中環作為金融從業員出沒主要地段，多年來都吸引唔少人於當區貼街招，講到成效，實在係唔錯嘅，因為我一年都收到N次朋友forward出嚟嘅中環街招相，同時附上兩個emoji——花生花生。今日中環，又有新「花生花生」，最新貼到成個中環都係嘅街招主題，竟然唔係「欠債還錢大老千」嘅追數街招，而係劍指金管局賣港！除咗附上兩位金管局高層嘅玉照外，亦大字標題寫上「信貸資料拱手送中」。
如果講「信貸資料」、「送中」，咁就要回一回帶。話說香港嘅信貸資料，以往都係環聯資訊獨市生意，當然，前年環聯就出過事，爆私穩漏洞，結果點呢？就係令金管局就有「理由」以「打破環聯壟斷」之名，話要引入更多競爭者。不過，你知我知全世界都知，競爭者一定有來自中資！
之前新聞都報道，金管局未來會開一個全新個人信貸資料庫（CRA）中央化平台，11月招標，出年3月公佈結果，中標CRA機構，2022年起，就可以有權限去呢個平台拎數據，睇晒香港人嘅底牌。
即係咁，呢類咁有用嘅資料，中資又點會唔吼住呢？家陣被指有興趣入標嘅，除咗係環聯外，仲有兩間，分別係諾華誠信、以及平保（2318）旗下金融壹賬通。
先講諾華誠信，一向都被定義為「中資背景」，創辦人係中銀信用卡前總經理蘇誠信，大股東意大利信貸數據公司CRIF及中原集團旗下中原數據揸六成；另外四成呢？就係一班港資及中資中小行、以及……內地信用評級公司持有。諾華誠信定位好清晰㗎，講明係拓展大灣區市場，早幾個月仲話，希望今年內可以將大灣區居民的個人數據跨境應用！
至於平保，就更加唔使講，近年成為中資進軍香港市場嘅主將之一，不單入股新地（016）西九龍高鐵站項目、亦成功於香港虛銀界插旗，成立平安壹賬通銀行；另外，旗下手機財富管理平台陸金所，亦已來港開業。
係嘅係嘅，「打破壟斷」的確係可以站在道德高地，不過，你試吓今時今日，企上呢個高地，行出街拎大聲公，大義凜然同市民講：「為了令市場更健康，我哋決定畀多兩間公司access到全香港市民嘅信貸資料，兩間公司！都係中資！」如果可以安然咁行返落嚟，我就真係表演食file！講堅！唔會好似假博士咁走數！
當然，到呢兩間中資真係中標，一定會有一大堆承諾：「資料一定唔會送中」、「我哋係幾咁重視私隱盛盛……」
不過同中資講承諾？中國都曾經承諾「香港實施一國兩制、高度自治、香港50年不變」；然後你又同中資講「私隱」？請睇蘋果記者起底網啲資料係邊度嚟，答案係——回鄉證。
自上年社運後，中國更急於全面「收回」香港，今日就吹風搞全民測試、搞「健康碼」；聽日就話要知埋信貸紀錄……一步一步走，每步知多一點點，傳說中的「港版社會信用系統」，恐怕不是夢。
By千頌C@堆填區
http://fb.com/wingigwok
