要追飲品店就無謂，根本追唔切。避開最初嘅人龍，到而家先試到呢間喺台灣好紅(?)嘅迷客夏，可能有太多新店湧現加上已開一段時間，週日雖然有小人龍，但下單到取飲料都係十分鐘內嘅事，可以接受，隔離嘅茶湯會都要等差不多耐。
迷客夏喺台灣聽講有好多分店，香港店英文名叫milksha，喺大陸中文名叫菓然式，差啲以為係A貨😅餐牌分茶、鮮奶、奶茶、芝士奶蓋、特調飲品，定價$16-36，杯子容量唔大。大部份飲料可自選糖度、冰度，關於甜度設定，半糖係等如正常糖。配料可加珍珠、紅豆，一律$4。
聽好多朋友講話芋頭鮮奶好人氣，不時會賣光；當日係星期日下午茶時間都仲有，好彩掛，買左兩款相信係比較人氣嘅產品。相對而言，還是覺得芋頭奶比較突出，可是價錢有點小貴✍️
👉大甲芋頭鮮奶 $32/微冰
過往只係飲過茶湯會嘅芋頭類飲料，此芋頭鮮奶幾啱我口味。見店員以雪糕勺份量嘅芋頭蓉加奶製成，紙杯裝。芋蓉份量不少，唔會打到好細碎，口感腍身，相信製作時已加糖份，芋頭帶一定甜度。一向唔係芋頭控，太raw太淡嘅芋頭我就麻麻地，呢個甜度剛好，飲完有飽腹感😃
台灣迷客夏用自家牧場生產嘅奶，確係賣點；可惜香港店用綠田源，頓時少個特色。不過講真我唔係奶專家，未飲過台灣店出品，唔係見到盒奶分到咩，哈哈。奶滑但味唔會太濃，同帶甜嘅芋頭總算配合，屬於我會回購嘅芋頭飲品👌
有啲朋友嘅評語好有趣，話食哂啲芋頭之後得番鮮奶味，咁人地確係芋頭+鮮奶，想預期啲乜？
👉珍珠手炒黑糖鮮奶 $28/微冰
按店員建議點微冰，冇透明杯打唔到卡，視覺影響唔到味道。黑糖、鮮奶已融合，可直接飲用。冇黑糖漿入口嘅高甜度，反而有陣焦香味，持績到尾都冇奶水感覺，同好多之前試過嘅黑糖奶唔同。飲過老虎堂、鹿角巷之類，未必喜歡啊。我係螞蟻人，比較喜歡嗰種衝入口嘅黑糖漿味。
珍珠自家製，冇加焦糖色素，呈透明狀，口感煙韌，食落冇黑糖味，只係甜甜地，聽講話係蜂蜜。
-
迷客夏
地址：銅鑼灣利園山道17號地舖
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
