到底一個人要有幾寂寞，至會同一個陌生人分享佢响四十年前有幾風光？
星期六放假，我同cmo仲有牛仔、熊仔參加左一個關注長者團體既派餅活動，向住响葵青區一帶屋邨既長者，派發年糕同糖果。其中一位伯伯俾我既印象好深刻。根據社工既資料，呢位伯伯既性格比較內斂，唔喜歡同人講野。所以社工叫我地要有心理準備，如果打唔開話匣子既話，惟有睇下iPad，做下十巧手算。
但事實原來唔係咁。我地入到屋無耐，伯伯就响銀包拎左張卡黎。起初我以為係長者卡之類啦，原來唔係，係一張已經發晒黃既工廠職員證，上面有一張三十零歲後生仔既相。個伯伯話，果份係佢响四十年前從東莞落到黎香港之後既第一份工。跟住果二十分鐘，佢就如數家珍咁將佢呢幾十年黎既工作經驗娓娓道來。
伯伯話佢最風光既時候，係响舊啟德機場既餐廳度工作。當時既佢連同埋另外既五個人，負責買料、煮飯、洗碗……佢仲好詳細咁話我地知，佢點幫隻牛拆骨，然後將副無用既牛骨搬上車度。佢仲話當時既同事同佢講渦，話無左佢都唔知點算，無人夠力搬副骨。一路講，我睇到佢既臉上流露出對昔日既嚮往同驕傲。
本來一位幾健談既伯伯，卻因為病痛而引致高血壓，下半身癱瘓，靠住張推得郁既圓凳黎接送我地。依家既佢，莫講話同朋友吹水同打麻雀，就連落街行步路都成問題，只能靠社工每星期幫佢買一次餸。無人同佢傾計，佢就惟有屈响呢個打開門行兩步就到床既單位入面。佢惟一既娛樂，就係果部播緊粵曲既卡式機。
我之所以帶埋兩個仔黎，原意係為左俾佢地親身感受一下基層長者既真實生活，令佢地明白到幸福唔係必然。意外地，佢兩個竟然成為左幾位公公婆婆既寵兒，响探訪期間負責表演，氹得公公婆婆都好開心。老友記好簡單架乍，佢地想要既唔係禮物，而係想見下面、傾下偈。新年喇，多啲向阿爸阿媽表達你既愛。
註：網上偷圖，無影伯伯
