讀者投稿《成日鬧我自己阿媽篇》
知道大家講親嘅個案多數關於土地問題，即係要同老爺奶奶住。
利申：我自己本身搬出黎住。
而我要分享嘅唔係人哋嘅老母，係我自己嘅親生老母。
交代少少背景：我阿媽一向對我呢個大女極度嚴厲，對我弟弟就似慈母上身。由於娘家比較細，得兩間房，我阿媽好早同我講： 「你搵得錢多 唔該你搬走啦。」
佢仲身體力行幫我搵埋租盤，就係希望我讓間房俾弟弟。其餘嘅生活小事，佢都好似「百彈齋主」乜都話我做得唔好，所以有咩事我都盡量自己出錢出力搞掂佢，唔好求自己阿媽幫手。
前兩年到我自己結婚，我同我先生都負擔得起，所以一毫子都冇問屋企攞，自己置業同擺酒席，最主要係唔想阿媽又彈三彈四。
因為我女家比較多人，兩家加埋35圍，我哋兩公婆都要諗方法慳下荷包，於是搵咗全香港top 5內酒店搞lunch buffet，希望搞得得體又平少少。
1)Book咗場地再通知阿媽
佢一聽到lunch buffet 就指住我嚟鬧：
「你咁cheap Lunch buffet? 我點同我D 親戚講？你影L衰我呀！」（ps我阿媽一向用粗口鬧我）
反而我奶奶冇乜所謂。
2)一早聽聞外母同奶奶因為着晚裝嘅問題會爭妍鬥麗，搞出好多是非。所以我不停問晒佢兩個，需唔需要幫佢租晚裝，（其實主要想我一條龍服務，咁我就知道佢哋各自著幾多件衫，希望數量睇齊）。
兩位太后話會自己搞掂。
我仲特登用WhatsApp問留record ，我奶奶真係好乖全部自己一手包辦。點知我阿媽堅持同我出去租褂，事後Sales多口問一句使唔使睇埋媽咪衫，我阿媽當住咁多人面前鬧我「你點解唔同我安排呢啲嘢？你一個人靚晒就得啦！你結婚唔使理我㗎？」講到我好似虐老咁。。
3)買金器：我阿媽自己買得好高興，仲買金器比佢自己戴（乜有外母帶金器咩？）我阿媽自己買一對鈪同一條頸鏈俾佢自己
我好肉赤爸爸要使好多錢。。。之後媽咪同金鋪要求訂足三両既豬牌。
（因為奶奶覺得豬排好娘 但係媽咪覺得豬排先夠大體 所以佢哋兩個傾好咗會掉轉買）
我同金鋪講，二両其實已經夠，我寧願買少啲俾我，唔想爸爸用咁多錢。出咗金鋪門口，我阿媽捉住我黎鬧，話我份人咁鬼死小家，響外人面前影衰佢。當時仲要我老公在埸。我阿媽都唔會俾面照鬧我。
隔咗兩個禮拜左右，我同老公響娘家食飯，我阿媽忽然上身又鬧我，話我表姐五年前結婚都冇買咁多金器，係我先咁奢侈喺度充大頭鬼（下？）
我老公響側邊都話，你阿媽係咪失憶？定係精神病發未食藥？
4）我阿媽成日要我交過seating plan俾佢，其實佢想將佢啲friend坐近啲個台。(我當然知道佢想點)，所以我一早俾功課佢做，叫佢執好咗佢攞個女家十圍先，唔使問佢梗係遲遲未交功課。臨結婚前兩個禮拜兩家人一齊食飯，我奶奶順口叫我老公俾個seating plan佢睇，我老公求其答好啊 （其實從來冇俾過）我阿媽當場聽到黑晒口面，突然間指住我黎鬧（響奶奶屋企人面前！）話嘥錢租件咁靚嘅褂俾我（關咩事？仲有其實我老公唔鍾意我着到咁金，但係我阿媽話唔可以影衰佢指定我要着咩款）其他人當場呆晒，各自返自己屋企之後，我老豆仲特登揸車話過嚟搵我講兩句。一聽就知來者不善，我推咗我老公去見我老豆，我老豆代我阿媽表達不滿，問點解seating plan唔俾阿媽過目？我老公同佢解釋返只係順口答，根本冇老人家可以決定seating plan，
我老豆同我老公講，叫我小心講嘢，唔好再激嬲媽咪，我老公忍唔住叫佢哋講下道理，我老豆話佢冇興趣知道誰是誰非，佢只希望一家人齊齊整整唔好鬧交。既然我一向就開我阿媽，我應該繼續就佢。
5）我細佬都係一個唔生性嘅人。我結婚嗰日，原來佢同我一位朋友有爭執踫撞。我細佬發晒癲話要出律師信告人哋，呢次我老豆都知係我細佬唔啱，一早同我通風報信叫我唔好理佢，咁我當然唔會交個人名俾我細佬啦。之後我阿媽又跳出來，叫我夾份做場戲，話我已經出律師信俾我個朋友。我話唔好發神經啦，我細佬今年都32歲，細路仔咩要氹？
事情演變到我細佬嬲咗我，話我唔企佢嗰邊，我有一個月冇返娘家，咁岩撞正我細佬差唔多生日，我阿媽打俾我叫我一定要返屋企，仲叫我買定蛋糕唱生日歌比細佬聽，我同你講你唔好痴線啦唔該！我阿媽突然響電話鬧我「你唔好以為自己拎多啲錢返屋企就巴L閉。」
嗰一刻我跳左制，之後冇再返過屋企。
退一步未必海闊天空，可能只係姑息養奸。
#退一步海闊天高
#我的極品四大長老
⬇設計圖片
