心血來潮食車仔麵，三餸連嘢飲，46蚊。
我知道，食材成本升，租金壓力大嘛，埋怨它就好像上一輩慨嘆「當年食碗細蓉都係五毫子咋」。香港人應該早就適應了五十蚊一餐晏當等閒，不是嗎？
（我聽到有人細語說：「其實我還未適應……」）
我記得幾年前蔚為奇觀一位朋友豪氣地嗌夠七餸，都係40蚊埋單。上個星期走過大商場，見到一間車仔麵專門店門面做到中菜廳那樣，這個講求包裝的年代，換個好賣相可讓你賺多一個開。換句話說，窮人若想省去這層包裝成本的話，揀陋相的食肆就對了。
（可是眼見小店用蔗渣價錢做出燒鵝味道，人們便會替它不值：「為甚麼不包裝好一點賺多些？」）
一套港產片預視了香港餐飲發展——《食神》。唐牛在快餐店當面罵史提芬周：「廟街一碗嗱渣麵你賣成99蚊？你有冇良心㗎？」放諸今日就像地圖炮一樣罵勻不少食店老闆。《食神》背後的理念是好的，講瀨尿牛丸和叉燒飯都可以鬥贏天九翅佛跳牆，想證明只要肯拚搏和用心，市井都可勝權貴，下欄都可以好過上菜。可惜，機心者所學的卻是壞食神的那一套：「啲冰有咁大粒得咁大粒，支飲管有咁粗得咁粗，啲位有咁窄得咁窄……」
周星馳諷刺一碗嗱咋麵可以賣99蚊，但當我行到廣華醫院附近親眼見到真的有店舖大大張海報這樣賣時，我就笑不出來了。
「慘得過有人食啊！有價有市！」
30蚊一碗叉燒飯，改名黯然銷魂飯賣60蚊，食客會拍手叫好爭住試——如要拍《食神2》應當刻劃這種場景。食客是體現民主的，他們用腳投票，食過翻尋味如同認同一個議員可以連任，所以集團式食肆透過壟斷去決定香港人的口味之際，香港人也用腳決定社區該有甚麼食肆。觀塘協和街曾經有幾個師奶夾份開一間粉麵店，烚幾粒打甂爐丸就賣近40蚊，結果捱不到半年就摺了。大埔最近也開了一間專賣雲吞，我在茶餐廳聽到伙記這樣說：「40蚊10粒無其他嘢，仲邊會有人食啊？」結果開業一個禮拜，門庭若市果真變成大拍烏蠅。食客的民主真的很可怕。
香港人這種特色令到很多食店「茶餐廳化」，我見過不少日本菜、台菜、麵店、意粉屋在開業時本來專心做其拿手菜式，但往往做完了第一批嚐新的街客後，他們就發現回頭率不高，生意劇減，最終被迫在兩點半時段賣西多士、雞翼薯條、沙嗲牛麵茶餐，放棄自己的老本專去求人光顧，利用這筆生意額幫補緊拙。所以弔詭地，茶餐廳的確是香港特色——是我們的選擇令到各樣菜式變成茶餐。
（翠華卻變高檔餐廳……）
下欄扮上菜，上菜被迫做下欄，我們見證這些怪象發生。蔡瀾早前看不過眼，主張火鍋要消失，飲食業才有希望，然後《東張西望》訪問的香港人說：「唔係呀，打甂爐幾好呀，多選擇，最重要食湯底……」我有朋友開火鍋店，他向我解說：「開食肆緊係做甂爐啦！唔使煮請啲人返嚟執料畀啲客自己淥就搞掂。八粒丸40蚊，照剔。200蚊一碟薄切肥牛，照剔。剩係湯底我都賺咗88蚊先，閒閒地一個人300蚊落樓，你話做咩其他菜可以回本咁快？」
我無言以對。
幾日前fb有人貼相說：「兩個人打邊爐食盡牛每個部位，900蚊，抵！」
幻覺嚟啫，嚇我唔到嘅……
作者
===========
最新小說《捉姦》已於序言書室和三聯商務書店有售。首作《地球另一端》可inbox網購。
翠華集團老闆 在 翠華餐廳Tsui Wah Restaurant - Facebook 的美食出口停車場
話說老闆親自去工場揀為翠華揀餐具，對呢隻當時仲係版嘅杯仔一見鍾情，自此佢就成為翠華嘅品牌元素之一。 ❤️鍾意呢套杯嘅各位，小編再次提醒大家，奶茶杯套裝已經再次 ... ... <看更多>