（點樣先寫到浪漫愛情故事？浪漫就係痴_線）
—
其實以文學嘅角度去講，浪漫主義係一種寫作手法，其實唔一定同愛情有關。佢嘅靈魂就係得兩個字—「誇張」。以前曾經讀過篇文叫《蜀道難》，蜀道你可以當係一條行山徑，篇文其中有一句係咁嘅「蜀道之難，難於上青天。」即係同你講你要征服蜀道就好似要上天咁難，以誇張浪漫嘅手法去形容呢條路嘅難度。
—
而將「浪漫」擺喺愛情電影入面，簡單一句概括就係「為咗你，我可以。」平凡人嘅戀愛唔好睇，因為佢哋會走埋一齊係自然不過嘅事，所以編劇寫故事果陣，都會安排好多顯而易見嘅衝突：
—
例如天人相隔，或者一人一鬼，我好愛你，但一天光聶小倩就會消失喺寧彩臣嘅面前，可惜佢哋已經喺兩個唔同嘅世界，等到張國榮死果陣，先可以同王祖賢重遇；
—
例如絕症，係純愛電影常用嘅套路。正常人都希望自己嘅戀人可以健康，我哋通常都唔會揀重病嘅人作為我哋嘅伴侶，但為咗你，我可以付出所有，唔介意全心全意照顧你，將一生相處嘅時光濃縮喺幾年甚至幾個月入面，每一日都當係最後一日。即使《新不了情》入面袁詠儀都係要死，但果段時間已經係同劉青雲兩個人一世最難忘嘅時光；
—
例如階級嘅對立，有錢仔配窮家女，或者公主配平民，愛幫助佢哋打破唔同世界嘅阻隔，就好似《愛情夢幻號》咁，有錢仔劉德華愛上失意破產嘅紅葉，本來唔會接觸到嘅兩個人，因緣際會之下喺塵世相聚；
—
又或者係平時你九十九%無可能遇到／會做嘅事，喺浪漫嘅巴黎火車入面一男一女相遇，開始傾計，然後漸漸天文地理無所不談，可惜佢哋得一日嘅時間，愈傾愈唔捨得，最後決定一齊過埋夜，相約喺半年後再見面。
—
總之，你一定要安排一啲元素令兩個人喺一般情況之下無辦法相愛，好似《志明與春嬌》咁，女大過男，有浪漫，就可以打破姊弟戀嘅框框；《金枝玉葉》入面哥哥唔理袁詠儀係男定女，總之就係鍾意佢。
—
而最極致嘅浪漫在於，兩個人排除萬難，當你以為可以一齊BBQ果陣，但主角們仍然唔可以喺埋一齊，例如好似《鐵達尼號》嘅JACK咁為ROSE犧牲咗自己，對方條命嘅價值仲高過自己；又或被社會時代嘅洪流輾碎，《麥迪遜之橋》嘅梅姨始終唔可以放低自己嘅家庭同攝影師遠走高飛；又或者係一啲曾經做錯嘅事無可挽回，《東邪西毒》入面歐陽鋒白白錯過大嫂，而張曼玉又選擇鬥氣鬱鬱而終，大家都無珍惜到呢份曾經至真至誠嘅愛情，愛得深，遺憾也大，亦更浪漫。
—
「相親竟不可接近，或我應該相信是緣份。」
蜀道難 難於 上青天 地理 在 中国这条栈道，走完才知道什么叫：“蜀道难，难于上青天” 的美食出口停車場
中国这条栈道，最宽处不到30厘米，走完才知道什么叫：“ 蜀道难 ， 难于上青天 ”This plank road in China is less than 30 centimeters at its widest ... ... <看更多>