關於 要你等咁耐英文 ，我們在網路上蒐集到這些相關的討論、資訊與評價

《被害妄想失控－在最政治正確的婚禮中掙扎求存吧！》

今日呢…就係我姨甥女嘅大喜日子！

婚禮將會喺親友嘅自家大宅別墅舉行！
靚人靚衫靚景靚仔靚女！

不過坦白講，我係唔想出席嘅…

並唔係因為佢哋有錢，而我窮。

主要係因為…
佢哋太過「被害性敏感」。

對住佢哋…講每一句說話，都要政治正確。
如果踩界，分分鐘就會宇宙大爆炸。

但姨甥女，細細個就同我好Friend…佢叫到我唯有去一去啦。
希望，佢仲未變質。
唔係嘅話…我就…
＝＝＝＝＝＝＝＝＝＝＝＝＝＝

「Congratulations！！！」

去到會場，一班9年唔見一次嘅遠房親戚，已經為我準備定虛偽嘅笑容。

大姨媽：「文迪！你咁遲㗎！」

我：「啱啱參觀下個後花園呀嘛！咁大咪行耐咗！哈哈。」

呢個時候，姨甥女都著住佢件婚紗進場…

姨甥女：「人哋今日結婚呀，你仲遲到！討厭呀！好衰㗎！」

真係好，
睇住呢個快將30歲嘅千金小姐，總係一臉稚氣，講嘢略帶弱智，的確出於污泥而不染。

我：「哈哈！我性格就係 乞人憎呀嘛！」

故事，由呢一句正式開始。

因為講完呢句，距離我足足有30米嘅 表姨媽 突然慘叫一聲，喊起上嚟！

而現場所有人…都向我露出鄙視嘅目光。

我自言自語：「乞人憎…有咩問題…？」

細思極恐，
表姨媽係有48份之一嘅非洲血統。

我舉高雙手：「喂…頂…唔係講黑人呀！唔係話『黑人就要憎』呀！你哋諗咗去邊呀？？？我黑命貴FANS嚟㗎…」

此時，我嘅目光掃向姨甥女。

係，身為今日主角嘅佢，
可以幫我打完場，但連佢都退後咗兩步，仲稍稍轉身…

呢個轉身，先令我發現到…佢連婚紗都係表面白色，背面黑色…

唉，所以點解我話好驚見到呢班富貴親戚，因為佢哋太政治正確，亦太過「被害妄想」啦…
成村人敏感過性器官。

舅父呢個時侯，單膝跪地：
「文迪，你喺外面平時遊手好閒我都唔理你。但我哋對種族問題係非常重視，絕對唔容許…有任何歧視嘅事件發生。」

我：「唔係呀…我…我有好多黑鬼Fd㗎！唔係唔係…係『黑人朋友』…我成日同佢哋Rap㗎！唔信你聽下！

Yo～我用你嘅膚色～
讚頌你係一個神蹟～
無人Care你嘅來歷～
地球上你緊有價值～
理得你係做Panda～定係去揸Uber～總之你係我嘅巴打！為了你我可以做Writer！」

見我又唱又跳，表姨媽直情喊到呼吸困難：
「White……White...佢講Whiter呀！！！Shameful White Supremacy！」

舅父：「咳咳，各位來賓…真係好抱歉…估唔到黑人膚色不被尊重…仲畀人周街唱…」

呢個時候，表姐Nicole都向我插一刀：
「到咗呢一刻，我都要發聲啦…其實佢之前喺Social Media…都討論過我嘅膚色…話我…皮膚好黑…」

眾人一陣嘩然，
包括我。
因為…

我：「喂呀Nicole姐，你當時IG張相曬緊太陽…我話你曬黑咗，好make sense啫…」

見我舉盾，表哥一秒破防：「你可以用『古銅』色㗎嘛。你內心嘅歧視，已經表露無遺。」

我：「痴線…你哋做人，分下 是非黑白 好喎！」

講完呢句，眾人由嘩然，變寂靜。簡直好似見鬼一樣。

表姐Nicole：「要分黑白……？終於…講到出口啦…表弟呀！我哋要求嘅係平等呀！係大愛呀！」

坦白講，我已經對佢哋絕望。
唯有期盼，由細同我感情最好嘅姨甥女…會為我講句公道說話。

我：「姨甥女…」

姨甥女並無迴避我嘅眼神，反而狼狼地接上：
「其實每次聽你叫我呢三個字，我都覺得好Offend…」

今次連我都R晒頭…又咩料呀…

姨甥女：
「姨甥女姨甥女姨甥女…宜生女！
『最好生女』呀嘛，我知你係特登咁講㗎…

你自己鍾意同細路女玩啫…
但兩性之間，都需要一個平等嘅對待，無話邊個『宜』囉…」

＝＝＝＝＝＝＝＝＝＝＝＝＝＝＝＝
殺咗我啦…呢個世界嘅價值已經扭曲咗啦。
所有賓客都當正我係肺炎病毒一樣，敬而遠之。

我知道，要反抗了。
隨即拎出手機，喺Social Media打咗段聲明。

＝＝＝＝＝＝＝＝＝＝＝＝＝＝＝
管家行過嚟，想將我手中香檳收走之際…我高舉手機！

我：
「嗱…由呢一刻開始，我就係一個『無性別人士』！！！！！！！！！」

無錯，啱啱我已經喺各大Social media聲明咗自己係無性別人士！

我：
「邊個夠膽趕我走，就係對『忠於做自己、敢於承認自己性向嘅弱小社群』進行歧視同欺凌！！！！管家你咪掂我呀！我嗌非禮㗎，全球首例呀。」

表哥細細聲問：「咩係…無性別人士？」

表姐：「好似係…心理上…對任何性別認同都無歸屬。即係佢可能係一個男人，但唔覺得自己係屬於男人…好新下…我都要Study下。」

舅父：「但佢有喉核㗎喎…」

我一聽，即時反擊：「你即係歧視一個無性別人士但存在性徵啦！！你而家係咪歧視我呀！？？？吓！我好受Offend呀而家！」

舅父：「唔係…唔係…」

我：「唔係？你退後緊喎？」

舅父：「我單膝跪緊點退後呀…」

我：「你個心退後緊呀！我feel到同你嘅『心之距離』！
嗱！而家極度懷疑你歧視我嘅性別取向，
將會循例影你相，擺你上Social Media，你等住違反『社群守則』，畀朱克伯格拉人封艇鎖Acc啦！

話咗㗎啦，我無性㗎嘛！」

正當我佔盡上風，將佢哋一網打盡嘅時候，
劇情又再有突破性發展！

姨甥女：「等等，我有 有力證據，證明佢有『自我性別』意識！」

我：「挑！你話有就有呀！嚟呀！」

姨甥女：「你叫咩名呀，講呀。」

我：「陳文迪囉！」

姨甥女：「英文名呀。」

我：「Mandi 囉…」

此時，她笑了。

姨甥女：「點解要叫Mandi……唔叫Womandi呀！！！！吓！你仲唔係父權主義者？？」

眾人一聽，士氣大增。
錯嘅人，即刻變返我…

其實我都諗唔明當中道理…
但喺呢個Amen都會變成Awomen嘅年代，誰能定對錯？

＝＝＝＝＝＝＝＝＝＝＝＝＝

我杯香檳終於被收走。
待眾人將我掃走之前，我說出「遺言」，亦係肺腑之言…

「其實…對於種類和平共處，兩性關係要平等、甚至關注氣候、環保等等…
我全部都支持。

但可唔可以…
唔好『矯枉過正』呢？
唔好人哋閒話一兩句，就要無限放大呢？

你哋其實講得好啱。
所有事都唔應該分黑同白，因為一年事，多數係會落喺灰色地帶。
如果你樣樣都追求極致…樣樣都政治正確，個世界就真係會好黑白。」

舅父：「你講完啦嘛？講完就…」

我：「未。」

我：「另外，就係…希望你哋一視同仁。如果你哋要標籤自己嘅大愛，麻煩唔好雙重標準。

Nicole表姐，你啲假髮分分鐘嚟自新疆集中營，你有冇關心過？
香港人權被踐踏、緬甸人甚至每日都被殺害，
佢哋唔係畀人歧視緊…
直情畀人消失緊…你有冇出過聲？

如果你對世界嘅大小事都敬愛，雖然有啲位會膠膠哋，但我至少會敬重你哋。

而唔係…
錦衣玉食，你就談普世價值；
阻你搵食，你就當一文不值。

若果如此，就只是虛偽…」

一段意味深長嘅演講，眾人被說中要害，為之語窒，甚為尷尬。

但一名西裝男子卻從人群中步出，笑笑口、侃侃而談：
「你都識講啦，佢哋畀人消失緊，係咪？」

我：「係呀…再咁落去…真係會成個民族被消失…」

西裝男子：
「係囉。我哋反對歧視，追求平等。

但首先，佢哋都要存在先得嘛！

如果佢哋都即將唔再存在，就唔存在歧視啦。
你都消失咗咯，我點歧視你啫～

所以對於將會消失嘅事，我哋做到嘅係好有限嘅！」

聽到佢咁瘋狂嘅發言，我都不禁彈後數十尺：
「哇，呢位兄台，你咁嘅說話都講得出嘅！
如果我無估錯。。。
。
。
。
你應該係有一官半職嘅！！」

西裝男子：「失敬失敬，小弟官拜司長。」

眾人一聽，立即讚好，爭相除罩合照。

我長嘆一聲：
「佩服佩服…好啦。
我諗…呢個世界，都係無得點救㗎啦。

其實…我之所以咁遲先嚟會場…係因為…」

『我放咗個炸彈喺花園。』

隨住呢句對白，場內惶恐之聲立時此起彼落。
大家都頓失方寸，不知此話孰真孰假。

唯有西裝男子行事果斷，保持文質彬彬地問：

「你嘅聲音我已經聽到啦，我哋的確有部份係做得不足。
等我返到Office會出篇statement，
強烈呼籲、密切留意、予以譴責 你所講嘅情況。

所以借問聲…
我有幾多時間逃生，個炸彈會幾時會爆呢？」

我：「而家。」

（完）

IG: cheungson88
https://www.instagram.com/cheungson88/
（很少人Follow的acc，有時說說生活事）

MeWe：張晨
https://mewe.com/p/張晨
P.s. 用app有機會彈app…可搜尋「Cheungson」

《扮工鬥室》好地地打份工，點會諗到暗藏殺機？（試閱一）
　
對上一次大學同學聚舊嘅時候，正好係我轉新工半個月。當一班舊同學知道我入咗去「Dark Flow」做，幾乎每一個都表現得非常驚訝。
　
「『Dark Flow』喎！？聽講勁難入，而且面試超嚴格……」同學A講。
「還好啦……」
「我都有send過CV去，但連見嘅機會都冇……」同學B講。
「咁都係我好彩啫……」
「唔洗扮晒謙虛喇，冇料又點入去呀。」同學C講。
「哈哈……」
　
一般人對「Dark Flow」呢間公司嘅印象──外資公司、大好前景、難入但人工極高，講緊同一職位份糧至少多外面三四成、而且福利好，每年足足三個禮拜有薪假，每月仲可以請一日唔需要醫生紙嘅病假……
　
最重要仲有一點，據聞身處外國嘅公司大老闆非常迷信，明文規定員工每日返九至五，六點前一定要全部離開公司，由開業到而家都冇加班呢回事，而對外就宣稱呢種先係最有效率嘅工作模式……種種優勢加埋，絕對係大部份人夢寐以求嘅工作。
　
聽落係咪好吸引？起初我都同大部份人嘅諗法一樣，覺得入咗呢份工就可以輕輕鬆鬆享受生活，每日放工唔洗同其他人迫巴士地鐵。但實情卻係完全出乎我意料……
　
事實係，呢間公司有眾多「奇怪」嘅地方，只係因為「某個原因」所以一直冇對外傳開去。
　
今日，就等我冒險分享下自己嘅經歷……首先，當然係由最初嘅面對開始。
　
－－－－－－－－－－－－－－－－－－－－
　
大眾結業、書展延期、再受到成個大氣候影響，呢段時間無疑係作者最艱難嘅時期，希望各位可以訂閱支持我嘅 Patreon。
　
最低只係每月一餐飯嘅價錢，就可以睇到限定長篇故事，仲會有特別短故同創作歷程心得分享。
　
訂閱連結：
https://www.patreon.com/echoofheart
　
《無異之地》實體版經已登陸各大書局。
　
－－－－－－－－－－－－－－－－－－－－
　
記得半個月前，「Dark Flow」嘅人事部打嚟叫我去面試嘅時候，我真係興奮到喺小巴上面大嗌出嚟，差啲嚇到司機大佬心臟病發直剷落山。
　
第二日我直接請咗半日假去面試。當日嘅狀態可以話係去到顛峰，配合埋事前已經執得靚靚仔仔嘅CV同portfolio，成段過程三位面試官裡面有兩個聽到起勢點頭，唔知仲以為佢哋塞住耳機喺度偷聽緊Rap歌。
　
當時我更係覺得勝卷在握，已經開始分心諗緊夜晚要食乜慶祝。但就喺呢個時候，全程一直木無表情冇點講過嘢嘅面試官架叔突然同另外兩個人打咗個眼息。
　
「你哋出一出去，最後我想同佢單獨傾多陣。」
　
一聽完，另外兩個面試官都相當識做。閂埋門嘅一刻，成個會議室嘅氣氛突然變得嚴肅起嚟，連溫度都好似跌咗幾度咁……令我極度懷疑係有人較大咗個冷氣。
　
「方璟佑……阿York。」架叔拎起我份CV望咗眼。
　
「或者叫我佑仔都得，之前啲同事都係咁叫我。」
　
「我就坦白啲講，無論係份CV、抑或成個面試……都真係好鬼無聊，悶到我差啲就瞓著。」
　
「吓？」我一開始仲以為自己聽錯。
　
「而且仲好鬼假。」
　
「假？」我個口擘大到就快甩骹咁濟，「邊度假？」
　
「你呢種程度平時啲醉酒佬揸車撞都撞死唔少……」
　
「正常係應該撞唔死咁多……」
　
「加埋鍾意駁嘴呢點，我實在睇唔到理由請你……」
　
「等等先……可能我頭先講得唔夠好，希望你可以再俾個機會我。」我差啲就激動到彈起身。
　
「機會，得。」架叔隨手將我份CV掉落地，「但我要聽嘅係你嘅真心話。」
　
真心話……一聽到呢個問題，我腦海開始高速轉動。
　
「我知道公司總部係美國，有時仲會派員工出差。我自問英文幾好，IELTS仲有8.5分，將來一定可以幫到……」
　
「廢話，又係廢話……」架叔搖搖頭，「呢啲嘢我聽到識背啦。」
　
「仲有，我都有研究過公司背景，知道……」
　
「真心話呀。」架叔企起身，「如果仲係呢啲就唔好浪費大家時間……」
　
「我明啦，真係明……」我企起身，「呢度人工高！只要一請就已經多我上一份工成五千蚊，仲未計試用期之後仲有得加……齋係呢點就已經好想做！」
　
架叔聽完之後終於露出一個不一樣嘅眼神，然後慢慢坐返低。
　
「仲有呢？」
　
「福利好、包保險、多假期……最重要係個返工時間，我最憎放工每日喺金鐘迫嚟迫去，放五點簡直係爽到爆。」為咗成功，呢一刻我可以話係豁出去了。
　
「哦……仲有冇？」架叔嘴角微微上揚。
　
「有，當然有！Reception嗰位叫做阿Jill嘅同事又靚又大波，如果有機會喺度做我一定會試下媾佢！」
　
一講完，架叔即刻睜大眼望實我。因為頭先最後一下幾乎係嗌出聲，所以隨時連會議室外面都聽得一清二楚……
　
「嗱，講下真話咪幾好囉。」可怕嘅沉默結束後，架叔終於笑住講：「佑仔，下星期一準時返工啦。」
　
行出會議室之後，我成個狀態就好似啱啱玩完亡命過山車咁。渾身無力之餘又仲未係好接受到頭先發生嘅事。行出公司之際，仲要見到Jill對我尷尷尬尬咁笑，嗰刻真係好想死……
　
但唔理點都好，「Dark Flow」的確係請咗我，只要之後打好呢份工，將來肯定係生活無憂……
　
但我實在太天真，到真真正正注意到唔妥嘅時候，一切都已經太遲了。
　
*
　
雖然最初嘅面試可以用匪夷所思嚟形容，但其實同公司其他奇怪嘅地方相比，呢件根本就係小巫見大巫。
　
接住落嚟，我要講嘅就係公司入面嘅同事。
　
記得正式返工嘅第一日。為咗留低好印象，所以我提前半個鐘返到公司。搭完𨋢開門，第一眼就見到Reception嘅同事阿Jill。
　
「早……咳。」阿Jill本身明顯係想打招呼，但一見到行出𨋢嘅人係我就即刻將句說話吐落肚。
　
「早晨。」我行埋去開口講：「我今日第一日開工，想問下妳知唔知我嘅座位喺邊？」
　
「你等陣，我幫你叫架叔出嚟。」阿Jill拎起檯面嘅電話，撳完掣之後擺喺耳邊，「喂，架叔……新同事到咗。係，唔該晒。」
　
等佢收線之後，我即刻把握機會同佢道歉：「其實上個禮拜嘅事我真係好對唔住，事後足足內疚咗兩日，連飯都食少咗半碗……」
　
「你唔洗講喇，我明……亦都冇介意。」雖然係咁講，但佢嘅表情明顯唔係呢回事。
　
「但唔講清楚我驚會有咩誤會，話晒將來大家都係同事……」
　
「只係同事。」阿Jill加重語氣，「我已經有男朋友，所以希望你自重。」
　
唉，一聽到呢個消息我不禁內心嘆氣。本來想媾佢已經係困難mode了，有男朋友嘅話肯定更加難。
　
「早晨呀新同事。」下一刻，架叔就行到嚟門口，「你咁早返到就啱晒，等我先帶你參觀下辦公室。」
　
佢揮一揮手示意我跟住佢行，睇得出佢今日嘅心情比起同我面試嗰日好得多。如果係今日先面試，或者我就唔會出醜了。
　
「你叫咩名話？阿風？」架叔突然問：「定係Jacky仔？」
　
「係阿York，叫阿佑或者佑仔都得。」
　
「哦……記得返喇。」架叔一臉恍然大悟，「冇計啦，呢間公司啲員工成日轉嚟轉去，真係好易搞錯。Reception個阿Jill都係啱啱過試用期咋，我一開始仲成日阿Gill阿Gill咁叫佢……幾尷尬呀。」
　
「哈哈。」我乾笑兩聲。
　
「嗱，最角落呢度就係Pantry（茶水間），嘢食嘢飲自己攞就得，如果唔想俾人當係公家嘢攞走就記得寫低名，呢啲嘢你應該識㗎啦？」
　
「嗯。」
　
「Pantry對出就係人事部，主管Amy姐同細老闆好熟，所以千祈唔好得罪佢。隔離係宣傳部同IT部，嗱……主管阿Luke啱啱返到嚟。」
　
我見到有個著住西裝，大約三十幾歲嘅男人慢慢行返座位。睇佢一臉瀟洒、高大而且大隻，同同事講嘢嘅時候總係掛住自信嘅笑容，好明顯係playboy平日成日走落老蘭食女。
　
「公司謠傳佢就係阿Jill嘅男朋友，所以你小心啲喇……嗰日講埋啲咁失禮嘅嘢。」架叔笑住講。
　
咪都係因為你害嘅……我差少少就衝口而出。
　
「再過就係我哋工程部，你應該知主管係我喇？」架叔問。
　
「當然知……」
　
「唔好見我上個禮拜咁樣，其實我平時係好鬼好相處。」架叔拍一拍我肩膀，「嗰日咁啱賭波七串一輸最後一關，成皮嘢最後得個吉，所以心情先特別差……」
　
「即係今日應該贏唔少？」我好奇問。
　
「唔知呢。最後就係戰略部，」架叔帶我嚟到一條長走廊旁邊，但並冇行過去，「你咁熟公司架構應該明喇，我哋有好多計劃同生意都係處於未公開得嘅狀態。為免外傳出去俾競爭對手知道，所以戰略部先會零零舍舍同另外三個部門分隔開。」
　
「嗯。」
　
「然後主管Me姐上星期去咗出差唔喺度，不過正路你哋都冇咩機會接觸㗎喇。」
　
我盯住走廊盡頭，唔知點解……感覺就好似有股無形嘅吸引力想引誘我過去咁。
　　
「喂，唔好發呆喇。」回過神嚟，架叔已經行返去工程部嗰邊，「呢度係你嘅座位。因為我哋好多份Project都收緊尾，所以呢兩日應該都冇嘢需要你幫手……你今日先簡單睇下員工須知、識下班同事、仲有時間就搵我拎啲舊Project睇下。記住最重要一點，準時收工。」

「明白。」
　
如是者，我就照架叔嘅說話做，一埋位開機就開著個員工須知嚟睇，點知第一段最尾就再次強調員工要五點準時收工。到底大老闆係迷信緊乜嘢，老實講我真係越嚟越好奇。
　
睇到咁上下，周圍嘅員工開始陸續返到。坐我旁邊嘅係一位年紀同我差唔多嘅男同事（當然失望）。雖然見佢一張厭世臉感覺好難應付，但既然坐得隔離點都要打聲招呼。
　　
「早晨，我係新嚟嘅同事阿York。」我伸手想同佢握手。

但對方聽完只係啤咗我一眼，一句都冇回應就望返去螢幕繼續港股行情。
　
「你係咪喺度做咗嘢好耐？」我保持友善嘅語氣問：「其實我有樣嘢幾好奇，到底大老闆有咩迷信先要規定員工早收？」
　
「你見唔到我唔想理你咩？」男同事語氣惡劣咁打斷我，「唔應你仲問，知唔知咩係禮貌？」一講完，佢即刻塞住耳筒，仲要故意開Youtube播Dua Lipa 嘅IDGAF。（i don't give a fuxk）
　
見佢咁嘅態度。我當然冇自討沒趣，再望一望周圍嘅同事，好多都係一樣塞住耳筒做緊自己嘢。所以我決定等放Lunch再行動，聽著歌繼續睇須知……唔知過咗幾耐，突然一陣香水味從身後飄過，接住有人出現喺我身邊，伸出修長嘅手，輕輕拍咗台面兩下。
　
「係？」我即刻除低耳筒望過去，眼前係一位非常有氣質嘅女同事，無論樣貌定身材都更勝阿Jill。
　
「你就係今日返工嘅新同事？」佢問，見我點頭再講落去，「我見架叔唔喺度，所以就直接嚟搵你……」
　
「佢應該係落咗樓下食煙……」順帶一提，旁邊嗰位冷漠嘅男同事都係跟埋一齊落去。
　
「我一陣仲要趕住出去，所以想盡快搞掂，你跟我過嚟。」
　
雖然我聽到一頭霧水，又唔知佢係邊個。但從語氣同態度推斷，感覺佢應該似係上司級數……唔通就係人事部嘅Amy姐？係就講得通了。
　
我跟喺佢背後行，見佢著住一身灰色修身恤衫配搭黑色包臀短裙，完美咁將身材嘅優勢展露出嚟。行路嗰陣仲要婀娜多姿扭嚟扭去咁，真係越望就越多幻想。
　
「咦？」
　
但睇下睇下，我發現佢居然帶我走入通去戰略部嘅長走廊，行到一半再轉入去一間小型會議室。
　
「我係阿Me，同事一般會叫我做Me姐。」Me姐先將會議室嘅簾拉好，然後就慢慢行埋去會議室台隔離，「你幫我閂埋門先。」
　
我照做，心裡面完全唔知而家係咩情況。到我擰返轉頭，見到Me姐居然直接坐喺台上面，翹起雙腿，先從上而下打量咗我一眼，接住講：
　
「你仲等咩？除衫啦。」
　
吓？
　　
（待續）
　
－－－－－－－－－－－－－－－－－－－－－
　
九月頭會放多一篇試閱，之後就要訂閱先睇到啦。各位真係要多多支持呀！
　
訂閱連結：
https://www.patreon.com/echoofheart
　
《無異之地》實體版經已登陸各大書局。

〈一個在日本的刁民〉撰文：雲海

 以下呢個經驗比較長，大家希望可以耐心小小慢慢睇！你就當我一個香港刁民喺外地遇到嘅情況！
話說3月5號下晝突然間收到消息，話日本政府將會強硬執行由中國包括香港澳門入境嘅人士進行強制14日隔離！身邊好多朋友已經聯絡我問我情況點？我真係一頭霧水！完全理解唔到點解之前日本政府對疫情Hea到爆，甚至我認為所有日本武漢肺炎確診數字都係假嘅時候（因為我認為日本政府為咗東京奧運會會不惜一切，包括做假！）突然剎那間強硬到咁，而且講到明會暫時取消香港人嘅日本免簽證（後來知道包括特區護照同埋BNO持有人），咁我就即時要處理離開辦法，要知道我係因為有事情要做，一個月內兩次要去福島核電廠附近「考察」！我原本3月5號就係由福島返到東京，喺香港訂唔到6號7號嘅回程機票，就唯有8號啦！但黃昏嘅時候日本政府再確認所有強行實施隔離政策係由3月9號開始！咁我係坐3月8號黃昏6:10日本航空公司班機回香港，咁就剛剛擲界了，因為我聯想到，若果這班機深夜飛到去香港，第二日根本就冇人再飛去日本，其實取消嘅機會好大，咁好啦，我就嘗試接觸日本航空公司啦！好嘢到呢，首先根本完全打唔到電話俾佢哋，佢哋網站亦都刪除埋原本有嘅電郵地址！再喺網站留咗句說話：依家太多人接觸佢哋冇辦法會回覆之類！咁即係點呢？若果3月8號班機取消咗，之後短期內都好難返到香港！而我有一個難處，就係3月9號下晝其實我係要去醫管局旗下嘅診所攞藥，其實我已經帶晒所有藥，只能捱多一個禮拜到！咁點算好呢？咁我就即刻去查東京飛關島再由關島飛香港嘅航班，呢個係我之前諗定嘅plan B，美金都帶足啦！點知原來關島直飛香港嘅航班已經取消晒，一定要經馬尼拉，咁一來菲律賓對港人都有隔離限制，二來人質事件之後我話咗以後唔去菲律賓！咁好啦即刻去check東京飛曼谷，曼谷飛返香港嘅航線，正當想選擇邊班航空公司之際，就收到消息話泰國對港人亦都執行14天隔離令（後來消息就更加混亂），莫講話泰國消息混亂，其實日本呢邊嘅消息更加亂；首相安培講嘅嘢同外相同厚身省講嘅嘢可以係完全唔同，而且冇一個標準或者統一說法！咁我第一時間諗起嘅梗係搵返香港政府駐東京經濟貿易辦事處啦！由Google查到佢地地址同聯絡方法，咁我就即刻打電話比佢哋啦，由3月5號黃昏6:00開始打打到9:00，一係就冇人聽電話，一係就唔通，再睇清楚上面資料寫到明佢哋辦公時間一至五都係二十四小時喎！原本諗住即刻飛的士過去，諗諗吓都係聽朝先。到3月6號朝頭早10點幾我就坐的士過去，就遇上我其中一次最離奇嘅經驗：我去到正門，有一位日籍女職員即刻上前招呼我幫我撳電梯，我已經覺得好奇怪，冇理由佢會知我嚟㗎？之後佢就問清楚我係咪相關職員（我諗佢以為我係香港政府派來嘅職員）我就話唔係，我只係香港市民，想來查詢問題！佢就面色一變，趕我出去門口個三角開門位，叫我自己撳掣上去啦！（嘩！冇禮貌到呢！）這女士之後從此就消失咗啦！咁係我撳掣嘅同時就見到塊牌上邊寫着原來佢哋嘅辦公時間係上午9:30至到下晝5:30，仲有一個鐘頭lunch time添！等咗好一陣子，先有人係通話機問我咩事？我就用廣東話好清楚咁講：「我係香港嚟嘅想問關於日本政府依家嘅緊急狀態令之下嘅情況！」對方竟然用普通話同我講：「你等一下！」心都實埋！我就企係個三角門口位起碼15分鐘，不斷被開門冷風吹，直到一位聲稱係香港政府之香港人、識講廣東話嘅職員落到嚟用都幾唔好嘅禮貌問我咩事？之後仲要唔俾我進入大門任何比較冇咁大風嘅位置去問問題（原來咁樣對香港人嘅？！我交啲稅結果原來係咁嘅！）我於是乎就向佢發難，同佢講其實我依家係乜嘢都問唔到，仲有關於攞藥嘅問題萬一飛機停航唔知邊個可以幫到我......等等；但你估都估唔到個陳小姐點答我，佢話：「其實我哋呢個辦事處唔係立亂俾香港人可以嚟問嘢就問㗎！（嘩！）你係要預先打電話俾我哋做個appointment，你先可以嚟㗎！不如上網或者打電話俾我哋做咗個appointment先啦！」嘩！我真係火都嚟！我話：「琴晚打咗成晚電話無人聽電話甚至係冇Voice Mail，我點做appointment呢？好啦我我今朝特登坐的士嚟到現場問你你竟然要我做返appointment先返嚟？！」之後陳小姐仲同我講，佢本身自己唔係屬於「查詢部門」嘅同事嚟㗎，而本身比香港人查詢個部門，原本識講廣東話嗰一位職員咁岩今日唔辦公，上面工作嘅同事全部係講日文同英文！若果我堅持要用廣東話問，就幫唔到你囉！仲有仲有，其實你哋香港人唔應該搵我地囉！你應該自己打1823囉！（其實佢不斷講1823我諗佢係講錯咗，其實佢係想講1868入境處熱線，但我已經冇心情修改佢）嘩！！！！之後佢再強硬地繼續講：「陳生！你冷靜啲先！」（呢句真係所有公務員嘅死穴！）我就即刻爆佢：「琴日日本政府突然間頒發緊急狀態令，我哋而家喺日本嘅香港人乜都問唔到，你電話有冇人接！仲要呢上面寫到明你嘅廿四小時運作（後來所有職員都否認呢個說法，仲要聲稱唔知道Google喺上邊咁樣寫，我離開之後佢地就向Google提出修改變返做佢哋嘅辦公時間！）依家你仲要我去做appointment去問問題，你仲命令我去冷靜？！」之後我繼續爆：「你都幾好嘢喎！我有好大對比囉！同樣係香港政府經濟貿易辦公室，喺武漢嘅同事就可以對係湖北省嘅香港人要藥有藥、要食物有食物、要飛機有飛機、要運輸有運輸、要返香港有返香港，而且全部免費！同一個部門對喺日本嘅香港人連打個電話都做唔到！尼個落差巨大得滯啦掛！」陳小姐好似覺得應付唔到我，就想返Office話聲稱會搵佢哋嘅負責人同我講！好！我等！大概10分鐘之後，一時就話俾我聽得一個廣東話嘅職員，一時就成隊講廣東話嘅職員落晒嚟，包括佢哋嘅辦公室老頂阿頭Thomas Wu以及五位來自香港嘅入境處同事！（唔知係咪我話我係Henry Chen觸動到佢地神經呢？）胡生好似做大龍鳳咁，一落到嚟，就大大聲同我講：「陳生，唔好意思！我哋頭先上邊傾緊所以冇落嚟了解.......！」我即刻插嘴：「我諗我唔使再企喺個三角風口位度吹風可以入嚟大堂個可？」我哋所有人之後都企喺大堂張枱仔前邊，因為連一張凳都冇㗎！（真係好想知道駐東京辦事處嘅財政撥款有幾多？）之後胡生想同我握手，我就話防疫時間唔好啦！我於是繼續向胡生發難，都係表達同一個部門駐武漢同駐東京對港人嘅處理方式係落差咁巨大？！連一個應變小組或者電話都冇！！！當然胡生亦都表達其實佢哋尋日知道日本政府嘅公布之後都完全掌握唔到而家嘅情況！同埋都希望幫到我若果日航取消班機攞藥嘅問題，佢哋開頭就討論啱啱過嚟嘅入境處職員會唔會呢兩日幫我攞到，但時間上做唔到，但係佢哋完全唔覺得3月9號之後會幫我寄到藥過嚟（唔知點解湖北又做到個喎？）佢哋就話若果我真係滯留喺日本，暫時返唔到香港，會帶我去睇日本嘅醫生，請日本醫生方面幫我開藥（當然係我自費啦！）而且佢肯俾佢自己嘅卡片及聯絡電話我，有咩事可以搵佢求助，我不得不承認佢嘅公關手段係好好多！但我都向佢強調，係日本唔係得我一個香港人，有咩事要搵佢地求助並唔可能得到咁樣嘅待遇！基本嘅電話查詢都冇？連電話錄音都冇？之後胡生同幾個入境處職員都同我講：「其實你哋最好有咩事都打返入境處嘅求助熱線1868啦！」我即刻打蛇隨棍上話：「1868求助熱線我交過好多次手㗎啦！我唔能夠話佢哋係廢！不過真係完全唔掌握情況同幫唔到手囉！仲要係某程度上佢哋都要聽命於保安局嘅指揮，呢下我覺得好離奇㗎！點解入境處自己唔可以話事嘅呢？太多擲界嘅權力問題！」現場所有人就好尷尬咁望住我，唔知講咩好！咁我就話：「都唔阻你哋繼續開會啦！若果飛機繼續飛就冇問題啦，我滯留喺日本我就搵你地幫手啦！」呢個時候一位日籍職員我樓上Office衝落嚟，表達問咗日本航空公司，3月8號6:10果班飛機會照常，而且仲print咗一張香港入境處1868政府熱線嘅資料俾我參考！我講句唔該一睇，係簡體字版！（反眼）或者我喺湖北嘅話待遇會好好多嘅！我作為一個喺日本嘅刁民，要辦公室嘅阿頭嚟招呼我，我都已經好唔好意思㗎啦！
Ps我剛踏出辦事處門口，就聽到胡生好大聲咁同啲同事講咗一句：「Well done！」我當時心裏面諗，well done咗喺邊呀？我講笑咁講啦，唔通成功將武漢肺炎惹咗俾我所以well done？！要知道全程同胡生講嘢，佢都係冇戴口罩㗎！企喺我半尺位右手邊嗰個入境處職員都係冇戴口罩同我講嘢㗎，呢位職員係特登過嚟處理鑽石公主號港人嘅同事！講真！若果我之後真係惹到武漢肺炎，你都唔好問我個源頭喺邊！

中三揀科好似啲人結婚咁，錯！係慘過結婚，因為人地結婚一兩年發現性格不合都仲可以離婚，你發現你揀咗嗰科性格不合呀？除非你有兩三個X喺手，否則學校隨時唔比你drop，見到人地讀到舐舐脷，你想轉又無得轉，然後焗住讀焗住考焗住個成績跟你成世，諗起都覺得慘。因為你覺得咁慘，因為你覺得咁無奈，因為你覺得你自己掌握唔到自己既命運，於是同佢地一樣，啲人結婚之前就要搵風水佬去夾夾個時辰八字，而你就希望老師點條生路你行，話你知你適唔適合讀佢嗰科。

可惜既係，風水佬其實都算唔到自己要喺天橋底擺檔，你老師當年一樣算唔到自己適唔適合讀自己教緊嗰科，問來問去最後都無人話到俾你知你未來讀咩科會讀得好，就算我真係神算算得到你會讀得好，你都可能諗其實讀其他科會唔會更好。同學們，其實未來既嘢無人講得埋，潛質就係睇唔見先叫做潛質，所以今日想講既，唔係咩人會讀得好，而係咩人會讀得唔好，睇下你中唔中喇！

第一，你唔夠理性。咩係理性呢？理性既相反唔係感性，你睇多啦A夢都會喊嗰啲都可以係一個好理性既人，其實理性既意思，係你做決定既時候會考慮既係啲咩？一個理性既人，當佢做決定既時候，佢會盡可能諗下自己做決定既理由合唔合理。正常人大多數時候做決定都唔理性既，你落床邊隻腳會著拖鞋先？你點知而家喺你屋企嗰個女人一定係你呀媽？點解你覺得大隻佬多數係gay既？其實我地好多時候唔會諗自己既決定既理由，通通都係由習慣、印象、直覺等等黎做決定，因為咁樣最快，最有效率，亦都通常係好準確既。日常生活OK既，但係放落Physics入面呢，好一部分既同學之所以Physics讀得唔好，都係衰太習慣用直覺黎做決定，見到加速度有「速度」呢兩個字，就會覺得混亂，日常生活有摩擦力，所以一定要俾力啲嘢先會keep住郁，呢個印象入咗腦，以後一做到Newton’s first law就錯晒。理性既人鍾意思考，而思考好費時好費力好費精神，好多時俾人感覺係「咁樣咪得囉，點解你要諗咁多？」但係呢種願意思考既態度，正正係讀好Physics既一大重要元素。(DSE出卷最鍾意陰啲人用直覺做決定，目的其實係想將啲因為睇得多而習慣咗啲題型既人篩走，盡量想令到啲真係對Physics有理解既人高分。)

第二，你想像唔到。乜嘢係想像呀？就係你只係知道好片面好片面既資訊，然後你就要去構想一個好具體既內容，呢個過程其實要運用你腦入面既大量記憶體，情況有啲似你睇小說，小說只係寫啲文字出黎，啲資訊好片面，當你見到呢啲文字，你就要用想像力，去建造一個具體既情境，你要完整咁感受呢個想像出黎既世界，你就要記住入面每一個你想像出黎既物件既顏色、質感，每一個動作既聲音、節奏，呢啲既內容可能同你生活完全脫勾，意味住你仲要抑壓住你覺得唔習慣既衝動，所以你個腦喺想像既時間其實係不斷run緊。讀Physics其實同睇小說好相似，小說會逐字逐句話你知而家個場境係點，每一個人物做緊呢乜，而Physics一樣，喺Wave同optics入面尤其喺，Wave入面會話你知一個空間入面唔同既粒子既動作，從而要你想像返個大環境係點，Optics鍾意畫一兩條光線就表達晒所有其他光線，因為做唔到動畫，所以過程中好靠想像力，你個腦唔可以同時呈現出呢啲想像，你就會有諗諗下又唔知做緊乜既情況。(其實為左淺化Physics ，而家DSE出卷已經盡量俾多啲圖你，等你少啲出現想像唔到既情況，但係咁亦都反向證明咗，好多人係因為想像唔到而攞唔到分。)

第三，你數學出事。其實數學能力係Physics能力一個好重要好重要好重要既指示劑indicator，一來係Physics要計數，二來係Physics同數學所需要既能力需要有唔同，但亦有好大部分重疊。前者就大家都明，真係數學好屎既人，就會出現計計下計錯數既情況(DSE為左呢班人，已經盡量減少計數、或者係減少啲要計得複雜既數)，後者反而係重要啲，雖然有好多數學既內容其實係應用唔到喺DSE Physics上面(上到大學情況就唔一樣)，但係由於數學好既人，通常就係邏輯能力強，心思細密僅慎，語文能力普通而覺得數學入面搵到成功感既人，呢樣同Physics人既特性係十分之相似，所以數理數理呢兩科，成日俾人當係孖公仔咁樣唔係無原因。(不過真係會有數學好Physics差或者Physics好數學差既人存在，而且個人觀察，通常啲人都係數學好Physics差，咁可能係同第一點有關，Physics比起數學無咁好操。)

不過最後，以上都係講幾個有機會出事既位，但係未講到最多人出事既位，最多人其實讀Physics讀得唔好，係因為一個字，懶！老實講，有好多嘢係可以靠努力、靠啱既方法做到返黎，所謂努力，唔只係講你而家放幾多時間，仲講緊你由幾時開始努力，我自己成個小學英文嗰科都得過且過，大個英文唔好都唔好意思話自己無語言天份，因為我望住英文辣辣聲嗰堆，你知唔知人地細個花幾多時間同心機放喺語文度？你錯過咗學習能力最高既童年，上到中學你就會覺得自己比人地無天份，但你唔知道既係，呢啲所謂既天份，係有得靠努力、靠啱既方法追得到。要講「我失敗係因為我無天份無潛質」既門檻其實係好高好高，因為當你講得出呢句既時候，代表住既係你已經盡晒可以盡既力，試過無數既方法都唔得，咁你先可以咁講，而事實上，幾乎呢個世界無人可以咁講，所以我地可以做既，係當你想做得好既時候，用啱既方法，用努力去做好佢，「我究竟有無潛質呀？」其實諗黎都多餘。