荒島遊戲（上）
事情嘅起因，係我買唔到樓，買唔到樓，就結唔成婚。
唔好誤會，我女友甜甜唔係貪錢港女，我地只想組織一個普通嘅家庭，但大家都無錢。
為咗甜甜，我決定參加「荒島遊戲」。
我偶爾接到嘅一個電話，介紹「荒島遊戲」，一年時間，有五百萬酬金。
「遊戲規則好簡單，三個人留喺荒島度，無人機會送足夠嘅食物同水。
一年後，所有人都可以走；中途每死一個人，剩低嘅人都可以早六個月走。」
聽落好似好恐怖，但諗落又唔太驚險喎。
有食物有水，三個人悶夠一年咪走得囉，又唔使死。
只要我同意，二百萬訂金就會即刻入落我戶口。
佢地話，一年後，我係生係死，三百萬都會畀我或者屋企人。
我半信半疑咁同意咗，畀咗我同甜甜個聯名戶口號碼。
二百萬到帳，我留咗封信畀屋企人，然後就去到約定嘅地點，上船，出公海。
船上服務唔錯，有幾多乘客，但個個都鬱鬱寡歡，我估佢地同我一樣，都係收咗錢去「荒島遊戲」。
我忍唔住諗，我地成日話「生命無價」，但其實係唔係每個人都有個價？
胡思亂想咗幾日，終於到我落船。
工作人員畀咗本書我，再幫我戴上一個頸圈，好似狗仔一樣。
同我一齊落船嘅，仲有一男一女。
工作人員指一指本書：「呢本係詳細嘅規則，頸圈上有毒藥，如果你地唔跟遊戲規則逃跑，就會即時死亡。荒島上發生任何事，都無法律責任。」
工作人員走咗，島上有三間木屋。
我地簡單自我介紹，男嘅叫阿強，女嘅叫阿冰，本來都互不相識。
我地都達成咗協議，相安無事咁生活一年，拎錢走人。
跟住落嚟，我就開始咗我嘅荒島生活。
定時定候，真係有食物同水送落嚟，當然無得點菜，只可以充饑。
雖然叫「荒島遊戲」，但我覺得，件事一啲遊戲成份都無，只有極度悶。
除咗食飯瞓覺，荒島上無任何娛樂，唉，我就當番工啦，番工都一樣悶，至少喺荒島都叫月薪幾十萬。
因為太悶，阿強好快搭上咗阿冰，佢地一齊住，阿強仲威脅我，叫我遠離阿冰。
荒島上二男一女，就一定要爭？車，我寧願思念吓甜甜啦。
因為呢件事，我更加少同佢地溝通，各自各生活，實在太悶，就睇吓本厚厚嘅遊戲規則。
悶咗三個月左右，有一日，我照常去無人機嘅位拎嘢食。
我果份嘢食唔見咗，唔通阿強同阿冰拎錯咗？定佢地搞出人命要食多啲啊。
我去到佢地間木屋前面，阿冰望到我：「有事啊？入嚟坐低先講。」
行咗幾步，腳下一滑，我好似跌咗落個坑度。
一塊啡色嘅大網從天而降，將我成個人包到實晒。
佢地暗算我！前排我見阿強喺度拉樹藤，佢話想整個秋千畀阿冰玩，原來係整個網嚟陰我。
「點解啊？」我大叫，我咩都無做過，完全係一個正常、友好嘅鄰居。
阿強陰惻惻咁講：「你無聽遊戲規則咩？死一個，就可以早六個月走。」
我知，但只係悶少六個月啫，咁就要攞我命？唔通我條命真係咁賤？
阿冰講：「我同佢解釋清楚，等佢做隻明白鬼啦。」
阿冰行埋嚟，喺我耳邊細細聲講：「殺咗阿強。」然後塞咗一把匕首落我右手度。
下，發生咩事？
我嚟唔切諗，阿強已經伸手捏住我條頸。
我用力揮動匕首，劃破個網，捅咗阿強一刀。
雖然我偷襲又有刀，但我嘅左手同雙腳仲俾個網綁住，十分唔靈活。
阿強扭住我隻右手，把刀就咁跌咗，我隻右手都甩咗骹。
唔可以畀阿強拎到把刀！我成個人撲埋去，喺阿強身上又咬又打，好似兩隻野獸打架咁。
掙扎之間，我望到阿強腹部個傷口，我毫不猶豫咁扯爆佢個傷口，阿強慘叫一聲，折斷埋我隻左手，終於無再動作。
我仲未從「我係咪殺咗人」嘅心情平復過嚟，就見到阿冰執起把刀，向我衝過嚟。
平時我梗係唔怕，但呢一刻我遍體鱗傷，雙手都廢咗，真係唔可以再戰。
我終於明白，阿冰嘅目的，係想我同阿強同歸於盡，佢就可以即刻離開荒島。
我真心唔理解，不過女人嘅嘢，男人從來都唔理解架啦。
下集：https://goo.gl/Wygv4M
將專頁設定為「搶先看」/ "See first"，最新故仔馬上睇！
玻璃鞋詐騙事件：https://goo.gl/gtDdA2
拯救咗地球，之後呢？：https://goo.gl/EVhESA
#短故 #短篇 #小說 #陳美濤 #廣東話 #粵語 #tomatochan #荒島遊戲
聯名戶口死亡 在 【身後事。。。你要知】 當有親人離世作為遺產繼承人/代理人 ... 的美食出口停車場
聯名戶口 若往來或儲蓄戶口由已故客戶與他人聯名持有，該聯名戶口在其中一名戶口持有人去世後將轉移至尚存的戶口持有人。我們需要收到死亡證明書後才能更新戶口資料。 ... <看更多>