睡公主的詛咒（上）
我係一個王子，自細我就知道，我將來嘅老婆係邊個。
佢叫睡公主，一百年前受到巫婆詛咒，要沉睡一百年先可以被喚醒。
睡公主嘅阿爸同我阿爺個阿爺係好朋友，雙方訂下婚約，
一百年後，城堡重新開放，適齡嘅王子會去喚醒睡公主，娶佢做老婆。
我帶住士兵，拎住地址，向睡公主嘅城堡進發。
點知去到嗰度，一片荒蕪，唔好話城堡，連間木屋都無。
我花咗好多時間查探，先知道九十年前，城堡就消失咗。
我繼續搵，搵到下一個地方，判斷出結論，巫婆嘅詛咒，唔止將城堡封閉，仲令城堡每十年遷移一次。
我一路搵，終於搵到城堡所在，但打探需時、路途遙遠。
呢個時候，距離城堡開放嘅日子，已經過去咗三個月。
可能你覺得，三個月好短，反正睡公主都瞓咗一百年，瞓多三個月都唔係問題。
我本來都咁諗，直至我見到城堡嘅大門。
大門已經完全被破壞，成地都係碎屑。
好明顯，呢三個月裡面，附近嘅村民已經發現咗呢座城堡，好多人入過去。
我行入城堡，果然，裡面破破爛爛，珍寶傢俬已經被搜刮一空，牆紙都俾人刮埋落嚟。
我唔關心城堡嘅珍寶，但我好擔心我嘅未來老婆，睡公主。
我一馬當先咁跑上去，衝入睡公主間房。
睡公主仍然沉睡，但全身赤裸，身上仲有好多污跡同疤痕，場面不堪入目。
我倒抽一口涼氣，我早就應該諗到，城堡無任何防禦，任何人都可以入嚟。
入嚟嘅，總有壞人，然後就有壞事發生。
我再望一望，原來睡公主床邊有個石牌，指住睡公主個嘴，上面寫住：「吻一吻，就會醒。」
唉，一定係睡公主嘅阿爸用心良苦，怕一百年後之後，解咒嘅方法失傳，
所以特登刻一個石牌，指引嚟救睡公主嘅人。
但佢點估得到，班強盜見到呢個牌，知道唔吻睡公主，公主就唔會醒，於是更加放心去姦淫擄掠。
且不論睡公主係我未來老婆，就算只係一個陌生女仔，見到佢遭遇呢種慘事，我都會義憤填膺。
跟住落嚟，我應該吻醒睡公主，帶佢離開呢個危險嘅地方。
但我嘅吻離佢仲有半米距離，我突然諗起，如果睡公主依加睜開眼，見到我，再見到自己嘅慘況，佢十有八九會覺得我係強姦犯。
出發前，我阿爸千叮萬囑，交代我一定要娶到睡公主，完成祖宗嘅遺訓。
如果第一印象差成咁，之後嘅事都好麻煩。
我退後兩步，除低外套，勉強掩蓋住睡公主嘅身體。
然後，我交代出面嘅士兵，幫我傳訊去皇宮，召集侍女同女醫生過嚟。
我係咁樣諗嘅，先搵侍女幫公主清潔，再搵醫生醫好佢身上嘅傷痕。
然後，我再吻醒公主，雖然公主事後都會知道真相，
但至少醒嗰一刻，唔駛受到咁大打擊，我可以慢慢同佢解釋。
侍女趕過嚟，都需要一段時間，士兵分散喺城堡內，我就喺公主間房打地鋪。
半夜，我俾一陣奇怪嘅聲音嘈醒。
睜開眼，我見到四個著白袍嘅人企喺床邊，好似檢查緊睡公主咁。
我大喝：「你哋係咩人？」
「哦，我哋係......附近嘅醫生，聽講呢度有個女仔受咗傷，幫佢檢查吓。」
我點點頭，睇嚟呢個世界仲係有好心人嘅。
但我回過神來，開始覺得唔妥。
公主受嘅係外傷，點解醫生拎住手術刀，要切開佢個肚？
「喂，停手，你到底想做咩？」我大吼一聲。
兩個白袍人擋住我，另外兩個繼續切開睡公主。
好彩，駐紮喺城堡嘅士兵都被驚醒，紛紛衝入嚟，制伏咗佢哋四個。
審問之下，先知道佢哋係嚟偷器官嘅。
佢哋聽聞呢度有個沉睡不醒嘅女人，想偷晒佢啲器官，連麻醉藥都慳番。
「佢都唔會醒番，咪捐啲器官出嚟，遺愛人間囉。」白袍人仲想辯解。
唉，呢個世界真係好黑暗。
經歷咗呢件事，我唔敢再畀睡公主留喺度，我決定將佢運番去我嘅皇宮。
下集：http://bit.do/e6DJr
將專頁設定為「搶先看」/ "See first"，最新故仔馬上睇！
請選擇報應：https://goo.gl/epRMXj
我家有個聚寶盆：http://bit.do/eHDQm
#短故 #短篇 #小說 #陳美濤 #廣東話 #粵語 #tomatochan #睡公主的詛咒
用心良苦廣東話 在 當把ZOOM直接翻譯成粵語！ | By 楊家成- MrYang - Facebook 的美食出口停車場
我的 用心良苦 你们什么时候能懂 呢？ Oct 19, 2022 · 39K views. 01:49. 小朋友到底怎么学英语！ Oct 8, 2022 · 241K views. 02:59 ... ... <看更多>