［非廣告！］強大的屯門人！Donki開屯門舖1500字分析！
1. 再次強調，真係非廣告。當然我好歡迎 DON DON DONKI Hong Kong 搵我拎住隻DonPen 同 Donko 落去影相！（嗰兩隻嘢有名的！Don Pen 係男仔，Donko係女仔！我是鐵粉！仲要港版同日版Don Pen個心口唔同的！）。絶對情熱價格！
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝
2. 720開！致敬返輕鐵720線呀！（應該好多人都唔知係乜）
3. 重點？呢間會係全香港最大！銅鑼灣嗰間都48000尺，即係呢間會去到50000尺，嚇死日本仔，山卡啦有牛嘅大西北都開到咁大間Donki
4. 仲有，開到半夜1點，啱晒半夜肚餓嘅 Ivan！「當然開廿四小時更好」「你出埋糧同電費仲好」。現實係其實屯門啲農民日入而息，通宵舖冇市場乜滯。以前屯門市中心間太興都做到3點定2點，後來都越收越早。根本冇咁多人，除咗我
5. 又，正如佢地宣傳講，屯元天第一店，你可以預期會迫撚到仆街。至少迫爆三個月。因為呢，未開Donki之前嘅屯門市廣場，已經係迫到仆街的了！而我講緊係冇大陸人嚟之後都係咁！根本大陸人唔嚟就有新嘅本地客頂上，永遠都咁多人的。
6. 呢個又帶到另一個重點，好多人都唔知，我話你知：以新界嚟講，屯門市廣場嘅租，相當貴，屯元天最貴固然無誤，甚至貴過新界東絶大多數嘅場，除咗沙田新城市。
7. 即係點？即係，屯門市廣場，唔係你話租就租的。朋友問我，香港有幾多間Donki，咁除咗山頂嗰間唔知計唔計外，好多人都數漏咗，在小西灣藍灣廣場有一間的。
8. 得罪講句，冇常識嘅都知嗰件擺明係豬頭骨，稍有少少常識嘅你係Donki都唔會租。但點解仲租？你班網友醒過日本仔？
9. 答案好簡單：買豬肉搭豬骨。買愛馬士袋？質你買幾個杯幾個萬字夾先！你話買就買？有錢大晒？
10. 同一道理，屯門市廣場，唔係你有錢就租到。你真係唔好咁天真，「呢個世界上好多嘢唔係錢就萬能」。想入屯門市廣場？得。幫我食件豬頭骨，畀啲誠意。你租咗小西灣咪畀你租屯門咯。有乜關係？因為小西灣個場，同屯門市廣場，都係信和的。
11. 其實以上呢啲玩法都好多年，業內人士一定知，你有幸試過要租大地產商嘅場都知道係咁玩。亦因為咁你見啲商場啲舖都一式一樣。即係，唔順超嘅，搬去台東咯。又或者，你見K11 就唔玩呢套，自己整啲其他場冇嘅嘢的。
12. 你見屯門雖然開咗V City，但人流生意都係仲比唔上屯門市廣場，遠少少就係遠少少架啦，香港人好懶的。況且V City個場天生有啲限制，就唔似屯門市廣場咁好行。咁人地早早霸咗嘛。「咁即係新地在沙田一樣打橫行啫」
13. BTW，咁玩法，「一田」同 「AEON」就仆得街。不過根據零售分析員（即係我老婆）講，對「一田」打擊大啲。分析員話「AEON」定價低啲，反而同Donki冇咁重叠。「一田」就（以為自己）高檔路線，最大打擊喎。
14. 當然我唔排除因為分析員之前在新鴻基返工所以有咁嘅偏見。但事實，你發現新鴻基嘅場係唔會有Donki的（美麗華 海之戀 都唔係新地）。因為新地自己有「一田」。可能見好賺自己拎嚟做。咁好合理，正如超市見你啲貨好賣，自己又會private label 百佳牌 實惠牌 Tesco牌 Value 牌搶你生意。（又，「情熱價格」咪Donki 自己嘅Private label）
15. 講到尾都係個巴京拎包華在邊個度，邊個買邊個怕，邊個渣住邊個春袋，所有生意都係咁玩。當然人地賣腸仔好賣，同你去賣好賣，又係兩回事啦。（Value牌啲冇皮腸真係好撚難食）
16. 寫完。諗諗下，古語有云，if you are good at something, never do it for free．照計唔應該免費幫人賣廣告。周星馳平時都係西口西面好古肅，人地搞笑係工作嚟的，你唔係以為佢會娛樂于文鳳下話。
17. 之但係又不過，下下咁計住，做人就好悶（我估周星馳都好悶，不過我有佢咁有錢我應該唔介意）。又聽聞呢，張學友平時同朋友聚會都係照唱歌的，唔會扮晒嘢老子係天王，要聽嘅買CD或者入場聽演唱會。
18. 「即係你地冇訂Patreon我都寫文畀你睇咁咯」「當然最好效果都係去聽演唱會啦」。月尾訂嘅有得回水呀下。
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝
