【龔成問答信箱】（Q14181-Q14200）
Q14181：
你好，龔SIR。留意左你FB一陣，覺得你比左好多正面信息來自五湖四海既朋友，令佢地搵番自己條路。
我希望你都可以比到少少意見我，因為我覺得自己都仲係一隻迷途既羊，想你指點一下迷津，令我係工作方面搵到條岩既路。
等我介紹下我自己先，我今年28歲，一位英國讀完書番黎既碩士生。 讀完書，係銀行做BACK OFFICE，都轉過2份工，都係BACK OFFICE相關既工，做過SETTLEMENT 同 CUSTODY 。
但愈做得耐， 就覺得呢D工好似死胡同，好難有D大突破，因為身邊D同事都由後生做到老，另外一方面都怕有一日會比OUTSOURCE 同比電腦取代。
都曾經想去另外一D銀行既FIELD 如AML 或 RISK相關既工，但發覺好似完全無機會咁，因為好少請一個年齡大既人從頭學(不如請FRESH GRADE)。所以對自己將來有點迷失，想請教下你意見。
龔成老師：
你的情況都幾普及，我自己都做左多年銀行，而唔少同學都是做銀行的，大家都面對同一個問題，銀行工穩定，但突破唔易。
你可以行三條路睇下你自己點配合。
第一，以銀行、金融作為重點、終身職業，但就要突破，你要每半年至一年左右，跳去另一部門，甚至久不久轉工，同時，你要表現到工作勤力，主動，希望有升職的機會，亦要想想如何可以更進一步，甚至長遠打入管理層，條路應該係點，你要步署。
第二，你只要視銀行為一個穩定職業，是輔助你的過程，你要努力儲錢，同時，要發展其他事業，例如小生意，網上買賣，利用突閒時間去做。我當年都是這樣，一邊做銀行，盡力儲錢，同時寫書，由我開始起手寫書寫第一個字，到有似樣的收入，足足用了5年。
但銀行工就是一個好好的地方，比我儲錢，同時用空閒時間去發展其他事業，當時我不求升職，只想穩定，等我可以好好發展其他野。
第三，你同樣視銀行工為穩定職業，努力儲蓄，同時你要盡力學投資，將錢滾大，利用星期六日時間，好好學投資，研究股票，每星期睇一份年報。
甚至，你轉去一些分析企業的部分，令你可以提升投資實力，在投資上提高回報。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14182：
龔老師您好，想問下您點睇1883？長期持有做收息股可以嗎？現價值得入嗎？謝謝
龔成老師：
中信國際電訊（1883）業務穩定，整體質素算是不差，過往股價的波動亦不大。佢近年的生意都保持穩定，盈利亦是一樣，相信市場結構令佢處於一個穩定賺錢的狀態，不過，增長力就不強。
盈利就穩定並平穩增長，但始終生意無上升，點都會有扣分的地方。
相信佢能平穩發展，收息可以，但就不要對股價有太大期望。現價值得入。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14183：
老師你好，留意了老師page有半年時間，參考了老師的策略: 在便宜區買入，在貴的水平賣出。但當股價升到貴的水平時賣出，回報卻難以倍數增加。
例如1177 7元是合理區，10元開始貴，之前曾升到12元，已在貴的水平，但回報只有70%，請問如何去平衡回報與賣出時機？謝謝老師。
龔成老師：
我地投資，一定是長線的。
你首先要理解，我地所講的平貴概念，這其實是比較「價格」與「價值」，當價格比價值高時，就是貴，反之就是平。
例如，企業價值現時為$100億，而市值只是$50億，這就是平宜。
優質企業、有潛力的企業，業務會長期向上，這就會帶動企業價值長遠向上，而這才是真正的回報，例如當企業價值由$100億增至$500億時，股價中短期會上上落落，但長期都會回歸價值，因此，長期的市值，都會由$50億增至$500億，這就是長線投資的回報。
順帶一題，70%回報已經是一個很好的回報，因為我地要做的，是長期保持一定的回報。就長期來說，全球投資回報最高的，為巴菲特，回報為20%，因此，只要你「保持每年」都有15%以上的回報，其實已好好。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14184：
Hi 龔sir,小弟而家26歲計埋bonus每個月有大約62k 大約可以拎42k做月供
我目標係三層樓或者每十萬被動就退休
暫時我既分配係
HK 0003 10000
HK 2800 10000
US VOO 12000
每月定存 10000
定存果筆可能拎黎價低入貨/做首期買樓
上面三種stock/etf都會長期月供 十年以上，想問港股仲洗唔洗再分散少少，但我唔係好揀到落手，如果要轉比較傾向美股etf.Thanks
龔成老師：
如果你的大方向，是長遠有3層物業，你可以每隔5-8年左右買一層樓，視乎你自身的情況，以及樓市情況，《財務自由行》有講具體的方法，你可以參考下。
你可以利用股票平衡的方法去進行。
上述你的月供策略，不差的，基本上無問題，可以進行，但煤氣（0003）是單一股票，你唔應該太過集中，建議你煤氣只供$5000，餘下$5000供另一隻股，例如金沙（1928）、長建（1038）、中銀（2388）、港鐵（0066）、恆基（0012）、港交所（0388），你可以選擇。
如果無心水，就加到美股基金及盈富（2800）。
基本上，你保持進行月供，先利用股票滾大財富，到了一定的數目，以及樓市合適時機，就可以投資物業收租。同時，再繼續以月供股票，保持財富的增長，兩者並行去做。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14185：
龔成老師你好，看了你《八十後百萬富翁》及《二百萬富翁》，覺得我跟你的目標有點相似，你的經歷也給我更大信心。
我二十三歲，月薪15.5k, 另加part time 4.5k。
~10k現金，45k股票，25k高收益債券基金，30k定期存款。
支出方面，每月家用5k, 十年儲蓄保險每月供~1.6k，個人消費2-3k，嚟緊開始月供823領展 2k。每個月儲8k-10k。
我個人的理財目標是28歲儲到一百萬（資產連現金），想問一下老師我現在的資產配置方向正確嗎？若果想加快資產增值，老師有甚麼看法呢？
謝謝～
個人沒有負債，家中財政穩健，不用交租
龔成老師：
債券基金，有危有機，唔好只貪高息，因為我久不久都收到個案，指債券基金出現賺息蝕價的情況，小心。
同時，我地只會視這類基金為「產品」，而不是真資產，如果你投資物業、車位、優質股，才會視為「真資產」。我地如果想長財富有真正的累積，就應該集中投資真資產。
如果你想5年累積到$100萬，就要好好利用每月儲到的資金，首先，你要堅持每月儲到$10000。
另外，你要投資有增長力的資產項，平穩增值股、潛力股都是選股範圍。
你可以將其中$5000做月供股票，盈富（2800）加潛力股，至於餘下每月儲到的現金，就等機會作投資之用。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14186：
老師，你好，我剛剛轉新工，人工比之前多了1萬有多，流動現金十萬，2年後同家人離港。
去到外地應該頭幾年都唔會工作，想現在開始學投資，用賺到嘅錢當日後每月生活費。
比以前多出來嘅人工，想請教應該點投資？我心想是月供平穩增值投票，例如：地鐵、盈富、港交所、領展這類型，以你的建議，我應該分散投資每款投票月供$1000，還是一手一手買入？
十萬流動現金可以點去投資增值？
同埋我遲d會上你堂。
多謝指教
龔成老師：
如果你之後有一段時間會唔做野，現時你應該盡力去儲多少少錢，令儲備更多，同時，由於你這些資金，2年後可能已有用，在投資上，這不是一個長年期，因此，投資方面不能進取，（因為潛力企業要較長時間先能夠增值）。所以，你應該以平穩增值類為組合的核心。
由於你投資的年期可能只有2年，如果你做月供，可能會供得好少股數，因此，以一手手的模式投資是較好的，上述都是有質素的股，可以投資。
現時的$10萬現金，可以動用其中$5萬，餘下留現金，不過，如果你打算上堂，這部分不如等上左堂先，你會更明白動用多少，以及點配置。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14187：
龔sir, 941我是$64 入的
屢創新低
龔成老師：
中移動（0941）的確是有點弱，但本質不算差，這是大前題。我相信致策上，中短期你仍會見到佢比較弱，但其實，你的買入價合理，唔需要太擔心。
始終我地買股票，原理就是投資在企業，耐心等企業發展，唔需要太著重中短期股價。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14188：
老師，我想問下1830必瘦站，集團從2018年開始，未來增加的動力來源於無創美容， 2019年比2018年的營業額增加約一倍，集團主要賺錢是來自香港，其次內地亦有店舖開設，現時主要集中在內地的一線城市，但規模未夠香港的大。
好在未來2019年之後會擴充一線城市的規模，進而擴展到國內的二線城市，今年集團宣布中期不派息，反映公司未來發展需要資金並且想不斷擴充規模。
在香港方面主席在報告中提及會擴充香港不同地區的分店，而公司主要店舖集中在寫字樓及商場內，而近期的社會運動令租金下調。
公司有意擴充，可以控制較好的租金成本，而公司盈利能力相當高，毛利率有90%以上，公司現金流充足，財務健康，這是公司的優勢。
公司亦存在一些不確定因素，例如未來新開設的店舖中會否收到近期社會運動的影響而降低收入，將會是一個未知之數，而且美容行業會受到政府監管。
如出現一些健康問題的事故，會影響企業的發展而且美容行業會受到政府監管，如出現一些健康問題的事故，會影響企業的發展，故此我小注入了一手
龔成老師：
其實你分析方向正確。
必瘦站（1830）有質素，我自己都會給予佢正面的評價，長遠有增長力。
比較特別的是，佢過往用高派息政派，到今年又完全唔派息，雖然我明白佢睇好市場，但反映企業管治方面唔夠強。
另外，如果你找翻一些早幾年的資料，「必瘦站」曾受一些事件而影響了品牌，這都是扣分的地方。
當然，我認為佢整體上，仍是有質素，加上產品有潛力，現價唔貴，有投資價值率，只要不太太大就無問題。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14189：
老師，現時我31歲 月入35k 加埋part time，大約一個月應該有4萬幾至5萬收入 depends 有無客
然後扣埋供樓保險洗費應該都仲儲到$10000-15000
另外有現金十幾萬 再有保險定期廿幾萬 兩年後可以拎
我儲錢能力係咪好差
其實我呢排無特別買咩股票 因為之前蝕晒d錢已經無哂心機
不過我有keep住睇你d post 所以打算做月供股票 $2000 盈富 $2000 HSBC 你覺得ok ma? (唔想供太多住因為想留番d錢買樓) 定係你覺得可以再儲多d？
咁我下年有諗過按左層樓再買多一層收租/買的士收租....
我地層樓買入大概530萬 而家升到大概770萬 咁我地仲爭銀行3百幾萬
而我地打算套現100萬 你對呢part有咩意見？的士定舊樓好？
感謝你既回覆！
已報左名你的股票班，你同事未覆，希望股票班上見到你呀！
龔成老師：
你月入$4萬、$5萬，儲到$15000，以一般人來說，不算差，但你31歲，仍是一個黃金儲錢財富增值的時期（因為負擔仍未算多），我會鼓勵你，逼自己儲$2萬以上，對你長遠會有好大影響。
你可以保持月供股票，這是一個很好的累積財富方法，盈富（2800）是好適合的投資，你可以長期月供。匯豐（0005）雖然都有質素，但增長力不強，只是收息股，未必最適合你投資。
至於你下年加按計劃，有利有弊，因為加按會增加了風險，但如果你明白這風險，都可以。但在時機上，就中等（但都可以進行，只是並非最好時機）。香港樓少少貴，的士牌合理，但增長力不強。
香港經濟會轉弱，樓價會受壓（可能會跌少少，但未必太多，如果能捉到這機會，相信都可以投資）。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14190：
龔成你好 ! 有個問題想問問...我前排係13.18個價入左一手吉利(0175)
之後佢都一路繼續升冇跌返落13, 但我其實仲想入多DD, 應唔應該等佢跌返落13先入呢? 謝謝你 !
龔成老師：
吉利（0175）有質素，這股有長遠增長的能力，現價雖然升左D，但仍合理。
至於加注與否，要睇你本身持貨多唔多，從平貴上是無問題的，如果你貨不太多，現價加小注可以，但入左入，唔好再加，要等佢跌到$13以下先加。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14191：
你好，本人於2014年用4百幾萬買入九龍一個私人屋苑高層優質單位330呎自用，2016年用轉按方法套現再用170萬買入同屋苑既車位。
但2018年因為有小朋友2歲幾加工人姐姐，唔夠地方用，考慮到升學，面積，家人等問題，把心一橫，2018年賣哂單位同車位。
轉去炮台山880萬（5成按）買入1個680呎四十幾年既舊樓低層單位，當時有考慮租上租，但所收租金又要計稅，感覺雙蝕，但現在發覺投資錯誤
新單位唔會升值，只會隨樓齡繼續下跌，現時已下跌10%（同社會，經濟都有啲關係），但相反舊單位同車位反而各升5-20%，雖然有居住需要。
但我現時無辦法再用轉按套現既方法再投資，物業又不斷貶值，由於社會問題，亦唔打算再生小朋友（原來打算生多個所以買大啲）現時我應該點準備好呢？
因為只係3人家庭，現單位反而浪費，等3年賣樓換細位？
除自住單位，我希望將來可以買入1個類似第一城細位收租，再加2車位（1自用，1放租），現時我地家庭2人收入7萬左右，1個3歲幾小朋友，扣除所有開支，每月只有11000左右儲蓄，想問問你意見
龔成老師：
炮台山始終是不差的地點，你不用太擔心，當然，太舊的樓，的確有貶值的問題，因為維修等因素，會令佢價值會較弱。
整體上，我相信你現時單位的質素中等，至於你話貶值，是否從銀行的估價上得知？銀行估價有個特點，樓齡大，以及低層，佢會估少d，高層會估多d，佢好多都只是程式化去估。例如你的單位，真實價值可能比銀價估價為高。
另一個考慮因素，是維修等問題，你層樓40年，維修等的情況如果不算差，那其實不用擔心，以美孚新邨來說，其實樓齡都大，但無問題。
所以，要睇翻你具體的維修保養情況，如果有問題，你可以在過幾年後轉其他物業，如果問題不大，暫時持有住先都得。
因為這物業在炮台山，就算是舊樓，放租都有一定的價值，因此有投資價值的。
你這刻先保持儲蓄，過幾年睇情況先決定點投資，唔需要太急進去進行，要一步步行。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14192：
請問收息股離講中國銀行3988算好？
我見大陸A股價位比佢高
係咪姐係有上升空間？
龔成老師：
唔一定。
其實這個情況，在唔少股票都出現，多年前亦有所謂的炒兩地差價的投資模式，但兩地始終是不同的市場，而內地市場不是一個完全開放的市場，因此價值總會有不同。
同埋，可以一個市場上升，一個市場下跌的。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14193：
阿Sir, 證券公司的收費比銀行平好多，但係呢d公司買賣風險係咪會增加?
請問如果經濟不景佢地做唔住咁我d股票會點?
龔成老師：
香港的監管不差，其實不能擔心。
理論上，佢唔係直接持有我地的股票，只是代買，我地的股票在結算所，所以如果佢倒閉，股票是無影響的，當然，如果佢一開始就造數，就好難講。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14194：
成哥 我想問下1098路勁有無投資價值 息都幾高下 有8厘 想問下你既睇法 謝謝
龔成老師：
路勁（1098）佢的業務，包括左發展地產、收費公路、投資管理等。近年，發展地產已經成為左佢的主要業務。
佢業務不差，增長快，基本上都有質素，但負債有點多，加上規模不算大，這就會成為風險。長遠的投資價值有，但就唔建議太大注。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14195：
龔Sir ,煤氣你點看？14.74 ok 入手價？
thanks!
龔成老師：
煤氣（0003）當然正面，業務有質素，同時內地的業務，仍然是增長動力，不過，之前公佈的業績，見到佢的中國業務增長力，比預期慢左少少。
反映佢增長力唔會是高增長類別，是平穩增長類。
以質素及增長力分析，現價合理區頂，分注投資無問題。始終要佢大跌不易，所以唔好估值股價，分注，以策略衡量金額去投資就得。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14196：
你好，我現持現金30萬，請問一問 阿里巴巴（9988）現價195 買唔買得過？
如果買10萬會否太多？我見各大行都好睇好話望升4成，求指教，謝謝
龔成老師：
阿里巴巴（9988），業務有質素，有潛力，是很好的股票，有投資價值。
最大的問題是現價不平，因此，最好的方法是控制注碼，現價並不是大手的時候，你可小注投資，部分資金投資可以，分注，慢慢入，或等佢跌先入。
至於升幾多，無人知的，但這企業長遠價值正提升，這一定會帶動長期價值向上。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14197：
龔成老師：您好！我想了解多些關於如何理財及分配投資資金的事宜。
今年26歲，工作了三年，月入約3萬6千，家用每月1萬5，交稅每年3萬左右
由於一直都沒有儲蓄的習慣，因此在工作的第一年只聽了朋友建議購買保險，後到今年整理財務分析時，才開始覺得購買得太多保險類型產品了，每年花了大約9萬，但斷供又非常不化算。
也預想到日後生活上想有一筆流動資金，自己也淘不出來使用。
上年開始閱讀老師的文章後，了解到原來可以長期月供一些有質素的股票，由此，開始購買了$1000 2800盈富月供
但知道實在太少
亦沒有太多流動資金可以使用
現時每月可以儲$3-5000可作儲蓄/投資用途
打算邊儲邊投資
請問老師可以如何有更好的投資方案？
感謝老師！
龔成老師：
我地投資，要做到攻守兼備，以你的年齡來說，守的部分太多，攻的太少。保險類是守的產品，足夠就得，不用太多，加上你的年齡，是財富增值的黃金期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。
第一，保險方面，保持之數去月供就得，唔好再加，因為要停好煩，所以算，只有照做。
第二，盡你的能力，進一步增加儲蓄，你現時是黃金期，盡全力去做。
第三，做月供股票，每月$3000。這刻可以先集中供盈富（2800）$3000。每月餘下就儲下現金先。
第四，盡力學投資，這是幫你增值的最好方法。你這刻本金不多，好好利用這刻去學好投資，到你之後慢慢有本金，就可以更有效利用。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14198：
老師你好，今年29歲，月入3萬。有一物業，月供1.2萬自住，每月可儲5千。手持15萬現金，從沒有投資股票經驗。
請問投資美股還是月供港股？因為想投資海外房地產，所以想藉股票2-3年內有現金可以增加。
謝謝你指點迷途
龔成老師：
我地進行財富累積，其實是一個配置的過程，建立一個平衡的資產組合。你本身有物業，因此應投資其他類別的資產，否則會太過集中。
你可以先投資股票，利用股票去累積財富，唔需要太心急投資海外樓，因為這會令你太集中，到股票有一定比例先投資外國樓會更加好。
你可以投資港股去做月供股票，最簡單就是每月月供$5000，盈富（2800），至於餘下的$15萬現金，暫時唔需要動用，持有現金先，等你有較多投資知識及孺驗先動用。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14199：
龔sir 你好 我今年37歲 單身，自己住，正修讀 part time degree月入14000左右
手上有5手匯豐，流動資金 兩萬蚊左右， 請問你可以給我意見如何分配及改善投資/增加財富嘅安排嗎 ？ 謝謝
龔成老師：
你37歲，這年齡其實財富仍有增長力，雖然不是進取模式，但唔需要全部集中在匯豐（0005）因為這只是收息股，增長力不強。
因為當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
所以，匯豐你部分持有可以，但部分應該轉為較有增長力的股票，如平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。
之後當你每月儲到錢後，都可以投資這類別的股票。
另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q14200：
老師你好，一直有追開你FB分析，想攞小小意見
本人30歲己婚，月入約 80K,生意好可以90k
半年前$750萬4成首期買左個單位，現估值$800萬
供樓17.5k
每月洗費15k
現有流動資金約150k
之前玩過短炒，仙股都試過，輸左5,6萬，睇完你D分享，都係穩陣D，現只持盈富:
2800*1000
希望三年內增加資金同賣樓買大D單位俾小朋友，股票方面唔知有咩組合建議。
計劃每個月買一手盈富收息
龔成老師：
你現時已有物業，增加股票方面的資產，是較好的做法，這樣會令你的財富組合較為平衡。
你每個月入一手盈富（2800），是很好的做法，長遠絕對可以助你財富平穩增長。
另外，你可以投資平穩增值類的股票，例如金沙（1928）、長建（1038）、中銀（2388）、港鐵（0066）、恆基（0012）、港交所（0388）。都是適合你的，你可以從中選股。
以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
積家 表 價格 在 積家錶-PTT與DCARD推薦網拍商品-2021年12月|飛比價格 的美食出口停車場
找積家錶PTT與DCARD推薦網拍商品就來飛比，收錄全新、二手積家錶在露天、蝦皮推薦商品|飛比價格. ... <看更多>