突然又已一年，期望再會面，舊朋友...
《後面位同學嘅「我的志願」─ 葉繼歡》
(純粹懷緬過去文章)
今時今日，一個完美嘅細路當然係要有愛因斯坦嘅智慧，奧運選手嘅體能，習近平嘅schedule，同渴望拎到諾貝爾和平獎嘅決心啦。最近朋友嘅朋友個仔面試幼稚園學前班，畀人問「你有咩志願呀？」。都話唔可以輸喺起跑線上，個細路得兩歲，都要問「我的志願」。
「我的志願」呢個作文題目，小學出現過，由於當時我比較無知，將來做咩？我都係參考返本英文教科書。由於當時教嘅職業生字唔多，班入面大約有4分1 嘅同學係做firemen 同埋policemen嘅，另外有大約4分1 畀人話冇大志嘅同學係想做driver，仲有4分1應該有妄想症嘅同學係想做doctor 嘅。其餘我都唔記得啦，當Others啦，但我好記得我後面位同學嘅「我的志願」，佢睇左當時嘅「今日睇真D」，佢寫左葉繼歡。先生怒髮衝冠，「繼歡」同學最後係要re-do。
(講下邊個係葉繼歡畀年紀輕嘅小朋友知，葉繼歡因為打劫金鋪sss，「今日睇真D」成日報導。)
－－－－－－－－－－－－－－－－－
「我的志願」？當然係一時一樣，隨住電視劇而改變啦...
→ 第一個志願係衛護世界和平，睇咁多《美少女戰士》，大左仲唔輪到我保衛地球。
→ 睇《情濃大地》個時，幾想做農民呀，最緊要係唔使讀書。唔只我咁諗，有幾個同學都將條冬季長褲捲到變熱褲，落雨個時踩落個水氹到，一嘗落田嘅滋味。
→ 我承認我當時係有D 無知，睇《肥貓正傳》個時，見到肥貓喺庇護工場入筷子入得幾爽，都有幻想呢個簡單嘅工作幾適合我。後來我睇得肥貓多，學佢縮膊頭比呀媽掌摑之後，就打消左呢個念頭。
→ 睇《美味天王》個時除左不停唱mamamama mia之外，都激發左我做食家嘅夢想，當時，我每晚都會彈一彈呀媽煮D 野唔好食。
→ 睇《還珠格格》個時，係想做容嬤嬤，我呢D 成日畀人鬧嘅細路，當然想好似容嬤嬤咁係唔係都鬧人啦。因為要模仿跪見皇上，我跪瘀左個膝頭；仲因為不停拎屋企紙巾盒D 紙巾，扮容嬤嬤攝係加拿大個條絲巾而再次畀呀媽掌摑。
－－－－－－－－－－－－－－－－－
播《烈火雄心》個時，終於都因為喺屋企實習fireman 嘅工作出事...
當時，我練習緊救3級火。屋企冇雲梯唔緊要，碌架床條梯啱哂。當我好努力咁訓練爬「雲梯」時，仆街喇，估唔到我個頭生長速度咁迅速，我個頭攝左喺條梯個窿到。本來我覺得唔可以樣衰，要保持鎮定，逃出生天。掙扎左大約3 至30 分鐘，終於頂唔住大叫媽咪。呀媽扯返我個頭出黎，再鬧左我3至30 個星期，仲喺接我放學個時，同3至30 個同學仔媽咪sss開心share，「我以後都唔敢啦」。
扮完fireman ，我改過自新，大大下都唔記得「我的志願」。當我開始學能測驗特訓，我就明白，根本唔係我想做D乜，而係我可以做D 乜。大大下發現，人生唔係好盞，唔係樣樣比你揀。AL揀科，畢業JobsDB，係用multiple choices嘅刪除法，eliminate 哂做唔到嘅野，有咩剩咪揀咩囉。
－－－－－－－－－－－－－－－－－
講返「葉繼歡」同學，點解先生唔睇埋佢點解想做「葉繼歡」先叫佢re-do 呢？我諗「我的志願」嘅marking scheme只有英文教科書個幾樣職業。我打從心裡覺得「繼歡」同學好有創意，奈何香港包容唔到與別不同嘅細路。好多野就好似選特首咁，冇得你揀，但我仍然相信而家冇得揀，唔代表要排除有得揀嘅可能。所以，唔好一野打沉D 「創作力量同幻想會嚇你一跳」嘅細路。
PS. 幾年前，喺Facebook搵返哂30幾個小學同學 (我4至6年級都冇轉過同學)，真係有人做左teacher，有人做左policeman，個4分1 有妄想症想做doctor 嘅同學冇一個做doctor。至於「繼歡」同學，好彩佢冇入到赤柱監獄，佢做左酒店廚師。實現唔到志願睇來唔係壞事，尤其係你嘅志願係葉繼歡，實現唔到係比較好。
烈火雄心線上 在 古天樂劇集| TVB Drama | 烈火雄心01/43 | 王喜、關詠荷 的美食出口停車場
自小立志成為消防員的駱天祐（王喜飾），與好友司徒拔（鄭敬基飾）及吳大興（錢嘉樂飾）一同投考消防訓練學校，於校內結識了英俊寡言的劉海栢（古天樂 ... ... <看更多>