《上捉上下捉下有隔牆冇穿針有何冇V冇自解》
我相信如果有玩過『何仔公』嘅人都對於上述呢句口訣應該好熟悉。不過我到呢家都唔係百分百肯定呢句口訣係點解。
由於以前網絡未發展，好多童年集體遊戲都係靠「口傳」去傳遞開去，從而令到當中玩法同口訣出現咗好多版本。
"上捉下、下捉下 "
我大概記得係如果我企喺上一級樓梯、而對方喺下一級樓梯，咁對方就會捉唔到我，佢一定要同我企喺同一水平線先捉到我。
" 有隔牆冇穿針 "
意思係有道牆擋住你，對方就算伸隻手過去捉到都唔計。
" 有何 "
姐係當對方就快掂到我時，我即刻雙手交叉碰心口大叫:「何!」，咁對方就捉唔到我，同時間我都唔可以移動，直到有人"解"我。
" 無V "
我唔係好記得，好似係暫停意思，方便大家老母叫你返屋企食飯時候，比你同老母講玩多幾鋪或者比你離開玩嘅範圍一陣方便你綁鞋帶/飲水(通常有次數限制)
" 無自解"
呢個好白痴，「何」咗之後理應要人『解』先可以行，但如果大叫:「自解」，咁你又可以繼續玩。呢個太屈機，玩死捉嗰個人，所以講明無自解。
以前香港好神奇，明明好多細路無智能電話、無電腦、無上網都可以靠「口傳」而令到全港細路都識得玩嘅集體遊戲。
呢家公園再無細路去玩，但以前公園係我地細路嘅神聖地方，亦都係我地嘅戰場。
看似簡單嘅遊戲，但係非常刺激! 次次玩都有人玩到流血同仆街，所以我地成日玩到成身傷哂或臭汗返屋企，之後比阿媽打到仆街。
不過我地都唔會理，每次放學都會唔返屋企，走去公園睇下有冇人玩，就算對方係唔識，我地都會行埋去問一句:「玩緊咩呀? 滲埋喇!」
之後對方都會歡迎我地加入，話明集體遊戲，梗係愈多人愈好玩。 玩完後，大家又各自各返屋企食飯，最後連對方咩名都唔會問，就好似君子之交淡如水咁。
何仔公最刺激之處除咗你要變跑手狂奔避哂對方捉你之外，仲有當你或隊友『何』咗之後，你想救人但又要顧住自己嗰種刺激感覺。
另外都講下 『幫捉』
簡單啲講，就係一個人捉人，當捉到A時，A就要幫手捉埋其他人，如此類堆。
遊戲最刺激之處就係你唔會知對方係咪已經比人捉咗，大家都唔信大家，當見到大家時都會用懷疑眼神望住大家
然後一齊問:「你比人捉咗未?」
其中一個人就會笑笑口話:「梗係未啦......」當對方放低介心後，而你就即刻跑向對方到大叫:「未就奇啦!!」
之後又一場緊張刺激追逐戰......諗起都好玩。
電腦網絡遊戲世界係好玩，但對比以前集體遊戲
我都係鐘意後者
起碼我地係Face to Face 互相交流，互相合作，一齊過癮，一齊流汗，一齊奔跑，同埋一齊燃燒青春。
除咗何公仔、幫捉、捉E因、仲有好多好多好多口傳集體遊戲，你地又記得幾多?
有隻Game叫 啪啪啪啪
姐係手掌拍手掌果隻 啪啪啪...
好似有招式，咩火山爆發、五雷轟頂.....
好懷念以前可以好天真好傻咁 成日主動叫女仔同我玩啪啪啪啪
如今聽見可以同女仔啪啪啪，我就會諗咗其他野了。
真係諗起都好玩 嗚呀
童年集體遊戲 在 昔日香港- 童年必玩集體遊戲- 掉手巾| Facebook 的美食出口停車場
童年 必玩集體遊戲- 掉手巾. ... 以前嘅遊戲簡單開心， 而家要再玩都會係掉紙巾， 但都唔會有小朋友有興趣玩囉！ 7 yrs Report. Jacqueline So, profile picture. ... <看更多>