續持有？定暫避股票市場較好？謝謝
龔成老師：
首先，我地買股票就是買企業，另外，我地唔會太著重中短期的股價上落。
我地分析的，是對企業有長遠影響的事。當一些大事發生時，我地都會分析，而當中的關鍵位，就是「這事件對企業有無核心性、長期性」的影響，如果無，就不用理會。
你唔需要暫時避開股市，只要從企業長遠發展分析，你會見到好多事，對企業長遠的影響，其實好少。
------------------------------------------------
Q18487：
龔成老師，買左你本5 年買樓4 部曲，獲益良多，不過都有些決定想請教你意見
先講講背景，本人及太太分別持有一自住新界物業（A.市值$600萬，如放租收入$13500）及一個放租新界物業（B.市值$490萬，租金收入$11000）各一。
家父持有一個新界租置計劃公屋（C.市值$200萬）
另外，手上持有股票&現金共約$100萬。
考慮到小朋友將來讀書校網問題，想搬往九龍市區居住。現有兩方案選擇：
1. 出售B放租物業及C租置公屋之後，加手上現金。我估計手頭上有$450現金，可以作首期換九龍物業2房（樓價約$1000萬），原本A自住新界物業出租。
2. 放租A同B 2間物業，以租換租方式租住九龍。手上繼續持有$100現金受/股票，C租置公屋繼續丟空。
3. 將C租置公屋出售，換成$200萬，再加上我手上$100萬，以家父之名購買多層新界樓，作出租用途。其他的A&B也作出租，3層樓出租情況下，以租換租方式租住九龍樓。
請問邊個方案更好？
龔成老師：
相信方案（1）是較好。
我地從你「長遠持有資產」角度分析，這個方案你能夠擁有市區物業，質素上會比新界物業略好。
同時亦是較有效利用你擁有資源的方法。
而方法（3）不是不可考慮，但前L題是你擁有的兩個新界物業，本身都有一定的質素，與長遠的持有價值。這方法的好處是買賣成本較少，壞處是收租樓要持續比稅。
------------------------------------------------
Q18488：
Thank you龔sir 覺得你真係好好好好人 又會鼓勵人 連唔係你學生都會抽時間去答覆人 真係唔係好多老師做到
我其實上個月先學人玩股票 見人地買咩好就走去買 我聽完你講都就轉左入[email protected] 同 [email protected]（見你之前分享過）
港股都無咩野 雖然都蝕緊錢 但美股就真係瀨哂野 升個陣唔放 而家跌到傻左
完全做唔到遠離股市呢樣野 因為好奇心會令你不斷比個市嚇親
就連係apple（藍籌)都跌到不堪入目 高買低賣 望住就好似過山車咁 個心又會好唔甘心
終於明白你成日話唔好太貼市 但真係做唔到 唔知應該點好
龔成老師：
投資要學習過程，總之你要明白，我地持有一隻股票與否，關鍵位是企業質素、前景，不要被買入價影響。買為我地買股票就是買企業。
我地現時是持有一間企業，長線。
買入價，你的賺蝕，只是一個心理因素，該企業長遠的發展，才是我地是否值得持有的重點。
如果企業有質素，但股價短期下跌，就不用擔心。
如果企業無質素，但你現時蝕錢中，繼續持有只會令你財富繼續貶值，因此要賣出。
中生（1177）、福壽園（1448）都有質素，不過就唔平，你唔好這刻入太多。
至於美股apple，有質素的，長線持有就得，唔好理中短期股價上落。
------------------------------------------------
Q18489：
龔成老師你好，本人的公積金，因為貿易戰一年前將資金轉換成儲蓄，降低風險。
但見而家美國股票市場升，我應該儲蓄還是投資現在咁高價的基金呢？現時應該投資邊類的基金比較好。謝謝！
龔成老師：
這類公積金的配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。
這是一個超長線投資，中短期當然會有上落，其實你唔需要轉來轉去。
只要按你的年齡，長線配置就得。
如果你年齡不算大，現時可以投資一些環球股票基金，如果你擔心現價太高，就分兩次去轉，現時轉一次，半年後轉一次。
------------------------------------------------
Q18490：
龔成老師，最近發生左一啲事令我的起心肝要學好投資幫自己幫屋企人。不過我都好了解自己性格承受唔到風險，典型散戶同窮人心態，想有所改變。打工仔一名。
38歲已婚未有小朋友，扣除mpf 同其他費用每月保守可以儲2萬。有現金110萬但現時無手持任何股票，自己唔識睇之前買親都蝕，但放係度又完全浪費。
要應付屋企人突然要用錢所以唔敢太進取...有啲月供基金同保險。同屋企人供緊樓，因為同老公家人住自己住嗰度就唔洗比錢。
睇左你嘅文章，想依家買入10手2800盈富加10手0003煤氣。再月供4000 盈富加1000煤氣。依個算唔算係收息組合? 想財富增值的話有啲咩潛力股可以留意?
唔太清楚自己嘅理財目標，覺得依個係問題之一，想知自己想點。有邊本老師嘅書可以推介?
龔成老師：
首先，你要計好自己家庭，要有多少留作應急錢，你地的支出，本身有無買保險，有無甚麼有可能的特別支出，先計好你留多少。
餘下的，就是可增值的部分，這部分你可以用月供或分注的模式，慢慢將現金，轉換成為優質股，長線持有。
同時，點都要有一定現金，等投資機會。
我會建議你現時，可以先分注買入盈富（2800），唔需要一次過入10手，可以每次買5手，平均買入價。另外，你可以加上其他優質股，煤氣（0003）可以是其中一隻，但不是唯一一隻。
你可以考慮：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
另外，可以同時建立月供組合，盈富是其中，另外可再加上上述股。你要建立一個平衡，有質素的財富組合。
你可首先睇：
《80後百萬富翁》
《股票勝經》
《財務自由行》
之後再睇其他。
------------------------------------------------
Q18491：
老師，你好！想請教你，
1) 你點睇補習/ 教育呢行？
2) 其實係咪一項可以長遠發展、可以有好機會得到好回報的事業呢？
3) 很同意你分享打工仔心態同發展自己事業的心態的分別。謝謝你！
龔成老師：
1）正面，因為持續有需求，家長願意花錢在這方面。
2）長遠會持續有需求，你會有工作，但是否高回報、能突破，就要睇自己及行業發展。好多人做這一行，做做一都會只追求穩定，唔會有太大突破。
3）加油！要保持進步的心！
------------------------------------------------
Q18492：
老師，我於年頭開始每月買啲𡙡股，主要係Amazon, apple and Tesla 及 VOO，而家約升了平均50%。
想問下你對美股走勢點睇？我驚受中美局勢影響，應該放一半先嗎？但我睇過Amazon and Apple 既現金流及前境均屬優質
龔成老師：
唔好太理會中短期的大市走勢，你要有「持有企業3年」的心態，你會發現好多因素，其實都唔需要理會的。
只要是優質企業，長線就得，好多中短期因素對佢長遠發展無影響的。
你持有的都是有質素的，可長線。除非佢再升好多，你就賣少少，但其實，整體都可以長線投資的。
------------------------------------------------
Q18493：
老師，現正十分積極搵樓投資中，但內心一直有個隱憂個政治氣候，嚟緊一至五年會否重挫租金回報？
老師，現正十分積極搵樓投資中。
問題1:-
現在，這三、四個月是買樓好時機嗎？
問題2:-
但內心一直有個隱憂個政治氣候，嚟緊一至五年會否重挫租金回報？
龔成老師：
1）香港樓市，長期仍會因供求問題，而向上。
至於中短期，有可能會下跌，這是由於經濟與疫情因素，不過，相信不會大跌的。
當然，無人能預測到正確的時機。但大約就是這個方向。
2）這都是一個因素，但暫時睇，未至於睇得太差。我相信唔會去到「重挫租金」的程度。
------------------------------------------------
Q18494：
龔sir, 呢排一有時間就開始睇返哂你由2015年開始喺經濟一週寫既文章, 學到好多野~
今日都剛剛買咗本富爸爸、窮爸爸開始睇緊
盈富而家其實係咪算貴?
因為睇你之前講話20蚊以下可以入貨
另外港交所、騰訊、小米、比亞迪都有留意, 但現價係咪算好貴?
疫情都已經成大半年, 請問點先知道個市係算大恐慌?
之前睇到人人追捧既匯豐跌到3x蚊, 仲以為已經算係大跌市
感謝龔sir抽時間覆我
祝身體健康, 長搵長有
p.s.我睇完富爸爸就會買你既著作同埋你推介既其他書黎增長知識架la~
龔成老師：
盈富（2800）現價是合理價，大約$23平。
留意，大市與股票的價值，會因時間而有所改變，所以你都要將我過去所講的情況，配合翻現時環境去作一些調整。
至於港交所（0388）等你上述講的4股，現價都有少少貴，不過，都是有質素的。這類股最好就是長線持有，如果無貨，可考慮月供。
恐慌有好多指標的，我在股票班會詳細去教，你可以理解，這是大市的情緒化程度，會否出現盲目賣出有價值的企業。
匯豐（0005）質素比過往略減，所以價值減少，所以當你投資時，要有選股的能力。
------------------------------------------------
Q18495：
老師你好本人30歲,持有兩層未供完的物業，之前一直是月光族狀態，現想開始投資股票，每月扣除供樓洗費剩3千左右，想問如何運用？
如選月供1177，0005，1928組合可以嗎？另外想問老師的書澳門在哪可以買？
龔成老師：
你持有兩物業，其實已是有一定的資產，並不是月光，只是你將資金集中在物業。
在我地理財中，應該建立一個「平衡」的組合，要有不同的類別，你現時太集中在物業類。因此，你之後應加強翻股票類的比例。
以你的年齡，唔適合投資收息股，因此匯豐（0005）未必適合你。
當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
你可考慮月供盈富（2800）、中生（1177）、金沙（1928），長期進行，但如果你是澳門人，要問清楚手續費，如果佔比太高就唔值得做。因為聽澳門網友講月供手續費都貴。
至於我的書，你可以去水坑尾宏達買。
------------------------------------------------
Q18496：
你好，眾安在綫我係53.4入，最近有消息大股東套現走人，請問我應該耐心等待還是溝貨？
你好，你覺得係持有還是走？
龔成老師：
雖然這都是負面因素，因我地分析的核心，是企業的業務本質。
眾安（6060），業務都有發展力的，但業務仍有不確定性。佢最近開始由虧轉盈，反映之前的投資開始有收成，暫時睇是正面的，但之後的發展仍有未知，這一定會令股價波動。
佢做這類互聯網保險公司，的確有潛力，同時背後有支持，所以有發展，這部分產生了「概念價值」。
現時市值有部分是概念價值，而這個價值值多少錢，其實無人知，市場對這價值的看法不一，同時經常改變，所以令股價大上大落。
初步睇，企業有發展力的，不過風險同時存在，因此唔，如果你持有唔多，無問題，可守，太多就要減。暫時唔建議你加注。
------------------------------------------------
Q18497：
龔sir...見你d問答有提過外國樓，英國樓你點睇，我本身係英國讀書十年，入埋藉，想過幾年返去，但英國bno單野，個個一窩蜂去英國買樓
我應唔應該而家買定先，怕遲啲越炒越貴，定係等brexit再睇定d，仲有英磅會跌返嗎？
而家香港有層700萬既樓已供斷
有百五萬cash，過幾年回英國未必想再打工，應該點做，80後⋯⋯謝謝指教
龔成老師：
我相信以現時的價值計算，英磅及英國樓，未貴，就算多左香港人去買英國樓，未至於令當地的樓價大升。暫時仍是合理價的水平。
當過幾年，英國經濟慢慢好翻，樓價會正面。
你可以研究一下英國與香港有關的生意，我相信當中有一定的市場。而我地做生意，就是要解決市場需求，幫人解決問題。
------------------------------------------------
Q18498：
龔成老師，你好！
請指點一下本人現在只餘廿萬儲蓄，從未接觸過股票，請問可以怎樣起步呢？
由於丈夫早排過身，現要獨力擔起頭家，要為子女儲定學費，現在環境不好，只能做兼職，入息很少，所以想放多啲時間學習股票！
多謝指教
龔成老師：
由於你有家庭負擔，因此要好小心運用這$20萬，建議你大部分持有現金。
這刻，最多只動用$5萬投資股票。同時要投資穩健型，要買優質，較低風險的股。
暫時你可以考慮盈富（2800），分注投資，之後等你學更多知識先。你心態上，唔好進取地想靠股票賺好多錢，你要一步步來，同時你的現況「穩健」是最重要的。
------------------------------------------------
Q18499：
龔成是老師的真名嗎？很有意思
龔成 > 攻城 > 成功龔成
最近幾個月開始看到老師fb, 你的價值投資法和坊間講股佬講炒股不同, 然後再睇你寫既書, 真係學到好多野, 充滿鼓勵說話，而且大家都是80後, 很有共嗚.
雖然未上你堂, 但我已認定你是我老師, 我目標係明年能上你堂
最近開始睇你介紹的禁書萬能金鑰, 對我很有幫助, 謝謝你無私分享﹗另有事想請教
1. 每人每日都擁有24小時, 如何可以用得有效率？可否分享一下你日常生活習慣和時間分配.
2. 除了財經書, 有沒有其他好書單可以推介一下 (財經書自然就是看你和你c fu 巴菲特的書, 哈哈)
3. 打算用20 萬來投資，希望2 年可達100萬，要如何分配？現持有少量1717, 6186, 6969,9988,700,1093 值得長線持有嗎？要不要調整？
謝謝老師
龔成老師：
「龔成」是我的筆名，其中一個意思是「成功」，另一個意思是「成」，即是在財富法則上，要；用「乘」的法則。
1）我會花一定時間才睇書、進步的時間上。
至於其餘時間，會答網友問題、教班、寫書、研究股票。
我通常會集中做一樣野，同時唔會比任何人嘈到我，這自然有效率。
2）《秘密》
《洛克菲勒寫給兒子的38封信》
《誰搬走了我的乳酪？》
《人性的弱點》
3）你這目標太進取，要調整翻，因為追求過高回報，就要面對太高的風險。現時持有的股票有質素，可長線，無問題。不過部分股價可能會上落較大，要平常心，同時等跌多少少先加注。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
明年股票班見！
------------------------------------------------
Q18500：
你好 龔成
想請教你股票問題
對於港股大市有無什麼看法？
對於最近港股連續跌，十隻最活躍港股都好似支撐唔住成個市，例如阿里、騰訊、美團都跌得好勁，想請教下個跌勢你認為會唔會保持，是否應該走貨，感謝
龔成老師：
我地最重要是分析「企業」，唔好太理會大市，特別是中短期的市況。
絕對唔好因為連續跌等等的因素，而賣出企業，因為上述因素都與企業「完全無關」，你唔需要理會。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
諗sir真名 在 諗sir網收息債券- 胡錦濤真名上網冇人信？ - Facebook 的美食出口停車場
林一鳴，香港金融界資深投資者，擅長股市及樓市投資，重點研究波浪理論、股市財技、投資心理學及樓市走勢，擁有香港中文大學財務系哲學博士和上海交通大學博士後（Post-Doc ... ... <看更多>