(認真mode)
我之所以咁癲，其實完全係因為我曾經喺一個比我更癲嘅地方玩咗幾年。
好多謝當年設計部門嘅大佬陳書（Chan She)揾我分享，令我有機會回味返😋
#特邀稿件：寫在天比高結束之前
100毛現任腦細、前天比高創作總監林日曦曾經喺一個訪問中講過：「天比高喺天水圍，係間製作公司，又係社區中心。接外間嘅 job，畀有志創作嘅年輕人邊做邊學，而作品真係會出街。但 (我) 作為 mentor，覺得自己唔稱職，因為創作就係你用自己嘅方法去做，我 share 唔到任何經驗俾佢哋，經驗即係包袱，係廢嘅，我不如做好自己先啦，我都需要邊做邊學。」
本人亦係當年為天比高開荒嘅其中一員，上個禮拜喺 Facebook 見到相關單位將會停止資助天比高繼續運作嘅消息，意識到佢地似乎真真正正會同創意培訓嘅任務講拜拜，內心不其然百感交集。
天比高全名為「天比高創作伙伴 賽馬會策動創新思維 (Skyhigh Creative Partners)」，由香港賽馬會慈善信託基金捐助、商業電台及聖雅各福群會共同營運，旨在給予年青人投身創作行業嘅機會，畀佢哋邊做邊學，以迎接將來社會上更多嘅挑戰。喺天比高入面，分咗劇場 (演藝及音樂)、影像、文案、攝影、平面設計等幾個部門，服務對象以三十歲以下嘅年輕人為主，當中大部份為中學生或未畢業嘅大專生，亦有少部份本身已經從事緊其他行業，但想重拾創作夢想嘅朋友。
引子講長咗，不如講返正題。因為天比高涵蓋咗咁多範疇，所以我哋接手嘅工作種類非常之多，例如拍攝 MV、產品包裝、商標設計、演唱會及電影宣傳、各類現場表演等，其中不可或缺嘅，當然係廣告製作。大概因為天比高有 NGO 背景，所以我哋有份參與嘅廣告項目，好多都同政府部門或慈善機構有關，比較大型嘅有香港教育學院十五周年「萬歲師表」推廣、財政預算案 09-10 年度宣傳、禁毒處嘅禁毒宣傳等，其中，十年前嘅一句「不可一．不可再」，禁毒處用到今時今日。
本人當初走入天比高擔任「導師」嗰陣，未夠三十歲，而且係平面設計出身，對於點樣製作廣告，其實所知唔多，正如林日曦所講，全機構上下冇一個唔係邊做邊學，所以當時大家努力拼砌出嚟嘅嘢，並唔係咩驚為天人嘅作品...... 結果做成點，外間自有評價，未睇過而又有啲八卦嘅朋友，可以自己去 Google 或 Youtube search 下，好多資料都仲揾到。
如果係都要我介紹天比高嘅 job，我會揀李嘉誠基金會嘅「你還可愛麼」活動。呢次活動，簡單嚟講係透過一系列講「愛」嘅短片，去推廣李嘉誠基金會嘅項目，而呢啲短片，天比高動用曬成個機構嘅人力物力，並邀請到好多導演、演員、歌手、名人去帶領住啲年輕人一齊製作，佢哋包括卓韻芝、林二汶、麥曦茵、盧鎮業、彭浩翔、Vivek Mahbubani、曾翠珊、江毅、黃精甫、尹光、柳影紅、麥婉欣、郭子健、泰迪羅賓、邵音音、鄒凱光、ToNick、黃智亨、梁碧芝、洪永城、張經緯、崔允信、林雪、杜汶澤、秦小珍、農夫 、陳輝陽...... sorry，唔好嫌我長氣要數曬佢哋出嚟，因為對於一個本地創作人嚟講，真係可能一世都唔會遇到咁嘅 project，但喺天比高嘅年輕人，包括我在內，就係有咁嘅機會去跟住呢班咁犀利嘅人學嘢。暫時放低李嘉誠基金會係咪政治正確，「你還可愛麼」嘅主題影片，正正就係天比高希望年輕人抱住一個咩態度去面對不安嘅未來。
講咗咁耐，其實想講下天比高嘅存在價值，並唔在乎佢於當時做出嚟嘅作品有幾威或幾屎，亦唔係要證明社企應該點樣運作，而係佢喺呢十年裡面，為一代人提供咗一個好好嘅地方去學習、實踐同發揮。我好幸運，睇到今日唔少「年輕人」已經成長，喺唔同範疇上，即使未係發得最光，但仍然堅持發熱。
天比高對呢啲年輕人影響有幾深？我講冇用，最好問返啲當事人。本人就呢次可以喺狂人 page 寫幾隻字嘅機會，聯絡返幾位當時受惠於天比高嘅年輕人，包括演員游學修、音樂人李拾壹、導演黃飛鵬、劇照攝影師曾志榮、平面設計師楊海樺同100毛 TV Program Manager 王嘉偉，由佢哋自己分享返天比高帶俾佢哋嘅經驗同感受，好過我吹千言萬字。
當然，曾經去天比高玩過嘅年輕人成千上萬，本人揀呢幾位朋友仔做個簡短訪問，純粹係因為方便就手。如果我冇揾到你哋，請多多見諒。
編按：「你還可愛麼」主題影片連結 👉 https://youtu.be/8byo8nAYl9k
圖／文：陳書（She Chan）
==================
支持本版營運，請Like 同Share 我哋嘅特約壹句：https://bit.ly/2TsjNvZ
想睇到更多關於廣告的有趣分享？
一、搶先看／see first 我們的Facebook page 內容（步驟：按專頁cover photo 下方嘅following 掣-> see first ）
二、follow 廣告狂人其他平台：
Instagram: instagram.com/madmanmonogram
Facebook group: fb.com/groups/305727013148450
telegram: t.me/madmangossip
medium: medium.com/@madmanmonologue
