就咁睇《寒戰2》其實不及《寒戰1》，但如果將某個角色Twist一Twist，成個觀感就會唔同哂。
早排《十年》奪金像獎最佳電影爭論，其中一個最鍾意比人拎黎講嘅就係「挑，《寒戰》夠拎倒最佳電影啦」。老實，雖然《寒戰》講乜我已唔係好記得，印象中套戲響營造氣氛方面係做得非常之好，當然印象中有啲位警匪兩邊都犯埋啲TVB級數的錯誤，但至少都係一套完整嘅電影，播完無耐都引起好多人討論，唔明點解幾年之後就變成「最差嘅最佳電影」。
今次套《寒戰2》同樣有好多人話係垃圾，令我對套戲嘅期望低咗好多，亦因為咁，睇完之後感覺又唔係咁差，比我講，會話係差過《寒戰》，但又唔係爭好多，大概係《竊聽風雲3》嘅水平。
拎《竊聽風雲3》黎比，除左係水平差不多，亦都係兩者同樣都間接拎咗啲香港政治元素黎玩：講到成個陷害郭富城嘅計劃，原來係為咗幫律政司打擊另外一個同樣想參選嘅保安局局長馬房嘅人；呢個佈局好明顯就係想香港觀眾代入一下黎緊嘅特首選舉，順帶又討論一下「程序公義」、同埋立法司法制度成為剷除異己嘅問題。不過我諗真正能夠代入呢種「本土」設定嘅觀眾其實唔多，主要嘅原因係而家警隊嘅形象實在太差，我地真係好難接受倒一個窒惡如仇嘅一哥；至於特首選舉雖然現實都有攻擊政敵，但係我地心目中果啲司長局長全部都係唯唯諾諾嘅角色，亦好難相信佢地夠膽響中共一片唯穩風氣嘅情況下，搞單咁大壇嘅大龍鳳出黎只係為咗間接打擊對手。
雖然所謂「本土」劇情頗為離地，但Overall黎講都算ok，有人話佢啲角色灰色調精細大頭會令人眼睛疲勞，但其實我又唔係好覺，反而用咁嘅拍法拍到人人個樣都同平時唔同，幾有新鮮感。至於演技方面，都係貫徹番上一集成班人「ARAR咋咋」、你睥我我睥你果隻大頭對峙局面，但感覺上無上一集造作，明顯導演功力係進步咗；不過啲對白就真係犯上港產片好常見嘅問題，寫得太矯揉造作兼畫公仔畫出腸，好似TVB咁當觀眾白痴，樣樣都要100%解釋清楚點解佢要做呢樣果樣。
當然上集問題嚴重嘅犯駁問題響呢一集亦都繼續出現。李子雄搵養唔熟嘅周潤發入PNP我都可以解釋成「低估咗呢條友」、郭富城架車有避彈衣亦可以解做「我係一哥鍾意點就點」；但係蔣志光咁比郭富城過咗棟竟然可以完全無跟進？梁家輝又蒙面又盛先入倒去個廢車場，要攬仔竟然唔響廢車場攬，特登番去公眾地方攬，就係搏比人影相？搞咁X多嘢原來一架航拍機搞掂，咁最初警察出咁多部車跟乜撚嘢蹤？但唔好講港產片，其實西片要寫到劇情完全唔犯駁其實都好困難，奸角弱智級犯錯咁多年已睇到麻目，只係《寒戰2》果種弱智法，係比Average水平再低少少而已。
但點都好，有一樣嘢《寒戰2》係令我非常鍾意，不得不特別加分的：就係張國柱呢個角色。我地不妨撇除佢台灣籍同戲入面前警務處處長嘅身份，而將呢個講國語（然後夾硬配廣東話）嘅角色當成中聯辦啲人，成套戲就會合理超多：有咩人膽大包天搞亂香港，甚至連警務處長嘅任命都要控制埋咁目無皇法？邊個咁夠把炮講到自己可以安排哂成個特區新班子人馬？邊個可以犯法兼搞到天翻地覆之後，竟然可以監都唔駛坐直接獲得「有條件特赦」，然後仲夠薑同一哥講「你玩唔起？」除咗班中共、中聯辦講普通話班狗官，仲有邊個名做倒？如果咁解讀，《寒戰2》，真係貼地過《十年》。
竊聽風雲2國語 在 竊聽風雲2（國語）Overheard 2_PV - YouTube 的美食出口停車場
Comments · The White Storm · 竊聽風雲2，爛話！！！ · 窃听风云2：三大影帝近十年最好看的懸疑片，一個眼神就是一個陰謀佈局，誰才是最後的大贏家 · 竊聽 ... ... <看更多>