【 #他們的愛情故事 - 婆婆結婚69年後終披婚紗完心願！ 】
今時今日嘅婚禮，新娘唔好講話婚紗，晚裝閒閒地都換幾套～ 但原來喺舊時嘅年代，唔係個個都有資格着婚紗，就好似50年代嘅英國咁，當年就有明文規定黑人女性係無資格着象徵純潔嘅白色婚紗，就連行入婚紗鋪試着都唔得... 所以英國有位94歲黑人婆婆Tucker一直都唔敢想像有得着婚紗，就連當年同老公嘅婚禮，都係求其喺牧師屋企宣誓。因為當年連一個傳統婚禮，都係黑人夫婦唔敢奢求嘅。好在婆婆婚後一直同老公相處甜蜜，雖然着唔到婚紗出嫁，但就嫁咗畀愛情，連孫仔都有成11個～
.
直到最近婆婆同一班孫仔孫女睇戲，其中一幕做到男女主角結婚行禮，婆婆無心咁講咗句：「我都想試下着婚紗係點～」，一眾乖孫先知原來婆婆係從來都未有過一個正式嘅婚禮。於是幾兄妹夾手夾腳，喺幾日前幫婆婆預約去試婚紗同影相，希望可以實現婆婆遲嚟咗接近70年嘅心願，勁sweet！！！
.
當日婆婆全程都表現得好緊張，一早起身準備化妝，到咗婚紗鋪後試完一套影完相，因為怕麻煩到人，仲好小心翼翼咁問職員可唔可以試多一套。着住婚紗行出嚟一刻雖然怕醜，但都難掩笑意，令在場所有工作人員都覺得婆婆勁cute～ 最後婆婆表示自己今日好開心，更加一度哽咽，話如果當年結婚都咁靚就好，咁老公就可以見到佢着住婚紗個樣（爺爺喺多年前過身），好希望佢睇到咁話～
.
對於婚禮，有人鍾意大排筵席，有人鍾意細細地邀請重要嘅人就夠，但相信人人都希望盡善盡美。或者對於婆婆嚟講，最完美嘅婚禮，只係可以返到1952年，着住一套普普通通嘅classic白色婚紗，拖住爺爺行入教堂吧！
.
愛情美在簡單，同樣貴在知足，小編相信爺爺喺天堂都一定有睇到婆婆着婚紗靚靚嘅，嗚～
.
資料來源：華盛頓郵報
.
#無咩事小編返出去繼續喊下先 #婆婆想着婚紗想咗好耐 #但最想都係爺爺有睇到呢幕 #然後講返句你今日好靚 #情侶 #愛 #愛情 #語錄 #拍拖 #香港 #女朋友 #男朋友 #影相 #攝影 #結婚 #婚紗 #浪漫 #愛情故事
.
睇咗笑完就算？不如追蹤埋我哋啦！
即Like @港式情侶 HKstyleCouple 收聽更多港式愛情趣事、一齊學識點樣愛❤️
IG : https://instagram.com/hkstylecouple
歡迎DM投稿戀愛趣事/愛情煩惱，我哋等緊你㗎😙！
然後講返句你今日好靚 在 #然後講返句你今日好靚 - अन्वेषण गर्नुहोस् | Facebook 的美食出口停車場
Facebook मा #然後講返句你今日好靚अन्वेषण गर्नुहोस्. ... <看更多>