【拜登vs特朗普，就同香港飯民vs焦土一樣，係一場民粹vs精英大對決】
「斷正」電郵門事件證據確鑿，然而美國各大主流媒體竟然齊齊噤聲：王丹批評《紐約時報》只將相關報導擺響第十八版一個小角落你覺得好離譜？未夠，幾日後無啦啦拎特朗普響2013至15年響中國生意嘅紀錄，仲用「向中共政府繳交達數十萬美元稅款」黎反抹黑Trump Trump先至叫最離譜。
唔單止咁，明明國家情報總監John Ratcliffe已講到明FBI掌握Hunter Biden手提電腦係真事，亦明示《紐約郵報》列舉嘅電郵有其根據，但偏偏香港同美國班左膠卻拒絕接受事實，堅持呢單醜聞係無中生有，係俄羅斯間諜操縱美國大選嘅陰謀，總之我唔知我唔聽我唔理，拜登就係無辜，特朗普就一定罪該萬死。
有趣嘅係，基於特朗普政府響過去一年對中國手段強硬兼多番表示對香港人表示支持，所以令到黃絲一面倒支持特朗普，結果令到一直靠食黃絲條水嘅「黃標KOL」陷入精神分裂狀態：無立場無廉恥果班例如xxxx當然無問題，反正都係照讀新聞，再加鹽加醋講到乜尻「黃金交叉」都仲得；又或者好似鄭經翰咁早已搵夠水上岸，亦唔怕得罪聽眾堅持特朗普就係「反民主」；
但係仲有一班企響傳統飯民親美國民主黨路線、卻又仲未上岸嘅「黃標KOL」又點算呢？本來就好應響呢個時候緊跟大台指揮唱好拜登，問題係當下面課金班黃絲老闆要聽嘅係撐特朗普言論，於是就會有好似劉細良咁撚七嘅情況出現：口中就不情不願話點都要撐Trump，但又會無啦啦露出狐狸尾巴，走去話撐Trump嘅人同撐陳百祥、大劉做特首其實無分別。
燒山最近都忍唔住出聲批評，基本上成個美國建制都集體企哂響拜登一邊全力為其護航，並總結呢個係由於特朗普民粹路線觸動倒既得利益利益同社會精英嘅原因──對於呢個講法，我當然係完全同意，但我唯一要提醒嘅係，即使係燒山自己，其實都係香港建制一部份，過去就打壓本土派同年輕勇武抗爭者不遺餘力，一直去到今年年初先突然「良心發現」。
事實上美國左膠對於特朗普及其支持者嘅各種抹黑同迫害，根本響香港發生咗好耐，只係因為黃屍一直處於迫害果一方，所以先會完全無感覺而已。
所以見倒有少香港人奇怪點解Chris Pratt只係因為唔參加「Avengers」嘅撐拜登同Harris聯署，竟然就比班左膠圍攻到Twitter都要摺埋；但相比起響香港，只要你唔撐飯民就係「收共產黨錢嘅藍屍」、只要你唔參加初選就係「分化鎅票撚」、只要你屌下飯民就係熱狗；我覺得美國班左膠文明好多囉，起碼唔會老屈人係俄諜先啦；如果佢響香港，咪好似杜汶澤咁比劉細良廢陶老屈唔撐Biden即係撐阿叻囉。
香港嘅飯民大台，同美國嘅建制力量，根本就係一丘之貉：佢地通常都為自己嘅學歷同經濟條件擁有一種優越感，同時認為自己擁有特別崇高、悲天憫人嘅道德價值觀；但其實呢啲所謂道德高地背後，其實都只係守護自身利益嘅一種藉口。
呢班「社會精英」通常都係由一班生活無憂嘅中上產組成，利用自己嘅人脈同影響佔據各大輿論評台，再加埋一堆大學學棍背書提供「學術權威基礎」，然後再響政府申請各種基金招攬一大堆全職左膠作為水泥隊，一個唯我獨尊嘅大台就此搭建而成──之後只要有任何階級、團體、組織違反佢地嘅利益原則，就立刻會被瘋狂圍剿，用各種最低劣嘅手段將你抹黑，分別只在於，你究竟係俄國間諜排外法西斯，定係收共產黨錢嘅分化鎅票撚熱狗。
美國建制同飯民大台一直以來都運作良好，直至特朗普同本土勇武派嘅出現。特朗普背後所代表嘅，就係一眾全球化貿易下嘅受害者，佢地本來應該係由左派代表，奈何美國左膠已同華爾街代表嘅民主黨建制合流，經已淪為資本家嘅走狗；至於本土勇武派嘅出現，亦係因應和理非不合作運動多年黎一事無成，傳統飯民尸位素餐，再無人相信靠呢班垃圾可以爭取倒真普選──簡單黎講，前兩者就係指出「國王的新衣」嘅細路，而為咗捍衛自己嘅尊嚴同利益，無論美國同香港嘅民主黨自不然將佢地視之為死敵。
最近睇比香港一眾社會科學棍吹捧嘅Larry Diamond著作《妖風》，就充份感受到果種自以為高人一等「公共知識份子」嘅氣焰，將所有對傳統民主理論質疑嘅聲音貶低為民粹──但事實就係呢班「學棍精英」太過離地、對現實世界嘅認知出現嚴重脫節，民粹本土思潮先會湧現，所以民粹從來唔係問題根源，真正根源應該係呢班精英既得利益階層嘅腐化。
所以無論係特朗普面對美國民主黨、主流媒體同左膠學者，定係本土派面對飯民大台、黃屍媒體同左膠學棍，本質其實一樣，都係一場基層民眾vs精英、民粹vs建制嘅對決；
如果你會認同只有特朗普當選美國先會延續對中共強硬政策，China登當選則香港無運行的話，咁你應該同時認同本土派拆大台、焦土飯民，山就係因為覺得飯民不死、香港不生。
