來自星星的猩猩（下）
上集：http://bit.do/fs6Jh
好多國家都感受到我國嘅威脅，紛紛幫助A國，攻擊我國。
但防護罩嘅功能非常強大，除咗核武之外，好多高科技武器都可以抵擋，無為我國造成太大傷害。
我國反擊，同時用某啲外星武器，換取同盟國嘅支持......第三次世界大戰正式開始。
擁有絕對防禦嘅我哋，本來應該立於不敗之地，
但無幾耐，C國嘅新型核彈，攻破咗我哋一個城市嘅防護罩，直接摧毀該城市。
舉國震驚，之前話，呢種防護罩最少比地球現有科技超前五十年，點解會被攻破？
據講，嗰隻新型核彈，可能比現有科技超前一百年，C國無理由做到！
我哋即刻去搵猩猩，問佢防護罩會失效。
猩猩睇一睇新型核彈嘅情況，即刻疾筆奮書，寫低更強嘅防護罩研製方法，保證可以防到新型核彈。
最強之矛攻最強之盾？我忍唔住問：「咁如果C國再研製出更更強嘅核彈呢？」
猩猩好嬲，喺紙上寫：「無可能，馬騮仔一向都唔夠我叻，佢唔會贏到我㗎。」
「邊個係馬騮仔？」我唔係好明
「朋友、對手。」猩猩答得簡潔。
外星猩猩嘅朋友，即係另一隻外星生物？
C國可以研製出咁強勁嘅核彈，背後果然有外星生物嘅幫助。
但問題係，猩猩點知道C國有佢朋友馬騮仔嘅幫助？
我接二連三咁問，猩猩就講出真相。
原來，猩猩所在嘅星球，科技水平非常高。
而猩猩同馬騮仔都鍾意研究武器，就聚埋一班朋友，一齊討論交流。
佢哋個個都覺得自己研發嘅武器更犀利，但係武器嘅殺傷力太大，外星政府根本唔容許佢哋進行大型比併。
所以，佢哋決定去其他星球搞Battle，大家分別去唔同國家，提供武器資料。
國家武裝實力增強，自然想謀取更多利益，戰爭就會挑起，佢哋就可以實驗邊個研發嘅武器係最強大。
猩猩同馬騮仔嚟咗地球，猩猩話，之後可能會有更多「參賽者」加入地球嘅大戰，
當然係加入其他國家，根據佢哋嘅比賽規則，每個國家只可以有一個參賽者。
我勃然大怒，佢哋居然為咗意氣之爭，害死千萬地球人。
我咬牙切齒：「你點解會講出嚟？你依加仲喺我哋手上，你以為地球人唔會殺你？」
我將佢寫嘅嘢全部上報，申請處決呢隻邪惡嘅猩猩。
申請迅速被駁回，政府仲派咗更多保鏢，專責保護猩猩嘅安全。
而且，猩猩嘅需求，只要係我國能力範圍內嘅，都要滿足。
「聽講地球啲雪茄唔錯，我仲想食雪茄。」
「黑超都幾型喎，整副畀我戴。」
「近來壓力太大，我需要刺激。我想要女......唔係女人，係女猩猩。」
因為，第三次世界大戰已經展開，血與火嘅仇恨，唔係講一句「唔打啦」就可以了事。
如果無咗猩猩，無佢提供更強大嘅武器科技，而其他國家有外星生物作為後盾，可以想像，我哋國家會一敗塗地。
於是，呢隻猩猩好逍遙咁攬住雌性猩猩、戴住黑超、食住雪茄，
一路指導我哋研發武器，一路睇住峰火連天嘅畫面，感慨武器嘅強大。
我唔知道，佢哋呢場Battle幾時會完，亦唔知地球會為呢場Battle死幾多人。
但我有時會諗，點解一開始，大家會相信「兩隻香蕉可以換到核武器護罩」？
因為猩猩生得似地球嘅猩猩，表現得呆呆傻傻，我哋以為人哋蠢，以為有便宜可佔。
殊不知，世上其實無咁多「著數」。
所有命運嘅禮物，都一定有價格，不過有啲禮物明碼實價，有啲係分期付款；
仲有啲禮物係「先到貨後付款」，你以為唔駛錢，往往利息最高昂。
－完－
將專頁設定為「搶先看」/ "See first"，最新故仔馬上睇！
新書《寓言地府動物園》已經出版了，現正發售中，
詳情可點擊這裡：http://bit.do/e37JG
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #來自星星的猩猩
第 三次世界大戰 同盟國 在 [問卦] 第三次世界大戰??!! 同盟國與軸心國? - 看板Gossiping 的美食出口停車場