我在大台短暫的日子
二，PA生涯第一天
第二篇，講吓我第一日返PA工有咩遭遇同感受。
作為一個土生土長嘅八九十後，我同大家一樣，無可避免，都係睇TVB 劇集餸飯成長。由小朋友時睇嘅《天地豪情》、《難兄難弟》、《美味天王》、《大鬧廣昌隆》，到大個啲睇嘅《尋秦記》、《金裝四大才子》，要數真係有排數。雖則我喺入職嘅時候已經戒咗睇電視嘅習慣，但畢竟呢份工可以接觸到自己感興趣嘅影視製作，加上好多自己嘅成長回憶同對呢份工嘅各種幻想，所以第一日返工，的確係無比興奮嘅。
懷住戰戰兢兢嘅心情，我一早就搭咗成個鐘車入將軍澳，再喺啱啱開幕嘅Popcorn轉大台架巴士入去電視城。去到搞完入職文件，HR就帶我地成班新人（當日有大約10-15人，一兩個係PA，有個好似係新聞記者，其他都係幕後/文職）上Orientation。我地成個上晝都喺間房入面，講吓防止賄賂等等題目，上完堂都已經中午。隨後，佢地安排咗我地成班去Canteen食晏，下晝準備一齊參觀電視城。不過，既然自己份工日後都會喺電視城入面行黎行去，所以我就無Join佢地個Tour，食完飯就提早上去7樓報到。
大台電視城有座主樓，未入過電視城嘅朋友可能喺《愛。回家》等節目攞黎扮外景時見過吓。呢座大樓入面，七樓係戲劇組，監製、導演、PA、統籌都係晒度（編劇都好似係？唔太記得，因為佢地係坐另一面）。我嗰個年代，戲劇組主要分兩大陣型，一邊係珍姐，一邊係Tommy。後來我走咗之後，好似有段時候又開多咗一個陣型。而家153返咗去我就更加唔知情況了。講返我嗰個年代，珍姐同Tommy兩邊旗下各有一班監製，每位監製負責一套劇。導演同PA就會喺自己陣型嘅監製度遊走，但係就唔會遊到去隔離陣型。上次提過介紹我入大台嘅朋友係珍姐嗰邊出黎，所以自然我都係入咗珍姐嗰邊，坐喺珍姐間房出面open area嘅位。望到自己個位時，第一刻係有少少錯愕。原來雖則每個PA都有自己嘅位，但我地係無每人一部電腦。如果要用電腦，只有一部機大家共用。可能你會話，咁PA一日到黑都喺廠或者外景拍嘢，又使乜用到電腦。的確，我地好多時間都出咗去拍戲，但係唔好忘記， PA一日工作嘅時數係24小時，你有16個小時出咗去拍戲，咁即係仲有8個小時喺公司做野，而且牽涉到嘅文書工作都唔少（入單入到你傻，下篇會講到），所以如果每人都有部電腦，成個系統可以電腦化，工作效率肯定好好多（唔知而家有冇，但我估無，哈哈）。
另外一樣我感到錯愕嘅，係HR拎咗一份填工時嘅表畀我。呢份表並唔係填黎睇你有冇偷懶，而係幫你計返每個月你OT 咗幾多個鐘。如果工時長得濟，長到除返你個人工之後唔過最低工資（當年好似仲未到30） ，佢地會補返水畀你。所以啲人成日話，PA人工低工時長，係千真萬確嘅事。最近見到有個POST講 Viutv嘅PA都有差唔多待遇，唉，真係好慘。
講返第一天下晝。好快就有位同我差唔多年紀，但一望就知佢好有PA經驗嘅前輩（我叫佢DD）黎帶住我。DD帶我見咗監製同導演（過兩篇先講佢地），向我解釋咗我地導演PA組喺劇入面嘅架構，令我大致明白自己係一個咩嘅位置，黎緊要對應邊個，同邊個做野（而個答案係，所有人!）。我幫手嘅係一套正常二十集電視劇，有4位導演，每位導演大致負責5集（有時監製手痕會自己拍返一兩集，e.g. 頭/尾； 而《天與地》戚其義嗰類監製仲會自己拍晒）。但因為我嗰套係一套單元劇，每個單元集數不一，所以每位導演真正導嘅集數都有啲差異。每位導演會有一個Senior PA輔助；如果有Junior PA，就會跟住Senior PA 一路做一路學野，形成一個三人小組。我地套劇當時仲係處於一個前期階段，距離正式開拍大概仲有一個月，所以唔算好辛苦，而我又可以叫做係由頭開始跟、由頭開始學。我入去嗰時，套戲嘅大綱（我地叫「天書」）出咗，主角搵晒，套劇頭十集要出有戲份嘅配角都搵晒，劇本就好似啱啱出咗頭一兩集。黎緊要做嘅就係好多籌備上嘅工作，例如試野、砌Schedule、睇景等等。
DD有好幾年PA經驗，不過有一排出咗電影圈撈，之後同我差唔多時候入返大台，所以佢都好多野要準備。成個下晝佢執住我，一路周圍走做佢嘅工作，同時順便帶我走晒各個部門認下路（大台啲路真係九曲十三彎，我覺得仲複雜過大學嘅大樓），包括美術道具、服裝間化妝間、大大小小嘅廠（無記錯我地係13廠），我諗第一日已經行咗無十個都有八個唔同嘅地點。另一方面，佢又幫我執咗一份PA嘅文件Package，包括各式各樣嘅單（下篇會詳細講有咩單，有咩用），印咗份藝員Contact List；仲有去劇本架度攞天書同（出咗嘅）劇本。所有拍緊嘅劇本都會放晒喺嗰度，我記得除咗自己拍嗰套之外，我仲攞咗本同期開拍，好多人期待嘅《衝上雲霄2》第一集劇本留念，哈哈。
第一日通常都無乜野做，再加上仲係前期階段，所以我地六點零就收工。我同DD一齊上巴士走，期間我八卦問佢，究竟TVB有冇咩藝員好難頂。佢話人人嘅經驗唔同，無一個公認嘅排行榜，不過佢自己就有三個心水，兩男一女，都係主角級嘅人馬。我見其中一個黎緊仲要合作，即刻淆淆地。
「小心啲囉」佢話。「特別同佢做野時打醒十二分精神，唔好做柒事就OK」。
結果，同佢合作我係相安無事嘅，而且感覺佢都唔算「惡頂」，可能有少少Cool而已，所以話最終都真係人夾人。
黎到呢度，大家應該都想知呢兩男一女係乜水。不過所有關於藝員負面野我就唔開名喇，尤其兩個男嘅都仲有拍劇。女嘅都唔開喇，只能說佢已經唔喺香港了。😏
下一篇應該會詳細講吓電視台PA 嘅「所有」職責。有排講，可能要分上下篇。
利申：以上都係好個人、好片面、好短暫，而且歷史久遠嘅經歷，並不代表所有PA嘅立場同經歷。
（圖片攝於n年前返工第一週）
美味天王 在 Mamma Mia －(港劇"美味天王"主題曲) - 精華區lyrics 的美食出口停車場
Mamma Mia - 無線電視劇「美味天王」主題曲
歌手：宣萱, 張可頤, 關詠荷, 秦沛, 沈殿霞, 歐陽震華
作曲：郭熾賢
填詞：陳頌紅
編曲：郭熾賢
監製：陳頌紅, 郭熾賢
好野泥架 哈哈
攞冠軍架嘛
點解咁好味架
正到痺呀
好好味呀
冇得頂呀
沈：平平淡淡日日亦都慣 想花心思於每一餐
歐：即使意興闌珊也罷 食得美味會漸覺開懷
關：無謂日日夜夜感嘆 幾多哀傷暫時忘了吧
秦：天天也有甜酸苦辣
宣、張：如若有你氹下我 我會看到最美的星晚
垂涎欲滴令人動心 MA-MA-MA-MA-MIA
勾起一些感覺 MA-MA-MA-MA-MIA
甜甜蜜蜜在乎內心 試過試過這美味 整整一生都會牽掛
平平淡淡亦唔係差 MA-MA-MA-MA-MIA
煮出將心傾注 MA-MA-MA-MA-MIA
能用食物燃亮內心 暖暖那份愛 彼此的心始終不會分隔
嘩 乜咁啱嘅 一齊飲茶啦
老婆 今晚有咩湯飲呀
媽媽 記得煮埋我飯呀
唔該一碟咖哩炒飯 加孖潤腸 加多三塊餐肉
加多少少薑蓉伴伴碟呀老細
唔該
--
what won't kill you makes you stronger..
--
※ 發信站: 批踢踢實業坊(ptt.cc)
◆ From: 59.121.145.108
... <看更多>