今日七一遊行出乎意料比朝早同晏晝兩次衝擊所「騎劫」，特別係晏晝衝擊立法會，就連遊行路線都要被迫改道，基本上可以預期傳媒已唔會將焦點放響後者上面。
朝早凌晨衝擊目標，原本就在於要阻止升旗儀式舉行，其實當林鄭選擇龜縮響會展睇「遙距升旗」，個目標經已達成咗，只不過班義士希望擴張戰果，於是嘗試向會展推進；但由於保護林鄭同會場經已成為警方第一要務，響超級重兵佈防、再加上朝早人數不足之下（升旗禮成八點幾開始真係痴咗線……當日佔中著名交叉手事件，好多港獨友比左膠恰，連港獨旗都唔比舉嘅原因，就係因為好多港獨派遲咗起身……），有部份人就轉咗金鐘佔路。
呢次亦係警方響放軟手腳多時之後，再次重新啟動鎮壓機制嘅嘗試，相比起612武力等級係輕微得多（至少無用催淚彈同布袋彈），但係施暴一樣絕不手軟：無論金鐘又好會展又好，警方劃低嘅防線就係絕對防線，佢推前你一定要退後，前線一接觸就一定開拖，而且仲唔止第一線，好多企到好後嘅一樣照打照拉。
而家個問題係好多防線二三排嘅學生對於警察突襲根本反應唔切，因為佢地被捕後亦唔識保護自己，所以被捕、被施暴嘅心理準備仲係唔夠，希望下次嗌咪嘅朋友真係要多加宣傳相關嘅訊息。
之後去到十點鐘左右，由於升旗禮已結束，而金鐘馬路本身就已申請咗不反對通知書響12點生效，警察開始全面撤出，而佔路亦開始變得無乜意義，於是有人開始響網上埋怨，點解今次啲策略咁差、尤其係金鐘唔知衝黎做乜。
有關策略問題，響呢度我唔多講，亦唔係好識講，但從來勇武抗爭都唔一定次次成功；當遊行都要成三十年先開始有人醒覺原來無用，你都要預期十居其九嘅衝擊都會失敗──更何況，林鄭龜縮會展，兩枝旗桿換上黑紫荊兼下半旗，原先嘅基礎目標經已完成。
但依我於現場觀察，群眾果種失望仍難免不停累積，而去到下午一點左右再次爆發：一班死士突然用鐵籠車同鐵枝猛衝立法會，嘗試打爛玻璃。
當時立法會入面經已有超過100名全副武裝嘅防暴警察經已準備就緒，用「請君入甕」呢句成語黎形容可以話再適合不過：只要你一衝倒入去立法會，肯定就會被毆打同拘捕。好多立法會議員一見勢色唔對，就嘗試前往阻止，有唔少抗爭者批判議員阻住哂，但我卻唔會苛責，因為當時嘅形勢的確係非常危險，而依佢地嘅判斷，佔領一個無人辦公、無會議召開嘅立法會亦絕無意義。
但我唔知大家有無睇到直播片段，有兩段對話係值得一記，一段係當鄺俊宇同某位抗爭者嘈交，鬧佢地「就算衝擊無錯，而家並唔係時候」之時，有位抗爭者大聲反駁：「今日唔X衝點對得住班死者？」
//毛孟靜：「你哋衝入去，係會當成暴動，要坐十年㗎！入面仲要準備晒槍等你哋㗎！」
有人回答：「預咗啦！已經有三個人死咗啦！我哋預咗啦！」//（已被證實為造假）
我見好多人響網上嘲笑佢地呢個時候衝擊立法會無用無意義，又話一衝入去等如束手就擒係白痴。但呢班人響最前線衝擊，肯定係最了解現場風險嘅人，難道一眾網上軍師會比佢地更加清楚？唯一解釋，就係呢班人根本預咗比人拉比人打，有去無回，換言之，係一種另類自殺。
響之前我已講過，好多人以為和理非代表不流血運動，但佢地唔明嘅係，和理非嘅一事無成，係一樣可以迫到人對前景完全感到絕望，然後自殺──當你班黃屍話人係鬼係暴徒之前，有無認真睇過一個絕望嘅人嘅眼神係點？當你地為跳樓喪生嘅義士感到悲傷嘅時候，點解又同時可以用恥笑、仇恨嘅眼光，去鄙視一啲其實係同樣打算赴死嘅人，而原因只不過係路線上嘅分別？
而家呢班人犯下咩彌天大罪？原來就係打爛幾塊玻璃，嘗試衝入立法會；然後有一個問題真係問得好：
「你寧願一個絕望嘅人走去跳樓，定去走去衝爛度玻璃門？」我諗黃屍一定寧願揀跳樓，因為跳樓唔會逆轉香港民意、唔會比政府有口實鎮壓、唔會激嬲共產黨，仲會刺激更多人遊行，更加彰顯和理非嘅偉大添──成撚日問衝入去有咩用，跳樓最撚有用。
