今日我陪豆姐行街，入到一間女裝店。
有個位置有座位供客人休息，通常呢類地方只有男人會坐，因為女性購物係唔需要休息。
所以呢啲亦即係所謂嘅「男友老公等候區」…
突然間，我聽到有陣陣抽泣聲，原來係坐喺我旁邊嘅中年男人。
「等女友啫，唔使喊喎。」我安慰。
「唔係啊，我睇緊劇…」
男人展示手機畀我睇，原來佢睇緊《延禧攻略》，一個堂堂男子漢點解會睇《延禧》睇到淚流滿面？！
「魏瓔珞佢飲避子湯啊！嗚嗚…」男人。
「我都有睇呢段啊，但唔使喊嘛。」
「唔使喊？！你知唔知點解我哋要坐喺度啊？！」男人勃然大怒。
「因、因為等女朋友？」
「唔係！就係因為避孕丸！」
我記得最近陪豆姐睇延禧攻略。
睇到某段劇情描述，女主角魏瓔珞故意飲避子湯，因為佢無信心做媽媽，回想起自己媽媽難產去世，魏瓔珞覺得生仔對女性係一種風險。
網上亦流傳，避子湯成分是水銀、藏紅花及麝香，有活血效果令孕婦流產。
雖然魏瓔珞所服用避孕湯對身體有害，但估唔到原來古代女性已經有避孕意識，現代人反而會避談避孕話題。
不過古代人就無咁好彩，避子湯對身體有害，現時改良嘅口服避孕丸，不但已大大減低副作用，更有助於某些婦科疾病預防。
有人覺得避孕係男方責任，要女方食藥係一種「賤格」行為。
但原來，喺英國重量級媒體年度選書《轉角遇見經濟學》中。
１９６０年代避孕丸嘅發明，可以話係二十世紀最重要嘅經濟變革，引起社會產生咗巨大變化！
避孕丸在美國上市後，短短5年已佔據市場，有50%已婚女性服用，避孕丸的流行令女性意外懷孕機率降低。
點解我哋一直害怕嘅避孕丸會能夠暢銷流行？
首先，因為喺所有短效避孕方法中，避孕丸的成功率比避孕套更高，因為避孕套成效會受各種環境因素及正確使用時與否，大大減低避孕套的成效。
所以避孕成功率，避孕丸比避孕套更可靠。
更重要嘅係，避孕套令避孕與否嘅決定權在男方上，有好多情侶都因為「帶唔帶套」呢個問題發生爭執。
但避孕丸就令控制權放喺女方身上，意味女性主動保護自己夠做更多自己想做的事，在專業行業例如律師醫生，女性能夠有時間精力投身於市場上。
１９７０年代，當每一個國家合法推出避孕丸，只花幾年時間，該國家嘅女性就業率就會倍數上升，好多專業職業開始出現女性嘅蹤影。
於是，女性工資平等成為重要議題，因為大家都開始覺得女性工作能力不遜於男性。
當女性薪水及生活水平提高，意味住女性相關產品嘅銷費量亦會提高。大家所見現今嘅商場，不論邊一個國家，女裝一定多過男裝，比例甚至係９：１。
估唔到避孕丸嘅發明，竟然令世界出現咁大嘅變化…
原來個男人喊唔係為劇情，而係等女友買衫等到崩潰…
