《人生大富翁》
最近同朋友玩大富翁，略有研究當中策略既我，係入面陪跑，思考住人生。
五個玩家，除左我之外係一對夫妻，一對父女，我就好似一個電燈膽咁，負責跑圈比錢呢兩批資本家。
父女玩遊戲好簡單，小朋友當然想贏，而爸爸都想比小朋友贏得快樂，所以係早期爸爸就以極低價，將可以存成一套既地賣比個女，簡單講就係2000蚊既地，3000賣比佢，呢個決定簡直係明送。
我當然不滿，但呢個時候個女話：「點解2000蚊既野你要賣3000比我，你明呃細路女！」
聽到之後我心中暗喜，呢位小朋友真係識計數！叔叔都好支持你！你老豆唔係送比你的話都係想拎你著數啦。
而小朋友既媽媽都係旁邊附和，係啦，你爸爸想呃你錢。
望住委屈，滿腦子恨鐵不成鋼既爸爸，佢終於降價到賺你500蚊賣比個女，個女仲要一臉唔情願。
對面既夫妻都有好強既好勝心，我地交換左個眼神，認為比小朋友最好既教育就係，比佢知道世界既險惡！夫妻用一百蚊互相換地，然後仲補左句，真係有誠意比對方既，就唔應該賺錢！
個女聽到用一種怨恨既眼神望住佢爸爸，呢個時候爸爸有理說不清，唯有將更多既地低價賣比個女，手上無地既佢，拎住大量現金，用全副身家買左個女一個單獨既火車站，然後就自爆身亡。
擁有大量現金既女起左好多樓，然後夫妻其中老公唔好彩踩中左破產，手上物業要全數抵押，老婆為左唔比小朋友再儲齊一套，高價買左幾塊關鍵地，但局勢已經開始一面倒，最後都係慘敗收場。
完事之後，我回憶返當時小朋友唔想買爸爸塊地，只要係成年人都會知呢個買賣係有賺無蝕，但小朋友就會覺得應該係原價買賣，媽媽仲會附和佢，某程度係令小朋友對於價錢呢樣野只執著係現在價錢，而睇唔到將來價值；亦無轉位思考，如果自己要賣塊地比人，唔通又會原價賣咩？原價不如唔好賣？
而從出局既次序去睇，最易死既，就好似我咁，有技術無關係人脈；其次就係合作關係，兩夫妻雖然係合作，但資產分散，如果佢地可以早少少將資產統一就可以有更大優勢，有更多操作空間；最可怕就係無私既貢獻，兩個人變成一個，就可以成就勝利。
但呢個世界有幾多無私既愛？有幾多可以信任既合作？自己可以掌握既，就只有技術同能力。
當然，小朋友勝利係好開心，佢根本就唔知發生咩事，可能覺得原來大富翁係咁易玩，你班大人都無料到既，但佢未必知道，佢既勝利係建築係老豆既犧牲之下，而老豆仲拍晒手咁話個女好叻，完全無一絲失落感。
我諗起平時同佢打機，一逆風就會罵隊友，勝負心極其執著既佢，原來係一個慈父。
曾經我以為大富翁係講幸運既遊戲，然後係技術既遊戲，依家發現，原來好多結果係開局投胎時已經決定好。
我認命嗎？不，我唔認命，依家我係youtube學緊點控制骰仔點數！！！
－－－－－
支持作者：
除左買書／Patreon支持外，我亦開始與不同品牌合作，我亦唔想影響文章，所以唔作置入式宣傳，只係文章最後加上連結，輸入PROMO CODE 【MAY50】購買產品三百元以上可以享有50元折扣，每購買一件產品亦會為我帶來少少分成收入
隨心，如果你地喜歡既，啱用既先買吧。
商戶列表（暫時得一個相熟朋友支持）花之滴香水，本地品牌推出過唔少令人深刻既味道
1）https://floroma.net/
2）希望會一直增加啦！
