Master cleansing
注意，我唔係用最100%方法亦建議大家考量自己身體狀況及做足資料收集然後量力而為。
其實已經久聞呢個方法好耐，但餵食嘅我加好容易低血糖嘅我，覺得冇可能可以7日淨係飲楓糖漿加檸檬！（我喺呢7日的確有偷食過三隻無花果一條菜同大約150g乾果）。
成效方面，我瘦咗2.45kg ,其中1.3kg係脂肪。第二日同第五日跌得最多，其他日子都係緩慢下降。大家知脂肪係幾難減，所以我都幾滿意。
今次嘅斷食其實唔係為咗減肥，而係早前都提過身體出現一啲常見小毛病，希望可以借此排走一啲身體嘅毒素廢物。（不過呢個未經科學直接確認有效，但好多人都話得），而且副作用係長期肚餓（但其實唔係真係咁餓）同埋體重喺之後好有機會反彈，所以純為減肥呢個未必係最好嘅手段。
我唔喺呢度詳細講master cleansing 嘅各個科學根據，大家可以去買書或者上網搵一啲文獻，但我可以同大家講下我準備嘅材料同用具。
第一步：每日起身用兩小匙無加碘礦物鹽落1L 暖水，空肚服用。一個小時內會去廁所排便好幾次。我係第一日比較洶湧，第三日已經冇咩「料」，所以之後第四同第六日就skip 咗。
第二步：每日180ml 鮮搾檸檬汁 +180ml B grade 天然楓糖漿 +半匙cayenne pepper 粉 配2L水。我用咗另外一種辣椒粉paprika 代替，無異樣。然後呢7日就肚餓嘅時候飲，唔飲帶咖啡因飲品。
我本來以為會長期好肚餓，但其實係夜晚7、8點左右比較肚餓，其他時間都精力滿滿，而且心情很好，11點就眼瞓，可以連瞓八個鐘！呢個係最好嘅得著因為我平時瞓得好差。去到第七晚我瞓唔著，因為全晚幻想第日嘅早餐。
而喺呢七日我有做三日瑜珈，每次半個鐘，有一日做咗100個squat ,一日彩排、一日錄音到凌晨。係熬夜嘅嗰日真係攰啲，其他都好好，完全冇低血糖過。
另外，復食之後我胃口起碼細咗一半！
最後強調，量力而為，同埋記得做資料搜集！
報告完畢。
