今仔日下晡 tiám 花蓮縣政府
共 #開放水域聯盟、多位水域活動愛好者、業者、民意代表
針對 #水域開放議題
共海委會李主委、縣府相關主管單位對談
李元治理事長講，
縣政府 ê 禁止規定其實是無法度執法--ê
因為「等深線20公尺」是一直會變動--ê
滿流、洘流、水底 ê 沙攏會變化
啥人會知影「等深線20公尺」
具體範圍到底是 teh 佗位？
我佇會中表示：
我綴宜蘭來
宜蘭 teh 頭城是衝湧真有名的所在
烏石港嘛有賞鯨 咱花蓮這嘛是賞鯨真有名
嘛予地方紮來真濟觀光的利潤
阮到海外旅遊
定定攏會參加水上活動的行程
嘛是重要的觀光行程
但是 teh 咱台灣
這款活動攏受著真濟限制
這个產業嘛無法度發展
頂禮拜
我嘛頭一擺參加聯盟辦理 ê 活動
嘛是直接就落水去耍 閣耍兩工
全程有穿救生衣 基本上嘛無啥物危險
而且團體活動 逐个會互相看顧
嘛有十三、四歲個國中生來參加
可見只要有適當的裝備 kah 訓練
包括囝仔嘛會使安全來𨑨迌
彼兩工咱的航程
欲落水 kah 上岸的時陣
攏有海巡用大聲公對阮喊
不准咱下水，嘛不准咱上岸
按呢敢毋是真奇怪?
而且
咱來花蓮遮 扒船、耍水
明明就是 teh 發展觀光
結果竟然愛予縣政府依據「違反發展觀光條例」的理由來裁罰
我感覺這是非常離譜的一項代誌
另外，
就我所知
中(華民)國與北韓是全世界唯二猶閣有海禁的政府
所以我認為問題的核心：
需要管制的理由是啥? 依據閣是啥?
而且
地方政府 teh 限制時
其實攏是隨在地方政府
嘛無一个標準
in 欲按怎規定就按怎規定
講欲限制就限制
時間？範圍？理由？
是按怎欲按呢規定？
完全攏無解釋
in 對岸中國是「一國兩制」
但是 teh 咱台灣這竟然是「一島多制」
現況的「戒嚴」、「禁止」
是予海岸共人 lú 來 lú 遠
這馬救難能量更無法度達到各海岸
親像頂禮拜咱 ê 終點站和仁沙灘為例
這是無限制 ê 區域
但這區連救護車攏駛袂入去
所以只是「禁止」其實等於無管理
敢講插一个警示牌仔就算是有管理？
公告禁止敢就是有管理？
其實就是無管理
每一擺抗爭都是有申請
警察、海巡來一大陣
結果無申請時紲攏無人嘛無代誌
若真正欲管
會當裝監視器、派救生員
提供醫療佮警急救援管道
提供保險資訊
予欲下水民眾投保等等
按呢嘛才會當講是有 leh 管理
而且中央法規是「#原則開放_例外禁止」
目前地方政府 ê 限制規定
其實攏無符合法規的原則
嘛有業者講了誠好
台灣海域遮無「海盜」
所以並無「危險海域」
鯊魚嘛無危險
人顛倒較危險
要求欲耍水 ê 人 ài 穿安全裝備
有裝備遇海難，由地方政府投保 ê 保險理賠
但若無裝備下水出代誌，就無理賠
在場人士包括民意代表
攏徛佇希望趕緊開放 ê 立場
海委會李主委嘛表達蘇院長宣示開放 ê 態度
嘛講著這馬政府已經無閣使用「危險海域」這个概念
改用「海域風險評估」
評估這个所在會當從事佗一種海域活動?
適合啥物、無適合啥物？
全台分 57 ê 區域來檢討
東部海域較無國防疑慮
若是無定置漁網 ê 區域
嘛應該優先來開放
對話過程算是真順利
嘛希望誠緊就會當有好消息！
最後嘛講著相關 ê 措施
閣紲落來若是有佇別 ê 縣市座談
會公布 teh 海委會「一站式」網站
https://ocean.taiwan.gov.tw/
#水域解嚴 #還海於民
