ViuTV《黑市》第八集「黃牛」諷刺時弊，內容太多，影響說服力。
有睇今集的，應該有這個同感，飛左條女咪乜事都冇咯，唔駛搞到命都無，今集的故事教訓是：「有女未必好，自自在在做毒L仲著數。」不過，真係要讚casting，那個港女女友入型入格好掂呀！
香港人由細到大都識炒，由細路炒閃咭，網上遊戲炒刀劍，足球game炒美斯，炒波鞋、炒玩具、炒演唱會飛、炒股、炒樓⋯，總之搵到快錢的便去炒，這種風氣已經深入骨髓，鬧到無用！因為唔想益黃牛/炒家，個人索性戒了睇演唱會、追炒鞋及追Hot Toys玩具，發覺慳唔少。
透過炒演唱會黃牛票去諷刺時弊，當然是個好點子，不過，除此之外，這劇主角阿良(詹朗林)是個無人留意、無人認同的小人物，因為搵到演唱會飛找到存在感，於是為這種飄飄然的感覺不惜一切，是諷刺炒風外另一條主線。還有另一條線是為了呃like可以去到幾盡，此外還涉及殘廁搞野的新聞，旺角天台掟鏹水，國內賣腎換iPhone的新聞變成割腎換子華神飛的劇情，仲要有鬼同埋那個神秘牛頭為乜要俾飛人？要靈魂交換嗎？相對於之前幾集，只得幾個演員，一兩個景，故事簡單，感情位可以寫得深刻點，今集變了另一極端，景多外，演員表成三十人(監製居然批準咁超支)，故事也較複雜，相當重料，但去到後段玩到割腎都唔收手，已經過了點火和未夠說服力，尤其是自己割腎仲唔死一幕，有點講唔通。
主角詹朗林是NowTV主持出身，應該是首次做劇集主角，這個小人物角色掌握得不錯，支持新人，希望以後多點見到他的劇集演出。對我個人來說，這故事最正結局應該是飛左，甚至殺左條女，毒L重新過回打機、上網、砌模型的幸福快樂宅男生活😆
#黑市 #過夜 #ViuTV
#監製 #柳瑩
#導演 #編劇 #劉翁 #王貽興 #詹朗林
