【Bling Empire 與 Gossip Girl】
噚晚一口氣睇晒Netflix套真人show《璀璨帝國》（Bling Empire），打住真人版《我的超豪男友》（Crazy Rich Asian）旗號，講一班喺LA比華利山嘅亞裔富X代奢華生活，半個鐘左右一集，三四個鐘就睇晒。
其中一個最多人討厭，叫Christine嘅台裔名媛話佢老公係宋朝皇室第24代血脈，如果而家中國仲有帝制嘅話（其實又真係有），佢老爺就係皇帝，佢老公就係皇位繼承人（咁係咪叫富24代）。
雖然聽起上嚟好好笑，但係細心諗下就知道Christine活得幾小心翼翼，一般人可能會口快快話「我老公就係皇帝」，但佢係先話老爺係皇帝，然後話老公係繼承人。睇埋落去先知道，原來Christine嫁入豪門後一直努力都生唔到小朋友，而夫家嘅人經常強調留香火係做老婆嘅本份，慢慢喺家庭聚會上唔單止將佢調去小朋友嗰檯坐，仲叫佢幫手洗碗，試咗好多年先用人工授孕終於成功傳宗接代，叫做可以喺夫家面前抬起頭做人。
所謂一入侯門深似海，就算Christine喺節目中講咗幾多看似無腦嘅炫富豪言，其實講到真正重要嘅事，佢比所有觀眾都更謹慎。
節目其他主角都好有爆點，家族唔係賣軍火就係經營石油房地產生意，總之個個都身家上億，除咗一個叫Kevin嘅韓裔大隻靚仔model。
Kevin係成個節目嘅靈魂人物，節目一開始就已經用佢把聲做narration，從佢作為一個混跡喺富豪朋友圈中嘅窮人視角出發，以一個outsider嘅角度，去睇呢班crazy rich asian。
Kevin令我諗起Gossip Girl入面嘅Dan，因為Dan係劇入面都係一個夾喺Upper East Side上流社會嘅窮小子，佢就曾經將佢班貴族高中同學嘅秘聞寫成一本叫Inside嘅書出版。Kevin同Dan都係以outsider嘅眼光，一邊有啲不屑呢班有錢人揮霍糜爛嘅生活，一邊又好嚮往可以擠入佢哋嘅inside circle。
另一方面，據講節目播出後有人起底，發現Kevin真身並唔係節目所講嘅窮人，而係身家過千萬嘅有錢仔；而喺Gossip Girl結局，原來Dan居然就係gossip girl本尊（唔好怪我劇透，套劇都播完差唔多十年了），觀眾一樣係俾呢兩個故事嘅敍述者玩到氹氹轉。
節目仲有好多笑點，例如班有錢人搵咗個薩滿（可以簡單理解為巫師）嚟療癒情傷，大家喺沙灘圍住個火堆好認真聽佢又唸咒又感應咁，本身我都諗住睇下薩滿會講啲咩靈性說話，點知薩滿突然合埋眼話：「精靈幫我download佢嘅file去我個作業系統。」我大笑到懷疑隔籬屋都聽到。
總括嚟講，Bling Empire都係一個幾有娛樂性嘅消閒節目，但講到真人show究竟有幾真，其實由我哋撳個play掣嗰刻已經唔需要再問，大家都係想要片刻娛樂而已。
＝＝＝＝＝＝＝＝＝＝＝＝＝
新開Patreon有獨家小說連載及雜文，三本已出版小說足本重溫：
https://www.patreon.com/chanfan
MeWe：https://mewe.com/p/chanfanwriting
IG：https://www.instagram.com/annoyingchan
FB： 陳煩
