<<終有一日， 我哋要離開香港，先至可以體驗香港>>
最近我消失咗一段短時間，因為策劃咗多年嘅 一個旅行終於成行 … 話說我去咗橫店影城旅行。(冇錯喇，就係嗰個香港明星成日北上拍戲嘅嗰個影城，就係當年TBB 拍金枝玉慾孽，尋秦記取景嘅嗰個影城。
至於點解想去影城旅行，主要係我一向沉迷睇電視，以前好渴望參觀tbb 電視城，睇古裝街實景，但後來香港嘅實景移師去大陸，所以好想策劃一次橫店之旅。
路程係有啲轉接，火車轉飛機，落咗飛機再包車，總之就搭車又搭船咁， 用咗六七個鐘，終於畀我去到橫店影城。(BTW, 呢一趟旅程，係深深體驗到一國兩制嘅真諦， 一國兩制嘅真諦就係，搵香港人著數嘅時候就係一國，香港人想 拎返著數，尋求國家協助，佢就話係兩制，要分得清清楚楚。於是喺訂購機票網上付款，進入影城，都深深體驗到兩制嘅價錢同對待)
講返今次嘅旅程，今次嘅旅程，我參觀咗香港廣洲街，秦王宮，明清紫禁城園區，同清明上河圖園區。有朋友問「人哋拍緊戲，你可以入影城玩㗎咩？」。影城其實好大，每日都有唔同劇組係影城唔同角拍攝， 每一個園區每一日都會有啲地方唔開放，唔開放嘅地方就係某啲劇組租咗拍攝嘅地方。 唔拍攝嘅地方係可以比錢入嘅， 你亦可以自己book隊crew, 自己做主角，幫你拍微電影，甚至可以入橫店影城做茄哩啡， 影城入面有唔同嘅告示，寫住招聘演員，你可以自己報名。
作為一個觀眾，去到每一個影城角落，都會覺得幾新鮮，幾有趣。 例如會見到尋秦記入面項少龍訓練精兵嘅地方，又例如，入到古裝街，會覺得自己好似行咗入去皆大歡喜場景。 但去到香港廣州街嘅時候， 係覺得有啲莫名嘅感觸。
唔知大家有冇呢種感覺，就係香港冇努力咁保留自己應該保留嘅特色， 舊式嘅街道小店建築，全部都因為土地問題拆曬，而又因為政府好想去殖民化，好想同化自己，迎合大陸， 於是我哋 應該保留嘅 uniqueness 都fade out。
香港冇曬啲特色嘅嘢，但呢個世界有好多人對香港特色嘅嘢好有興趣，於是就仿製香港嘅特色出嚟。唔知大家會唔會有一個危機感？有朝一日，我哋係要去歷史博物館，甚至要離開香港先至可以感受香港。
人哋咁有心去仿製一個有香港特色嘅地方出嚟，其實係一件好事。 好似日本人好用心咁仿製香港九龍城寨出嚟，最少有人用心保留呢份特色。但係當你見到人哋嘅地方係度展現香港嘅特色，作為一個香港人，個心情就等如，你去大英博物館，見到英國人喺中國掠奪嘅展品，喺人哋嘅地方，離開咗香港，先至感受到香港，係相當揼心。
另一個揼心嘅位係，香港人冇好好咁保留自己嘅地方特色， 大陸人喺「做假」方面，雖然好有一手，嘗試去 偽造香港嘅特色， 佢哋只會可以用大陸人嘅角度，「歪曲」咁展現香港出嚟。 你見到佢哋做出嚟嘅a貨，你會想像到，以後拍出嚟嘅電影同劇集，香港嘅場景 就係失真。
去到橫店好多地方， 都寫住東方荷里活，呢個字眼好銀眼，因為若干年前，香港係 人人公認嘅 東方荷里活，但好明顯，此情不再，呢個title ,香港亦都冇咩資格再擔當得起。
其實我覺得大陸人係好鍾意英國殖民地化嘅香港，橫店嘅香港景區，有殖民地時期嘅英式郵筒，英式電話亭，條街個嘅背景音樂係廣東歌，係beyond嘅今天我，巡遊表演播嘅係英國國歌。人哋都咁努力 保留英殖時期香港嘅特色，點解我哋要刻意咁洗底？
（我講咗出嚟，話橫店保留咁多英國殖民地嘢，會唔會有人舉報，聽日橫店會唔會禁止播英國國歌？喺香港街播明天會更好，同東方之珠呢？）
（橫店嘅旅程仲有好多好多，大家有興趣嘅，我願意講更多更多 …）
