【名家搶先睇】如何分析股票集團和派系（渾水）
淡靜的市況慢慢把不少市場玩家淘汰，以戰養戰，留下有用之身才是現在安身立命之道。個別的市場玩家雖然不相熟，但多是點頭之交，雖然網上常言睇人PK最開心，但別人落難何必落井下石。而且，我覺得部分玩家年輕有魄力，等一個浪一個機會就可以回來了。每一次有玩家爆煲，媒體朋友或投資慣性順藤摸瓜去了解涉事人背景、背後相關集團、派系之類。
最簡單的方式當然是睇人物關係，同姓同宗同族可以是一系，董事、公司秘書等高級管理層可共用，觀察他們坐什麼公司也可略知一二。我部份累積股票人脈知識的方法係靠睇娛樂雜誌，首推以前的壹週刊。因為部份市場玩家唔喜歡自己持有股票，可能搵女朋友和紅顏知己代持，查找幕後戀人關係唯有從娛樂線找線索。睇富豪媾女和睇煮食節目都有一個大共通點，就係有得睇無得食，有識之士如我初初睇這些花邊八卦會覺得好難頂，覺得無甚營養，但如果用股票研究角度入手，觀感就會fit晒。
現在老牌有錢家族開始分家，同姓同宗都未必是同一房人，所以當成一個股票派系分析時又要明白當中親疏之別。經過幾年的觀察，多得我們這些鑄字多口的八公，公眾、媒體甚至監管機構都掌握了部分分析市場股票的技巧，數倉數手花已經淪為入門技能。有時候我會覺得做custodian有點冤枉，有一些股票存放在個別證券行，技術上只能證明是代持關係而已，不一定代表證券行背後的老闆就是幕後人。不過，證券行老闆卻常常被老看成金主。當然，證券行有孖展可借，挑選特定證券行可能為了迎合抵押股票的財務需要，不過這是背後上市公司和證券行之間的互相協定，我們外人不會知道，邏輯上不能推論出金主和債仔的關係。我會同意，現行機制對於抵押股票的公眾透明度不算高。
公司和公司之間的商業合作可能是一次過，project based，不一定是長久合作關係。不過，這類資料公眾不易知道，所以有一些公司的一次性合作都可能被歸邊看成是某一個派系的附屬。例如，全香港搶殼最叻的只有一家，基本是你聘請佢做顧問就贏定了。
就算你唔搵佢做野，都要mark實佢，因為慎防他去了對家。我在此君身上學到甚多，光吃一餐飯已經功力大增，是聽君一席話勝讀十年書那種。所有派系要搶公司都搵佢幫拖，但這些搶殼刁多是project based，做完一次甚少翻頭再做。好像他這樣靠技術做出名堂，已經不能再用派系的視覺去睇，他不隸屬任何人，而是隸屬有需要的人。當然，我主觀覺得，灣仔某大廈的相熟朋友可能會有少少價講、打個折頭吧。
http://s.nextmedia.com/realtime/a.php…
