有日一位先生嚟到診所。
佢行埋嚟登記處問我：「你醫生識唔識得醫百日咳？」
我：「要睇咗醫生先知喎，都要俾醫生知道你咩事先」
佢：「講得百日咳就梗係咳咗成百日咁滯啦，我出去買過咳藥水食過藥都係咁」
我：「你之前睇過醫生話你係百日咳？」
佢：「咳咗咁耐唔係百日咳係咩呀？唔駛睇醫生都知啦，日又咳夜又咳，我咳到心口都痛埋，咳到冇得瞓㗎。仲要日頭都係咁咳，一咳起上嚟就扯晒蝦，上次我搭巴士就係咁，隔離左近啲人好似以為我呻吟，個個都望住晒，我男人嚟㗎嘛，呻咩吟呀？」
咁又冇話男人唔呻吟得嘅…
佢再講：「我都唔知我樓下大堂張告示話晚間運動盡量收細音量係咪講緊我，我扯蝦咋喎？」
可能人哋唔係講你呢～你多心啦。
咳得耐又扯埋蝦唔一定係百日咳，哮喘都會。哮喘發作嘅時候，有啲人未必會好似睇電視嗰啲扯晒蝦唞唔到氣咁反應劇烈，有啲輕度哮喘嘅最常見症狀就係慢性咳嗽，呢啲症狀同感冒都近似，所以好多人都會冇留意而造成延誤診斷及治療。雖然症狀睇落好小兒科，但有啲一發作起上嚟係會有嚴重反應，過往更有15-20%成人因哮喘而死亡。
不過唔駛驚！有藥嘅～記得係要由醫生處方，千其唔好貪方便自己去搵藥，用啲唔用啲只會有機會令病情惡化，無論你嘅病徵有幾輕微都應該由醫生為你診斷並處方，亦要跟足指示用藥同覆診，咁先可以妥善控制及管理病情。
#哮喘 #短效氣管舒張劑 #吸入式類固醇
