【誠實食後感】香港製造 - Chukulik 話梅朱古力/柚子汁棉花糖
#自費㗎屌你 #朱古力 #Chukulik #棉花糖 #特別口味 #真心推介
尋日出咗銅鑼灣買啲嘢，
經過啲商場攤位遇到呢個本地小品牌Chukulik ，
一睇佢賣啲嘢咁西式，
但係照用廣東話朱古力嘅拼音做品牌名就知佢都係香港人嚟，
主打手造黑朱古力同堅果製品，
又係我最欣賞嘅香港製造😎
即場R咗好撚多試食，
試過嘅產品都唔錯，
其中我最鍾意嘅係「話梅朱古力」(原價HK$50一塊/市集價HK$100三塊)，
用咗法國Valrhona 70%黑朱古力，
唔過甜之餘朱古力味唔使講梗係香醇又濃郁，
最特別係佢加咗話梅，
聽落好似好撚奇怪，
但係食落出奇哋夾！
梅味酸酸甜甜咁夾落少少甜嘅朱古力度平衡味道得嚟，
有創意又有驚喜，
真心值得一試！
包裝雖然簡單但係有心思，
佢設計咗一個隱藏嘅位畀你寫上你嘅心意，
用嚟做小禮物非常適合，
散水朱古力呀、結婚禮物呀…
甚至平時買嚟送畀朋友開心下都sweet到痺💕
另外有隻柚子汁棉花糖(原價HK$65一樽/市集價HK$50一樽)，
粒粒手唧所以整齊得嚟好手工feel，
佢唔係塞啲果醬喺中間嗰種，
佢係無餡嘅，
成粒都係柚子味嘅棉花糖。
佢陣柚子味自然得嚟非常明顯，
食落柚子味香得嚟酸酸甜甜咁，
味道絕對唔係一般棉花糖嗰個level。
雖然我覺得質感上可以做得再細緻少少，
不過柚子加棉花糖呢個組合做到呢個效果，
都已經好值得一試。
銅鑼灣市集已經完咗，
但係嚟緊成個9月份，
Chukulik都會喺The One 3樓市集再擺檔，
到時仲會有中秋特別產品，
真心希望大家行過都可以R下試食，
同店主傾下計（已測試啱咀形），
試過啱嘅話不妨幫襯下。
成日都話，
喺香港堅持香港製造唔容易，
小品牌就難上加難，
遇到啲有熱情、有創意又有心機做嘅當然要同大家推介。
我本來好想拍片㗎，
不過呢排爆晒廠咁費事要等到下個月尾先出到片，
所以影張相同大家分享咗先。
等唔切9月去市集望嘅，
可以去佢哋嘅寄賣點United Collection（地址：中環威靈頓街35B號M樓）睇，
又或者去佢哋facebook或者網店落order😋
網店：https://chukulik.boutir.com/
Facebook：Chukulik
（好似話暫時只限面交，因為大熱天時寄朱古力好易溶呀！）
利申：
自費，
本身柚子汁棉花糖賣晒，
我求店主賣樽試食用嘅畀我諗住拎返嚟影相用，
因為試食用嗰啲比起賣街版唧得無咁靚（其實我睇唔出…），
所以店主最後全張單畀咗個九折我，
原價夾埋HK$150，
最後收咗我哋HK$135（好似係，因為係滑嘟嘟畀嘅），
話時話，
好似未畀返錢滑嘟嘟㖭！
話梅朱古力 在 Chukulik | Kowloon Bay - Facebook 的美食出口停車場
Chukulik Mendiant 有得賣嘞！可以一次過試曬我哋5款精選口味：燕麥果仁、話梅黑朱古力、抹茶芝麻、焦糖腰果、摩卡咖啡！聖誕小禮物同休閒小食都一流！ ❤️. ... <看更多>