《海》
以前既人成日話：買咁貴既樓黎做咩啫？個景靚咁又點？都唔係俾你睇，係俾你工人睇；個會所多設施咁又點？都唔係俾你用，係俾你工人用。打工仔就係咁，辛辛苦苦賺錢既就係你，他他條條享受既就係人地～悲！平時我好少咁唸架，可能係因為近黎武肺而令我响屋企既時間多左。有時我陪兩個仔玩既時候，一望出窗，就唸返起四年前我剛剛搬入黎時既情景。
「老婆呀，記唔記得十年前我地剛剛拍拖，果時呢度先岩岩起好，我地仲黎睇示範單位，話第時一定要住响呢度，估唔到依家真係黎左喎！」這是我响經紀既手上接過鎖匙之後，第一句就同我老婆講既說話。
剛入伙既時候，呢度所有既野都好新奇。特別係呢片海，每日都有好多船仔經過。夕陽下，每日不同既天色再配上一個偉大既鹹蛋黃，形成左獨一無二既風光。入夜後，我們放眼遠望，可以欣賞到迪士尼既煙花演出。我仲記得，果時既我專程去到鴨記，買左個五舊幾水既望遠鏡返黎，每晚同牛仔坐响鋪床到一路睇一路嗌，佢果副興奮樣，我到依家都仲歷歷在目！
今日，耀眼既煙花已經落下。反過來而變得多姿多彩既，可能係我既生活：酒會同晚飯既應酬，以至到十點响將軍澳做直播。有時响晚黑返到屋企，都已經十一、二點，莫講話鹹蛋黃丫，就連我兩個仔既面珠登都見唔到。Work life balance？假如說life係我仍然可以响夜闌人靜既空間裡找得到既話，那我真正需要追尋既，其實係咪叫money family balance至岩？
「錢搵唔晒既，我寧願返屋企湊仔。」這是我响尋日既下晝，同一位做公關既行家落樓飲杯野，而婉拒左佢有關開班授徒既合作時講既說話。
說實的，以前我有一刻想過靠開班、開講座既收入黎糊口；到個人大左，想法都唔同左。假如我推專欄、推節目既次數叫做多，係咁，我推教班既次數起碼多一倍。「教書唔係我既職業（我老婆先係做教書既），要錢既話我會响個市度攞。」俾我推過既人，可能會以為我好寸。而其實我只係希望爭取多啲時間陪下老婆同兩個仔，同响屋企靜靜咁睇下海。
#股評以外
