終於，期盼已久的 ｢撇甩兩個女3小時｣ 計劃快要上演了😂 今星期尾開始兩姐妹就會一起番學，令阿媽有3個小時的清靜時間，相信對於媽媽的身心健康有正面作用。
(心中撒花 🌸🌺🌸🌺🌸🌺)
女，阿媽細個嘅時候覺得讀書成績好重要，因為直接關係到上唔上到大學，入讀咩科，畢業出嚟有咩工種等等，對將來行咩路有重大影響。
成了兩女之母後，我嘅睇法有點少少改變。做人唔可以無墨水，所以我仍然會建議你地盡力讀書，成績唔需要第一，唔包尾已經過得去。人的可能性不只限制於教育制度入面，世界很大，能做的事很多，要靠你親身去搜尋、挖掘、嘗試、再努力鑽研。阿媽識得唔多，但求同你一齊行，在旁支持。
在別的地方見到一句說話：「一個常態國家，政治的責任在成年人，年輕人的興趣都在體育，娛樂，結交異性朋友；而在變態的國家，政治太腐敗，沒有代表民意的機關存在，那麼干涉政治的責任必定落在青年學生身上。變態國家的年輕人為政治，不但要犧牲自己的學業，興趣，最後可能還要犧牲生命。」
估唔到這句說話，套用喺今時今日的香港係如此貼切。身於亂世，免不了會擔心兩個女長大後世界唔知會變成點樣。。。是混濁一片？回復平静？社會是進步了？還是倒退了？作為媽媽，打從心底裡不希望孩子成為「變態國家的年輕人」。
青春應該是開開心心的，無憂無慮的。可憐今天香港的政治環境令一眾中學和大學生無咗｢開開心心過暑假」，無法｢番學讀書咪得囉，唔好攪乜嘢政治｣。大人的錯，令後生的失去了盼望。
作為和理非及兩女之母，我承認我無法行到最前，但能夠做的都會做。每次睇直播我會同家姐講：哥哥姐姐很辛苦的，經常出嚟示威遊行，為嘅就係佢地同埋你地小朋友嘅未來。但願事情終有個好的結局。
#正確的價值觀由父母教導俾小朋友
#不論政見是黃是藍
#是非黑白要認清
#自由無咗未必揾得番
#賺錢很重要但做人唔係淨係得揾錢一個目標
#錢唔駛多夠食夠用已經比上不足比下有餘
#有能力的人應該保護弱勢的人 #而唔係傷害佢打佢拉佢鎖佢告佢
