多謝方以文😛🙏🏻
[方以文問兩句][ViuTV][瑪嘉烈與大衛系列前度 SP01 剪不斷]
宣傳片同埋特別篇第一集， 陳凱詠 Jace同埋 黃定謙 WTHimmy做得非常好，亦都好鬼合拍。原來佢哋喺拍之前由梳頭化妝開始已經蘊釀緊情緒。Jace仲話好多謝Himmy呢位好對手。
一陣2230有得喺電視睇喇，想先賭為快，睇呢度>>>
http://viu.tv/encore/margaret-and-david-ex-special…
（btw，Himmy都係不停讚Jace，方以文問黃定謙兩句。睇呢度>> https://www.facebook.com/fongeman/posts/1610841548979884）
----------------------------------------
問：《前度》嘅宣傳片出街，網上觀眾都對你哋兩個段片有好好嘅反應。你哋有冇預過咁好迴響？又幾時知道要拍呢個SP，知道時有咩感覺呢？
答：絕對係冇預過有咁好嘅迴響，係點都冇諗過。因為成日覺得網上嘅嘢，可以好多負面嘅嘢。但我哋睇到好多嘅都係好正面，同埋多人睇，所以非常之開心。嗰陣時我仲同Himmy自己講笑，話咁好反應就應該要多啲嘢拍啦。點知講完冇幾耐就收到消息話要拍呢個特別篇，去延續呢件事。我係覺得癡咗線，不敢相信，覺得自己好好彩（按：用心演、用心做，一定有觀眾支持嘅）。
----------------------------------------
問：先有宣傳片嘅短故事，再有SP長篇少少嘅內容。你哋覺得咁樣對於演SP時有冇咩幫助，定係有啲框架拖住限死咗？
答：我覺得唔係一個框架，因為編劇寫得好好，成件事個前文後理非常之清晰。因為我哋拍一個咁短嘅宣傳片，講緊兩分鐘嘅時候，我哋自己要想像好多嘢，成件事變得豐富同真實，for我哋去演戲。我哋已經諗咗咁多嘢，build up咗咁多嘢，再去拍呢個特別篇嘅時候，就會快好多同埋容易好多，所以我覺得係個幫助嚟。
----------------------------------------
問：拍宣傳片時個氣氛一嚟就好正，你哋兩個本身係咪識？點build up一嚟就分手嗰吓呢？
答：上一題講嗰個幫助，係特別關呢一條問題事，即係我哋之間嘅chemistry。我哋本身係識，但最開頭其實我哋唔係傾好多偈﹐拍呢個宣傳片之前純粹係識。但係要喺咁短時間之內要做到嗰件事，係要大家都好信任大家，將啲情緒擺出嚟，先至可以喺咁短嘅篇幅度，拍到好似好多嘢發生咗咁，個宣傳片就係想咁。好就好在我哋都好信任大家，放晒啲情感出嚟，就會build up到。Himmy係好幫到我，喺現場係帶到我嘅情緒。佢好畀戲我，我就自然接得到，所以我覺得有個好嘅對手太緊要喇。
我哋喺拍宣傳片嗰陣，都好自然哋冇玩。喺化妝set頭嘅時候，我已經一路望住佢，因為佢周圍傾偈，我就當佢撩女仔，好嬲。佢又對我好衰，好記得有啲小動作好帶動我嘅情緒，例如係佢整我啲頭髮時，佢好用力去chok，就話係咪咁短呀？我就真係好唔開心好唔開心。講到底真係要好多謝Himmy，係個咁好嘅對手，我先有咁好反應（按：兩位演員互相扶持帶戲，好感動）
----------------------------------------
問：鍾意SP兩集裡面嘅邊一幕？
答：第一集我鍾意一開頭我幫Himmy洗頭好sweet嗰幕啦。除咗感覺真係好sweet、好似真嘅情侶、好輕鬆好自然，而且我覺得嗰個chemistry好難撞得到、好難得。我自己係覺得嗰幕睇得好舒服。同埋因為拍嗰陣我要洗Himmy個頭，我用熱水係淥到佢，係好搞笑、好好玩。拍嘅時候好玩，出到嚟嘅效果又好好，所以我好鍾意。
第二集就梗係鍾意Sofiee獨白嗰幕啦，喺現場嗰時就更感動，啲演員都喊晒，我覺得Sofiee係做得好好。
----------------------------------------
問：鍾意宣傳片定係SP多啲？點解呢？
答：非常之難答。因為宣傳片可以喺咁短時間入面製造到個氣氛，個節奏係好適合好好，都好多想像空間畀人去諗，一段兩分鐘嘅宣傳短片我覺得係好好。特別篇，因為佢有半個鐘，有好多嘢想講，又總會講唔晒，所以個節奏差咁啲，但係成個特別篇可以來龍去脈睇晒，係好開心嘅事，亦都係一件好睇嘅事。所以最好就梗係特別篇再拍長啲，再特別啲去解釋成件事，咁就再好睇啲，就更好喇。我唔知點揀呀，揀唔到（按：我都揀唔到呀，好正。唔好揀喇，打個和）。
----------------------------------------
問：為挽留另一半做過最癲同最蠢嘅事係咩？
答：未試過挽留過任何人（按：Woo~~~）。
----------------------------------------
問：最近有咩搞作呀？幾時有得再睇你哋嘅演出？
答：最近就拍咗ViuTV嘅《身後事務所》其中一個單元嘅其中一集。我係好期待，因為嗰個單元係講買樓，成個劇本係好估唔到，演員嘅情緒係好激動、要求好多嘅。我只係其中一個角色，但我知道其他角色都有好多好複雜嘅嘢，我就拍咗一日、拍一集，但我非常期待。因為個劇本好好睇，亦好擔心自己做唔好，所以都好期待呢件事（按：正喎，我都好想睇）。嚟緊會拍一個港台嘅單元劇，係做中學生，講我大咗肚。
----------------------------------------
#ViuTV #瑪嘉烈與大衛系列前度 #黃定謙 #陳凱詠 #吳海昕 #方以文問兩句
短故事 搞笑 在 【搞笑小故事】你沙雕嗎？ - YouTube 的美食出口停車場
... <看更多>