[讀者決定未來]
《 仆你個街，一唔小心跌咗入戀愛育成嘅世界。》(3)
----------------------------------------------------------
「全部人同我聽住！」我大嗌一聲。
「我叫三上悠亞！」我清清喉嚨：「叫我三上姐。」
班上嘅人鴉雀無聲。
「嗌啦！望咩啊？！」
佢哋一個二個開始交頭接耳。
我揚起手，大力拍枱：「我問你哋聽清楚未！」
然後全場靜晒。
「嚟緊依年你哋一個二個同我醒醒定定，畀我睇到邊個唔妥我、邊個眼超超，我就做邊個，你哋聽清楚未？」
無人敢回答我嘅說話。
「唔係我一個二個打死晒你哋！」我大喝一聲。
蒼井老師尷尬笑笑，就同大家講：
「哈哈哈哈...三上同學真係精力充沛啊。」
然後佢帶頭拍下手，2年3組嘅同學仔跟住佢拍。
蒼井老師：「好多謝三上同學咁有活力嘅自我介紹啊。」
跟住又係啪啪啪啪疏疏落嘅拍掌聲。
蒼井老師指住最後排角落，一個女仔隔離嘅空位，佢同我講：「三上同學你就坐嗰到啦。」
我：「好啊。」
然後我就行埋去。沿路坐喺左右兩邊嘅人視線都跟住我而移動。我心諗：一班碎雜。
善惡值： --
行行下，有個男仔佢顎高頭望住我。佢戴住副方形眼鏡，頭髮又係好長好油咁樣。我見到佢個樣我就憎。
呯！
「唔好意思喎踢到你張枱。」我話。
佢靜靜將張枱搬返正，就繼續坐喺佢。佢雙手合十，耷低頭，一眼都無再望過我。
毒宅自衛隊 陣營友好度-500
我不禁暗暗一笑：「哈，碎雜，全部都係碎雜...」
課室後面，有幾個染咗一頭啡色啊、金色啊嘅少男少女坐咗喺到，男仔校服件恤無攝入去全部散晒開嚟，女仔條校裙就短到上大脾。
為首一個黑色短頭髮，個頭GEL到好行嘅少年咁講：「喂，阿三上姐吓話？」
我雙手向後拉一拉筋：「咩料啊？」
「靚妹你好嘢喎。」佢隔離嘅一個肥仔搭嗲：「川崎高中大佬你都唔識，好打極有限啦。」
佢背後一堆青年就跟住哈哈哈哈咁笑。
一頭髮蠟的少年企喺身，手上面有把匕首，佢拋下拋下咁走過嚟。
蒼井老師大叫：「唔好啊！」
一頭髮蠟的少年：「三上同學，幸會啊。」
佢一隻手伸出，作握手狀，擺喺我面前。一隻手拋高匕首，將刀倒握。
一頭髮蠟的少年：「我係...」
——請輸入角色名稱
因為佢個樣有少少似真島吾朗，所以我叫佢做真島吾朗。
「真島吾朗？」我不屑一笑，拍開佢伸出嘅手：「邊個啊？依到無人識你喎。」
佢後面一眾即刻站起，坐緊嘅櫈被推到老遠，一個二個磨拳擦掌。
蒼井老師：「坐返低啊！」
無人理會蒼井老師。
真島組 陣營友好度-500
「哈哈哈哈！」真島半舉起手，示意後面一班人停住喺到。佢哋都跟住再無動作。真島：「依條女幾有趣。」
善惡值條件達成！！
「你哋唔洗咁嘅！」佢揚起手，又笑咗幾聲：「對個女仔要晒馬咁款又有咩謂呢！」佢微微躬身，向隻手向住角落我嘅位置一擺，示意畀我慢慢咁行過去：「三上同學，依邊請。」
真島吾朗 好感度+50
真島組 陣營友好度+1000
佢一把刀架喺我下顎，佢伸咗個頭過嚟，佢同我講：「得閒食個飯。」
原來係死咸濕仔。畀個男仔約我食飯我不禁虎軀一震。不過我都慶幸，起碼唔洗一嚟就同間學校嘅幫派打架先。嗱，試問陣間戀愛育成變《人中之龍》咁又有咩謂呢。
開學第一日，學校有個開學禮。一班人齊娃娃去禮堂聽咗一大堆嘢，又拍咗幾十下手咁，結果咩嘢都無得到過。我已經習慣咗咁樣。嗰個開學禮一路進行，我就一路望住外面，無再留心過依個開學禮喺到發生緊啲乜嘢事。
依個夢如幻似真。我好似真係跌咗入去一隻戀愛育成嘅戲裏面咁，一切彷彿親歷其境。我不斷咁嘗試合埋對大，再擘大，或者搣吓自己，我以為咁樣真係可以令自己清醒過嚟。最後乜都無發生過，我依舊喺依個世界裏面，我依舊無啦啦去咗參加一個日本嘅開學禮。
「三上同學，你啱啱好勁啊！」我隔離係一把少女嘅聲音。
坐我隔離嘅少女面向住我，佢一頭黑色長頭髮，用個髮夾將少少前陰嘅頭髮夾起，九一分界。感覺係個好鍾意笑、好開朗嘅女仔。
「真係好有型！好有型啊！」佢一路講，一路對眼好似識得發光咁樣。佢撐大對眼同我講：「你真係好型啊！！」
吓？
「哈哈，邊係呢？」我話。
我原本諗住係打機，求其做啲嘢出嚟玩吓嫁咋。
「我叫北條直子啊！你好啊！」佢向我自我介紹一次。
「哦...哦...」突然畀個靚女主動讚我好型仲要衝上嚟自我介紹畀我認識，我真係受寵若驚：「你好。」
「你可唔可以教我啊？」佢問我。
我當然聽唔明：「教你？教你咩啊？」
「點樣可以咁有霸氣啊？」佢雙眼發光，然後佢伸出手，伸到我嘴前面，扮到好似枝咪咁。佢仲問我：「唔知你有咩秘訣嘅呢？」
依個女仔，叫做北條直子，我嘗試去記住佢個名。
我：「其實無秘訣嫁，夠膽，唔怕死，咁就得嫁喇，哈哈。」
佢撐大對眼，直頭好似聽到啲好了不起嘅蓋世秘笈咁：「哦...勁啊，原來係咁。」
我心諗洗唔洗咁誇張。
佢問我：「係呢？點解你會轉校嘅？」
因為我無睇過遊戲背景，今朝出街忽忽忙忙都無時間同「媽媽」對話多兩句，所以連我都唔知點解我要轉校。於是我「Err...Err...」咁就敷衍咗過去，「可能劇情需要啦哈哈」。而佢見我咁樣，佢可能以為我有啲咩難言之隱，所以無問落去。
其實係真係劇情需要，但我唔知點解釋好。
北條同學：「我聽聞隔離班都有個男仔，佢同你一樣，都係今年先轉過嚟，唔知你哋識唔識。」
我搖搖頭：「你唔講我都唔知有個人添。」
北條同學：「咁唔緊要啦。」
喺一邊嘅蒼井老師叫咗我哋一聲：「北條同學！三上同學！唔好咁嘈啊吓！」
我哋兩個人一齊答咗句：「係！」跟住就坐定定，專心咁望住禮堂嘅講台。
開學禮無耐之後順利完結，開學嘅第一日提早放學。我同北條同學一齊離開學校，有一段路我同佢會一齊行。
北條同學佢瞇起眼對我笑：「聽日我再介紹其他女同學畀你識吖！」
我緊係應承啦老虎蟹都話「好啊好啊。」
佢對我揮揮手，同我講咗聲ByeBye佢就走上佢返屋企嘅路，我走上我嘅。
我擰轉身，舉起手：「聽日見喇！」
佢都轉身：「聽日見。」
我望住佢嘅背影慢慢咁縮細。依個時候，我就感覺到佢嘅背影莫名冰冷。好似面前係一個開朗活潑嘅小女孩，而得返佢一個嘅時候，佢就會靜止落嚟。
佢叫做北條直子。
正正係因為咁，我先覺得好似有啲奇奇怪怪，但至於奇怪嘅地方喺邊到呢？我又講唔出。
世界停止，灰色一片，天空、遠處嘅山、道路兩邊嘅樹、佢哋嘅樹葉、牆壁、走過嘅路人、我哋踩住住嘅依一條路，一切都變成灰色。直到我視線中間，彈咗個框框出嚟——
「第一日劇情完結」
謎之聲：「離遊戲結束，尚餘十四日。」
十四日？依啲Game會咁快嫁咩？！
我：「喂！咩嘢結束啊？」
完咗之後，咁我又會點啊？
謎之聲：「喺時間結束之前，你需要完成主線任務。」
我無印象有人同我講過主線任務。
我：「咁主線任務係咩先得格？！」
謎之聲：「一切都會係四月十五號完結。」
我：「四月十五號會有咩事？」
無人答我。
謎之聲：「要讀取之前的遊戲進度嗎？(每天劇情結束後，都可以讀取之前進度，但整輪遊戲只可讀取一次)」
注意：整輪遊戲只可讀取一次，一失足成千古恨，請慎重選擇。
A)讀取第一日劇情
B)繼續劇情 (保留讀取機會)
-----------------
心心= A) 讀取第一日劇情
哈哈= B) 繼續劇情
請選擇！
#一唔小心跌咗入戀愛育成嘅世界
#記得正評引伏
