我老婆唔肯剪指甲（上）
我有一個煩惱，老婆唔肯剪指甲。
呢排佢將啲指甲留到半隻手指咁長，我覺得有啲過份，就提佢剪吓指甲。
點知老婆勃然大怒，話我侵犯佢嘅人身自由，女性嘅身體應該係屬於自己嘅，我唔尊重佢……
咁我當然噤若寒蟬，唔敢再出聲啦。
但係過咗一排，情況惡化咗。
老婆啲指甲愈嚟愈長，已經長到有半隻手掌咁長。
佢老闆覺得咁樣會影響形象，多次勸佢剪指甲，但老婆死都唔制，結果就俾老闆炒咗。
你冇聽錯，為咗留指甲，連份工都唔要。
老婆冇返工之後，就日日喺屋企保養佢啲指甲。
為咗保養指甲，佢已經唔做家務，連汽水罐都開唔到。
我日日返到屋企，就見到佢喺度搽指甲油，一臉陶醉，我頂唔順啦！
我決定謀害老婆……啲指甲，我估，只要將佢嘅指甲剪番短，佢就會恢復正常。
一個月黑風高嘅晚上，我拎住一個特大嘅指甲鉗，悄悄靠近熟睡嘅老婆。
佢啲指甲真係好長，我好輕易就捉住一隻指甲，細細力剪落去。
「啊！」老婆驚醒，慘叫一聲，好似我斬咗佢一隻手指咁。
佢成個彈起，見到我手中嘅指甲鉗，狠狠刮咗我一巴，用一種見到殺父仇人嘅眼神睥住我。
然後，老婆提出離婚，原因係我威脅到指甲嘅安全。
我俾佢嘅激烈反應嚇咗一跳，承諾唔會再搞佢啲指甲。
所有親友都唔理解老婆嘅行逕，連岳母都幫我講好說話，但老婆堅持決定，馬上同我分居，開始搞離婚手續。
我好迷茫，剪隻指甲啫，仲要冇成功到，唔駛搞成咁掛？
我同班兄弟訴苦，佢哋認為，我老婆唔會因為區區一隻指甲而離婚，一定有更重要嘅原因，話唔定有姦夫。
我深以為然，但老婆嘅社交圈子我都好熟悉，姦夫到底喺邊？
講起上嚟，老婆留指甲之後，加入咗一個「華麗指甲團」，我以為係一堆女人講美容修甲，當時都冇太留心。
依加，我決定去「華麗指甲團」查探吓。
我搵到「華麗指甲團」嘅地址，佢哋搞緊聚會，人頭湧湧。
我以為會員全部都係女人，點知裡面大概有三分一係男人，無論男女，啲指甲都留到好長。
我心生警惕，話唔定老婆個姦夫就喺呢度，我決定入去打探吓消息。
我申請入會，俾話事人拒絕，佢話我嘅指甲唔夠長，最長嘅指甲至少要有3cm，先符合基本入會要求。
「我可以畀會費架。」我估，搞呢啲奇奇怪怪嘅團，都係為咗賺錢啫。
點知話事人義正詞嚴咁講：「我哋唔收會費，我哋嘅宗旨，係令每個人都擁有美麗嘅指甲。」
留到啲指甲鬼死咁長，我真係唔覺得有幾美麗囉。
雖然入會失敗，話事人都叫我留低聽Talk，聽吓佢哋嘅理念。
聽Talk嘅過程中，我愈聽愈覺得唔妥，佢哋係咁講留指甲有幾美妙，要點樣保護自己嘅指甲，好似捍衛生命一樣……
一班留指甲嘅會員聽到如痴如醉，一路聽一路讚嘆自己嘅指甲。
我諗，我老婆未必有姦夫，相反，佢嘅轉變係由於入咗邪教！
為咗拯救老婆，我要先了解指甲邪教。
不入虎穴，焉得虎子，我開始留指甲，然後加入「華麗指甲團」。
3cm嘅指甲只可以做基本會員，要獲取更多權限，深入了解呢個團，就要留更長嘅指甲。
我嘅指甲愈嚟愈長，老闆警告我、朋友嘲笑我，我覺得佢哋好冇Taste，明明留指甲係咁好睇，每日欣賞自己嘅指甲，都覺得好滿足……
咪住先！點解我會有呢種諗法？
好彩我有寫日記嘅習慣，睇番之前嘅日記，我明明對留指甲深惡痛絕，但隨住我留指甲，我都開始沉迷自己嘅指甲。
我好驚，我想剪指甲，但當我拎起指甲鉗，我隻手居然無法自控地一震，將個指甲鉗跌咗落地。
然後，我全身每一個細胞都好似叫囂緊：「唔好剪指甲！」
呢段日子，我都唔係成日去「華麗指甲團」，換句話講，我唔係被邪教控制，我係被自己嘅指甲控制咗。
我終於明白，點解老婆留指甲之後，行逕會咁古怪。
或者一開始，老婆只係貪靚貪新潮先留指甲，但隨住指甲愈嚟愈長，指甲漸漸主導佢嘅思想，令佢變成「指甲人」！
唔怪知得老婆要同我離婚，因為佢嘅思想已經被指甲佔據，我想剪佢嘅指甲，同企圖謀殺係冇分別。
下集：https://bit.ly/3iZqvTB
將專頁設定為「搶先看」/ "See first"，最新故仔馬上睇！
願天下有情人終成兄妹：https://goo.gl/AVtejy
真實惡魔：http://bit.do/e4jnX
#短故 #短篇 #小說 #陳美濤 #廣東話 #粵語 #tomatochan #我老婆唔肯剪指甲
