我的人生不是我的（下）
上集：https://goo.gl/UezUoH
一去到研究所，研究員好開心咁話我知：「我地清理楊博士嘅實驗室，發現佢對大腦有突破性嘅研究，可以清洗人嘅記憶，並作出有限度嘅改變。」
「咁勁？」我忍唔住問：「點解我從來無聽過？」
「我地都唔明白，楊博士無上報過呢個研究嘅資料。」
研究員雙眼發光：「以研究嘅水平，拎諾貝爾獎都有可能。」
我神色凝重：「我懷疑，我就係呢個研究嘅實驗品。」
研究所對於「非法進行人體實驗」呢件事，十分重視。
佢哋承諾，會無條件為我提供治療。
科學家讀通咗阿媽嘅研究，改造咗儀器，可以幫我修復大腦嘅傷害。
「小姐，手術或者可以幫你搵番記憶，但始終有風險，如果你依加生活幸福，未必要冒險......」
「我一定要做。」我要知道，阿媽點解要拎我黎做實驗品。
手術後，一幕幕嘅回憶重視喺我腦海中，所有回憶......都係爭執。
原來，我對功夫好有興趣，自細就去拳館睇人練功夫。
就算阿媽阻止，我都偷偷喺屋企練功，又真係練出一身好功夫。
成年後，我周遊列國，同各國嘅高手切磋武藝。
阿媽不斷問：「你幾時結婚？再唔結婚就高齡產婦。」
佢嘅勸誡，由細個嘅「小朋友唔食早餐就會死」，變成「女人唔生仔，生存就無意義」。
我唔明白，阿媽係一個成功嘅科學家，點解佢依然會有呢種諗法。
我話我唔鍾意小朋友，佢覺得「生咗就會鍾意」。
我唔享受家庭生活，佢就話「你老咗會後悔」。
我嘅夢想，係功夫大成，拎到世界武術大賽嘅冠軍。
我唔知我老咗會唔會後悔，我只知道，如果我放棄夢想，今日就會後悔。
結果，有一次阿媽打電話畀我，話佢喺研究所受傷。
我即刻趕去研究所，一行入佢間實驗室，我就被迷暈咗。
醒番之後，我變成阿媽「理想中嘅好女人」，一心相夫教子，阿媽就搵朋友介紹咗個男仔畀我，然後我結婚生仔，如佢所願。
因為我同阿媽「志同道合」，關係都愈嚟愈好。
呢件事對我黎講，當然係晴天霹靂。
我番到屋企，二話不說，無留低片言隻字，就執行李走咗。
因為，呢啲根本唔係我想嘅生活！
我要繼續我嘅夢想，周遊列國，同各國高手切磋武藝。
但係，我去到第一個國家，就受到挫折。
原來，我太耐無練武功，加上生仔後又無好好保養，
就算記得番啲招式，都無咗之前嘅功力。
差之毫釐，謬之千里，原本我唔放在眼內嘅高手，都可以輕易打敗我。
我打算重新練功，不過我呢個年紀再黎練，成就有限，武術大賽冠軍......遙不可及。
我喺酒店練咗半個月功，有人敲門，係我老公抱住個仔。
老公神情殷切：「老婆，番屋企啦。」
「你明唔明，嗰啲唔係我想要嘅生活。」我好想同佢解釋。
但我個仔先得四歲，根本唔明我講乜，只係大喊：「媽咪，我要媽咪......」
結果，我番咗屋企。
我仲去咗研究所，問佢哋可唔可以幫我刪除番記憶，等我變番嗰個賢妻良母。
係㗎，呢段人生根本唔係我所期望嘅，我阿媽真係好殘忍。
生命中，總有人想代你做決定，甚至令你嘅人生一塌糊塗。
但係，面對現實、面對屋企人，計較邊個岩邊個錯根本無意思。
人生無回頭路，再唔情願，只可以一直向前行。
反正，大部份人都唔會得到，自己夢寐以求嘅生活。
－完－
將專頁設定為「搶先看」/ "See first"，最新故仔馬上睇！
新書《買樓結婚超能力》現正有售，
係Facebook故仔嘅精選紀念裝，亦有從未面世嘅彩蛋故仔。
詳情可點擊這裡：https://goo.gl/rGbwhi
你的支持是我最大的動力！
#短故 #短篇 #小說 #陳美濤 #廣東話 #粵語#tomatochan #我的人生不是我的
