"Drive to Survive" — Season 1 (之二：手車快不如有靠山) https://link.medium.com/PWcHyFoNk5
//
由 Netflix 製作嘅 “Drive to Survive” 呢套紀錄劇集 (抑或係「紀實劇集」？) ，第一季由於冇兩大車隊平治及法拉利嘅參與，自不然將更多篇幅放喺一眾二三線車隊身上。
講 Underdog 有 Underdog 嘅好處，畢竟睇贏家如何獨領風騷、分享自己成功之道嘅嘢，觀眾都睇唔少。反而係成班二打六，本來面目模糊，能夠透過近距離接觸及訪問去令佢哋從大眾臉變返做有血有肉有特色嘅車隊同車手，相信都會令觀眾有所得著。
至少，以前我連 Sauber (沙巴車隊， 2019 年以 Alfa Romeo 名義出賽) 同 Haas (哈斯車隊，來自美國， 2016 年加入 F1 賽事) 都分唔清楚，亦對於 Williams (威廉士車隊) 何以由 90 年代叱吒一時，呢兩年淪落到敬排末席感到不解。睇完 “Drive to Survive” ，我雖不致於「完全明白了」，但係起碼知道個所以然。
- - -
如果話上一篇文介紹嘅「四萬哥」列卡度係眾人寵兒，咁樣喺一級方程式界別，備受唾罵同恥笑嘅車手，至少有呢兩位：哥桑 (Romain Grosjean) 及史杜爾 (Lance Stroll) 。
哥桑來自法國，早喺 2009 年已經出戰 F1 ，不過表現實在普通過普通法 (oh sorry) ，嗰年賽事一分都冇攞過。後來自從 2012 年哥桑代表蓮花車隊 (Lotus) 出賽，連續兩年作為拉高倫嘅副手，成績反而相當之突出，曾經七次奪得季軍而企上頒獎台。
奈何哥桑更加出名嘅，係佢自炒嘅能力。例如話，喺 2018 年嘅阿塞拜疆站，當安全車出動嘅時候，大家各自扭左扭右去保持車呔溫度嘅時候，佢就有本事無之啦啦失控然後炒咗埋欄，白白失去排第六嘅攞分機會。又例如話喺 2019 年英國銀石賽道上，排位賽期間出 Pit Lane 無啦啦自炒，認真莫名其妙。
如果大家上 Instagram 睇 F1 啲 post ，唔難發現哥桑係車迷調侃嘅對象。不過同哥桑相比，車迷對於史杜爾嘅嘲諷就更加強烈，甚至帶點不屑。無他嘅，大家都係仇富嘅，而史杜爾本身就係含住金鎖匙出世，佢老豆 Lawrence Stroll (本姓 Strulovitch) 係時裝界大亨，將 Pierre Cardin 及 Ralph Lauren 等名牌帶到加拿大，更喺 2011 年促成 Michael Kors 上市。
有個富爸爸， Lance Stroll 嘅 F1 賽車手夢想就快人一步、理想達到。當佢喺 2016 年、第二年征戰歐洲三級方程式 (F3) 並奪冠之後，就以 18 歲之齡殺入 F1 喺威廉士車隊佔一席位。當然，背後促成其事嘅，係佢爸爸 Lawrence 斥鉅資贊助威廉士車隊，就好似香港啲家長畀錢買啲私立學校嘅 debentures 咁，「買個位」返嚟囉。差在香港家長買學位， Lawrence 就幫寶貝仔 Lance 買「車位」，揸車嗰個席位。
根據德國傳媒 Auto Motor und Sport 報道， Lawrence 前後使咗超過 8,000 萬美元 (都接近六億港銀) 令史杜爾晉身一級方程式車手嘅行列，包括喺史杜爾仍然征戰 F3 期間，就買起咗成支車隊，並重金羅致工程師培育史杜爾成材。
咁 F1 研究、開發賽車及配件，樣樣都係錢，時值中衰嘅威廉士車隊，遇上 Lawrence Stroll 慷慨解囊撥款贊助之下，都只可以向乳臭未乾嘅 Lance Stroll 張開雙臂，恭迎聖「駕」。而事實證明，錢解決到嘅，其實唔係問題，因為威廉士車隊嘅表現，尤其是喺 2018 年，實在令人慘不忍睹，車隊全季只獲得 7 分，喺 21 場賽事入面，只有兩場有車手排到前十名，成績係十支車隊當中最差嘅。
Lance Stroll 亦基本上冇為車隊留下任何情面，佢喺 “Drive to Survive” 嘅片段入面，多次批評車隊嘅戰駒速度慢、唔夠快、冇速度。再剪接埋 Lawrence Stroll 擰擰頭嘅場面，以及威廉士車隊副主事人 Claire Williams (車隊創辦人 Frank Williams 嘅千金) 一臉茫然嘅模子，大家都知道呢段充滿銅臭味嘅結合註定冇好收場。
- - -
與此同時， Force India (印度力量車隊) 金主 Vijay Mallya 面臨洗黑錢及金融詐騙等指控而被凍結資產，車隊水喉被閂而被接管， Lawrence Stroll 就有機會成為車隊班主。結果， 2018 年 8 月，即係印度力量被接管嘅一星期之內，史杜爾家族就正式入主，並將車隊改名做 Racing Point 。
本身「印度力量」車隊就有兩個車手嘅，一個係墨西哥人 Sergio Perez (佩雷斯)，另一個係法國平民車手 Esteban Ocon (奧干) 。咁 Lawrence Stroll 成支車隊買起咗，囝囝 Lance 穩奪 2019 年一席位就成為公開嘅秘密。
咁究竟係佩雷斯中定係奧干可以留低呢？撇除兩條友為咗爭位而勾心鬥角，喺競技場上甚至超技術地撞對手埋牆之外，講到尾，咪又係鬥邊個帶到多啲銀兩畀車隊囉。根據 “Drive to Survive” 嘅演繹呢，由於佩雷斯背後有墨西哥富商巨賈撐腰，就順利成章地叮走咗年輕有潛質但水喉唔夠嘅奧干。
不過講句公道說話，佩雷斯喺 2018 年嘅成績 (62 分) 其實都係比奧干 (49 分) 略勝一籌，而佩雷斯今時今日都只不過係 30 歲，正值黃金時期， Racing Point 用佢以老帶新，其實都無可厚非。之不過，從佩雷斯與史杜爾喺 2019 年嘅分差 (52 vs 21) ，以及兩人喺排位賽佔先嘅次數 (19 vs 2) 睇嚟，以史杜爾取代奧干，對車隊嚟講可能唔係最好嘅選擇。
又難怪， Racing Point 而家被揶揄為「老豆力量」。有 Lawrence Stoll 源源不絕嘅水源， Lance Stroll 怕且揸到 50 歲都仲得。
- - -
想睇更多賴叔時政見聞、金融掃盲及職場文章，請訂閱 Patreon:
https://www.patreon.com/shuklai
#hk #hongkong #patreon #blogger
法國平民 包 在 Dcard狂推！大一新生最愛6個「高CP值」平價包包品牌不到 ... 的美食出口停車場
這個來自台灣的包包品牌「VEMAR 」是受到法國巴黎啟發，沿襲法蘭西的浪漫與對品質工藝的堅持和要求所創立的品牌。 VEMAR 定位在微精品，非常要求實用的 ... ... <看更多>