https://www.patreon.com/posts/jing-li-shi-nian-53799243
十年前左右因為比「戰國鬼才傳」呢個名吸引咗，再加上山田芳裕一直係我非常鍾意嘅漫畫家，一口氣買咗十本番屋企，點知番去一睇係極之失望──
原先我期待嘅「鬼才」應該係好似竹中半兵衛或者黑田官兵衛呢啲戰國時代嘅軍師大發神威嘅故事，點知主角竟然係響戰場上面毫不起眼嘅古田織部；然後響漫畫入面其實並無特別詳細描述戰爭過程，甚至刻意跳過一啲戰爭事件，只係一味用誇張嘅表現手法強調主角古田織部點樣熱切追求茶道。
由於期望有落差（戰爭漫畫變咗茶道漫畫），加上對古田織部果種寧取雅士之道不取武將功名嘅諗法完全搭唔上線，所以好快就放棄咗無再追落去。
然而相隔差不多十年後，睇多咗少少村田珠光同千利休嘅背景資料，了解多咗「わび茶」嘅含義，再重新執番起呢套書黎睇，先慢慢感受到呢套作品嘅韻味。
相比起用大家更熟悉嘅千利休做主角，古田織部所橫跨嘅時代更闊，而且山田芳裕特別突顯主角嘅貪婪同喜好奢華嘅本質，黎突顯千利休對「寂靜之美」嘅堅持；雖然千利休同秀吉合謀暗殺信長以保住佢心目中嘅美學的確有啲誇張，但從佢「收伏」古田織部嘅過程，再逐步舖排佢同秀吉美學追求出現根本性嘅矛盾，最終促使被下令切腹收場──呢種夾雜爆笑同哀愁、茶道美學同爭奪天下嘅矛盾寫法，我都真係要花差唔多十年時間先慢慢領略得倒佢嘅吸引力。
之但係一口氣追到14期最新中文單行本，先發現原來因為銷量不坐，往後嘅單行本已再無出版，結果又同其他好多冷門漫畫一樣，被迫Download埋剩番嘅期數先可以睇到結局──第14期講到關原之戰啱啱開始，要去到25期先真正講到大阪冬之陣古田切腹收場，然後仲有39集動畫未睇……仲有漫漫長路。
竹中半兵衛 在 Re: [閒聊] 竹中半兵衛Vs.黑田官兵衛，誰比較強？ - 看板C_Chat 的美食出口停車場