《第一》
♂：早晨
♀：有冇睇奧運？
♂：剛剛睇左張家朗拎冠軍，今日好忙？
♀：仲忙緊，但想搵你傾下
♂：好啊，你想傾乜？
♀：就傾第一，你知唔知世界第一既山峰係咩？
♂：珠穆朗瑪峰囉
♀：咁第二呢？
♂：喬戈里峰
♀：……第三呢？
♂：干城章嘉峰
♀：……我無野講喇……
♂：唔玩你喇，其實我係google既，我只係知第一高係咩
♀：算你兜得快，如果唔係我就要晚安喇
♂：所以你想講既係咩呢
♀：呢個世界大部份人都只係記得第一，第二第三第四第五，同埋之後既名次，又有幾多人知道呢
♂：就好似第一次咁，第一，都係最令人深刻既
♀：由細到大，好多年我都考第一，因為我唔想輸，我想比人知道我係第一
♂：你應該好辛苦
♀：呢種辛苦唔係用兩個字就可以表達出黎，我好記得，考大學個次，我失手，入唔到最好既大學最好既學科
♂：我聽緊
♀：我好記得當時我父母雖然好似無乜野咁，但我知道佢地係失望
♂：呢個就係你自己住既原因？
♀：當時我無任何唔開心，因為我諗清楚，佢地只係喜歡第一既我，當我唔係第一，我就咩都唔係，從此以後，我發誓唔會為其他人而做乜野，我只會做我自己喜歡既事，因為為其他人做幾多都好，佢地都唔會滿足
♂：我諗每個人都希望有一個，無論自己係第幾名都好，都會記住佢，欣賞佢，陪伴佢既人
♀：有呢種人咩？
♂：總會有
♀：當你唔係第一，唔係最好，佢搵到一個比你名次高既人，就會離你而去，佢仲存在，只不過係佢未搵到比你更好既人
♂：如果你咁諗，你永遠都唔會有安全感，永遠都唔會幸福
♀：唔係我想咁諗，而係每個人都係咁
♂：我唔係咁諗
♀：所以，你會寧願要一個唔係最好既人？
♂：講返山，你知道珠峰係最高，係第一，但有幾多人有能力去征服到珠峰呢？有時唔係要搵最好，而係要搵對於自己最合適既野
♀：呢種睇法都幾好，但我問你，當你能力不斷上升，而呢個山唔再滿足到你時，你係唔係就會再去征服其他山？
♂：我唔會
♀：解釋，我唔係細路女，唔係甜言蜜語就可以打發到我，你講得唔好，我會將你既危險度調低
♂：我上過大帽山最高點，用左我三個鐘由山腳行到山頂，過程好攰，當我係最高點時，我食左一隻雞脾，我坐係地下望左一個鐘風景，而呢個風景係我一世見過最好既高峰風景。我知道大帽山之上有無數山峰比佢高，連名次都無，但對我講，呢座山就係最特別既山。
人又好，山又好，客觀既好壞，只係外人睇既一種表面，當你真正行個陣，同呢座山就會有故事，呢種故事係客觀數據唔會講到，有人睇山既高度，有人睇山既難度，而我，係睇山既故事。
無論其他人同我講其他山有幾好，有幾正，但係我心目中，有一座山，係超越數據，無分名次。
就好似張家朗咁，如果佢第一輪就輸左，今晚就唔會有咁多人為佢歡呼，四年前八年前，張家朗同樣係張家朗，四年後八年後，張家朗都係張家朗，如果佢輸左，仲會有幾多人記得佢？
但佢身邊既人，認識佢既人，佢既親人，張家朗無論係咩成績都好，係佢地心目中，都係最好既劍手。
講得長左……唔知會唔會悶親你
♀：無，我睇緊，諗緊你講既野
♂：所以，我既危險度如何？
♀：我無再計你既危險度
♂：喂……即係點啊……
♀：我想見下你
♂：咁突然……
♀：想，未實行
♂：仲等我空歡喜一場
♀：係呢，尋日你既IQ題答案係咩，我真係諗唔到
♂：有日我會同你講答案，依家既答案，未係時候，感覺會好唔同
♀：我懷疑你報復我
♂：我無咁小器
♀：如果……我無你諗得咁好，你會點？
呃……都係當我無問過……
♂：喂，我地傾既唔算多，如果你真係無同我講假話既話，我諗同我想像唔會差太遠既
♀：好，我第一個願望，如果有日你見到我，就算你覺得有幾大落差都好，都唔會比我知道
♂：我應承你
♀：多謝你……晚安，聽日再傾
♂：晚安，聽日再傾
——
呢個故事踏入左100like既門檻
如果你喜歡的話，請睇完比個like，到越過300like時
會比一個大家參與故事既獨家體驗
——
長傾·不見@筆友
https://bit.ly/LongchatEP1
長傾·不見@緣份
https://bit.ly/LongchatEP2
長傾·不見@年齡
https://bit.ly/LongchatEP3
長傾·不見@拜金
https://bit.ly/LongchatEP4
長傾·不見@笑話
https://bit.ly/LongchatEP5
長傾·不見@外表
https://bit.ly/LongchatEP6
長傾·不見@等待
https://bit.ly/LongchatEP7
長傾·不見@飲酒
https://bit.ly/LongchatEP8
長傾·不見@奧運
https://bit.ly/LongchatEP9
長傾·不見@人事
https://bit.ly/LongchatEP10
