【歌在人心 大膽創新 羅文——十問】
1.聽講羅文一開始係唱英文歌？
答：無錯，之前都講過羅文其實一開始係夾band唱英文歌，尤其係Beatles嘅歌。之前廣東歌未流行，加上當年Beatles紅遍全世界，唱廣東歌會比人覺得唔夠潮甚至會比人覺得cheap，之前大多數人都係唱國語歌或者英文歌。許冠傑嘅蓮花樂隊，泰迪羅賓嘅Teddy Robin and the Playboys，Joe Junior 嘅 Joe Junior and The Side Effects等樂隊全部都係唱英文歌。
2. 佢之後唱過國語時代曲？
答：係呀，佢「山歌戀」歌唱比賽之後受到作曲家王福齡欣賞，60年代尾做左電影嘅幕後代唱或者唱電影插曲，當時廣東歌仲未流行，所以就唱國語歌比較多。最出名嘅國語歌就有《愛情的代價》、《水仙》等。之後，佢就去左日本發展，出左幾首單曲。
3.咁佢點解會忽然間翻黎香港唱歌？
咁係因為無綫1977年喺日本叫佢翻黎唱《前程錦繡》嘅主題曲，其實《前程錦繡》係一套日本嘅電視劇，本身係由中村雅俊做原唱，咁無綫買左呢套日劇之後就搵左羅文翻唱主題曲。《前程錦繡》一出之後爆紅，羅文發現香港似乎有發展空間之後就決定留喺香港發展。
之後羅文仲同原唱中村雅俊一齊合唱呢首歌，仲喺屯門兆康苑拍左個mv架！（文末有link重溫）
4.聽聞佢之後都係唱電視主題曲而出名？
答：無錯，之前都有講過佢係唱《前程錦繡》、《家變》同埋《小李飛刀》之後爆紅，《射雕英雄傳》就再創高峰。呢d全部都係同名電視劇嘅主題曲。70年代大家對電視劇主題曲都為之瘋狂，因為果個年代大家都開始有電視機，睇電視對個個黎講都好重要，所以電視劇嘅主題曲就當然會非常流行。
5.《家變》呢首歌好似好大突破？
答：《家變》呢首主題曲的確好大突破，當年廣東歌好少好少唱d具有哲學味道嘅歌曲，通常以情歌或者小數勵志歌為主，而「知否世事常變，變幻原是永恆」呢句說話更係唱到街知巷聞。呢首歌亦都係羅文同埋黃霑合作嘅第一首歌，黃霑話當時去錄音室睇羅文錄呢首歌，一聽到佢唱最後嘅「永恆～～～～～～～～」佢話：「走得啦，食宵夜啦，仲睇乜鬼呀，梗好啦！」（文末有link重溫）
6. 話說《書劍恩仇錄》點解佢又唱鄭少秋又唱？
答：唔講你可能唔知，秋官嘅名曲《書劍恩仇錄》原來羅文都有份唱，黑膠上面都有收錄佢嘅版本。《書劍》係1976年嘅作品，比1977年《前程錦繡》早一年，當時羅文仲喺日本發展緊，無綫叫佢翻去香港唱，唱完羅文就翻日本，點知無啦啦發現「點解有兩個版本？」當時播呢套電視劇嘅時候仲要一晚鄭少秋版本，一晚羅文版本，或者片頭就秋官唱，片尾羅文唱。顧嘉煇就話其實當年係仲係鄭少秋嘅女朋友肥姐介入推薦秋官唱呢首歌，所以出黎就無啦啦有兩個版本（參考新聞，下面有link）。
7. 聽講佢出過概念專輯？
答：1981年，羅文出第一隻出概念專輯《卉》，農曆新年推出，裡面全部嘅歌都係用花黎命名，可以話係一大突破，當年係好少/甚至無概念專輯呢個concept，偏偏羅文就係別出心裁。裡面最紅嘅歌就當然係《紅棉》，呢首歌係鄭國江老師寫嘅，本身係寫俾另外一隻唱片，點知隻唱片出左之後無左呢首歌，點知佢最後知道原來羅文好鍾意呢首歌，想放入《卉》裡面，農曆新年再推出（參考自羅文·歌在人心第二集）。而《卉》上面嘅大字就係張徹導演嘅手筆（參考光與影的集體回憶3）。
無幾耐，又係1981年，羅文出左第二隻概念專輯《仲夏夜》，主題係夏天。《仲夏夜》係一隻充滿左爵士味道嘅碟，當年點會有廣東爵士樂？所以羅文前衛就係咁解。買呢隻專輯另外送一隻碟叫做《末了情》，呢隻碟嘅封面更加係用羅文嘅全裸相做封面，係超級大嘅突破。
8. 全裸？
答：全裸。羅文係香港第一個公開全裸寫真嘅男藝人。
話說羅文影《仲夏夜》呢隻碟嘅相嘅時候，其中有一張就係上身裸露，下身就白褲。但係羅文話當時影相嘅全部都係朋友，咁就無啦啦建議著泳褲半蹲咁影相。點知影影下褲都除埋........本身話自己留念，點知比唱片公司流左出去，仲要做埋附送碟《末了情》嘅封面....... （參考自無線節目-歌在人心-羅文 第二集 14:13）
9. 羅文有無歌係備受爭議？
答：有，《波斯貓》。潘偉源作詞，「床上你相送溫暖深宵」、「不穿衣衫多麼俏」呢d句子當時評為意識不良，教壞細路，冒犯女性。潘偉源就喺港台節目《不死傳奇》話：「最後果句搖著尾擺腰扭腰低叫，人點會有尾？由頭到尾都係講緊一隻貓。」
10. 獅子山下呢首歌有咩特別？
答：一路以黎，大家都係覺得羅文呢首歌係最值得留意，最值得讚嘅歌。原來呢首歌其實無咩故事，一開始推出嘅時候仲係無咩反應，之後有人甚至係覺得呢首歌係被過分吹捧。呢首歌原來係大約90年代嘅時候好多人加多左個「香港精神」嘅意義上去，先突然之間又紅翻。呢首歌本身原來只係一首簡簡單單嘅電視主題曲。當然，呢首歌對依家好多香港人嘅意義都非常重大，呢件係一件好好嘅事。但好多人依家對羅文嘅認識就只有「獅子山下」，其實，羅文有更多值得我地留意嘅好歌。
第一頁封面照片：羅文《卉》封面照片
第二頁羅文《仲夏夜》唱片封面（左下角）link：https://www.hkmemory.hk/MHK/collections/Roman_Tam/All_Items/images/201710/t20171010_86798_cht.html
第二頁羅文唱片《卉》封面（右上角）link：https://www.hkmemory.hk/MHK/collections/Roman_Tam/All_Items/images/201710/t20171010_86799_cht.html
第三頁羅文《末了情》唱片封面link：
https://www.hkmemory.hk/MHK/collections/Roman_Tam/All_Items/images/201710/t20171010_86797_cht.html
第三頁羅文全裸照片來自無綫羅文·歌在人心特輯（15:11）：https://www.bilibili.com/video/BV1gs411Y71B?p=2
參考片段：港台節目-不死傳奇 - 羅文 https://www.youtube.com/watch?v=O1ywoDeiZj4
名曲滿天星第一集（2001）：https://www.bilibili.com/video/BV12x411y79Z?p=1
羅文·歌在人心第二集《卉》故事（大約12:48）、全裸相故事（14:39）：https://www.bilibili.com/video/BV1gs411Y71B?p=2
名曲滿天星第一集：黃霑&羅文《家變》（大約12:55）：https://www.bilibili.com/video/BV12x411y79Z?p=1
名曲滿天星第一集：《書劍恩仇錄》故事參考（大約15:55）：https://www.bilibili.com/video/BV12x411y79Z?p=1
參考書籍：光與影的集體回憶3 翟浩然著
羅文同中村雅俊合唱《前程錦繡+俺たちの旅》：https://www.facebook.com/146533479393352/videos/434685443733773/
羅文&秋官《書劍恩仇錄》故事參考：https://hk.appledaily.com/entertainment/20121202/KDEEDLU6BY3URDZBVWKKMDPYSI/
潘源良泰迪羅賓 在 泰迪羅賓- 維基百科 的相關結果
泰迪羅賓（英語：Teddy Robin，1945年3月20日—），原名關維鵬，香港知名歌手、詞曲 ... 泰迪羅賓值得一提的音樂作品是概念大碟《天外人》，歌詞由潘源良一手包辦，是 ... ... <看更多>