讀者投稿《十世修來極好奶奶篇》
見到有人讚奶好，我都不得不讚下我奶奶，我真係好感激我老公，如果唔係我唔會遇到一個咁好嘅奶奶，甚至比我老公對我更好!! 就算連我媽咪都話，有好多野佢自問都做唔到好似我奶奶咁咁任勞任怨，叫我一定要好好咁孝順奶奶。
拍拖果陣都會成日同我男朋友(而加老公) 屋企人見到面，已經覺得佢媽咪好好人，都好放心第日應該唔會有婆媳糾紛。
結婚前，我喺自己屋企不時都會做家務，洗碗、拖地洗衫晾衫摺衫，通常都係我同我Daddy做(媽咪比較少做家務haha)。
結婚之後，我基本上係咩家務都唔使做，因為我奶奶會喺我同老公返緊工嘅時間，已經過來我地屋企幫我地做晒(住得好近)。 有時我打算放工返屋企洗衫，放工返到屋企就會發現洗衣籃入面D污糟衫已經clear 左。我老公相對夜放工，閒日好少可以返到屋企食飯，通常都係我奶奶上來我地到煮，煮完我地兩個人食(我老爺成日都唔喺HK)，食完飯，莫講話洗碗，就連我諗住執D碗入廚房，佢都一定唔俾我掂，話唔使我搞，真係掂下D碗佢都會stop我，叫我唔好整污糟隻手。其實我真係好想幫下手，所以有時我會趁佢行開左，拿拿聲執完再快快手拿入廚房洗埋佢。
平時，只要我講一句，我想食D咩，買D咩，奶奶就一定會煮到俾我，一定會幫我買到。同我地出街食飯，佢好中意留意我同老公嗌D咩餸，之後果樣餸就會成日出現喺佢果排煮嘅野入面。奶奶會成日留意我地屋企日常用品有D咩就來用晒，佢就會幫我地補充，沐浴露洗頭水野飲零食，佢都會幫我地準備同補貨。
奶奶覺得我好少食生果，擔心我身體唔健康，就成日買D生果上來，因為驚就咁擺喺到我會嫌麻煩唔食，佢就切好晒，仲要擺埋支叉喺上面，擺喺枱面俾我食。同親奶奶出去買野，超市又好，買個人物品又好，佢一定會爭住俾錢唔會俾我俾，不過我覺得唔可以咁樣，尤其是個人物品，所以有好多時我一定堅持自己俾返，就算好強硬咁塞返落佢銀包都要俾!!! 好記得有一次成家人去旅行，果陣仲要未結婚，我唔夠當地嘅currency，佢隨手就俾左為返HKD三千幾蚊我，又唔肯收返我港幣….不過最後我都堅持要俾返，好彩佢最尾都肯收。佢去澳洲旅行，又買UGG，又買Skincare返來俾我。雖然後來我阿嫂同我講話佢俾人呃左，果對UGG係假的，Haha
我前幾個月岩岩生完BB，有請陪月，連我陪月都話佢做左呢行咁耐都未見過一個奶奶可以對個新袍好成咁。後未陪月同我講返，話我奶奶同佢講，我幫佢個仔生完BB已經好辛苦，一定要我好好坐月休息，唔可以俾我做野。生B之前，陪月上來做家訪，俾左個清單叫我地要買定D嘜，第二日我奶奶已經出去買定晒擺喺到。坐月期間，我媽咪買左盒蟲草俾我補身，我奶奶知道之後，死都話要俾返錢我媽咪，話唔可以連呢D野都要女家出錢，不過最後我又係死都唔肯收。岩岩生完果一個月，奶奶成日都自願留低喺我地到過夜，因為夜晚我就可以好安心咁一覺訓天光，佢就負責幫我餵BB食夜奶。
中間有一段仔時間，其實我覺得自己有少少產後抑鬱，有D不知所措，對未來好擔心，忍唔住喺我奶奶面前喊左，係我奶奶同我講：”傻女，總之無論有D咩困難，都會有我幫你手，萬事有奶奶喺到，所以你千其唔好擔心！” 我好記得佢咁樣同我講，唔知點解我聽到佢講之後，真係即刻安心左好多。好彩呢段懷疑有產後抑鬱嘅時間，只係維持左兩個禮拜左右，後未就冇咩事了。陪月走左之後，我奶奶就代替陪月嘅角色，日日上來幫手湊B，煮飯，煲湯，整燉品，差唔多日日都留到夜晚9點10點先走。其實我知佢都好累好辛苦，但佢為左唔想我辛苦，都堅持咁樣做。有時我見到佢個樣真係好累，我真係會心痛。
奶奶對我嘅好，唔係因為我生左BB，因為就算未有BB，佢都一樣咁無微不至，總之就係樣樣以我地為先，都冇咩點諗自己。
平時我同老公同埋我奶奶3個一齊嘅時候，有時我做少少野，例如去廚房開個雪櫃幫我老公拿罐汽水，奶奶都會話我老公問佢做咩自己唔去拿要個老婆拿。嗌交時，一定係叫我老公氹返我。
其實仲有好多好多野我一時間諗唔到未寫出來。記得當初我地兩家人見面，我奶奶同我Daddy媽咪講話會當我係自己個女。由拍拖到而加結左婚生埋BB，真係我感覺到佢當正我係佢自己個女咁錫(其實我奶奶有個女，不過移民左去外國)，而我亦真係當左佢係我第二個媽咪。我覺得我真係唔知做左幾多好事先會有佢呢個奶奶。有時我會好傻咁諗，就算我有一日諗離婚，應該都會因為我唔捨得奶奶而收回呢個決定:P
我同老公拍拖，結婚，到而加都差唔多10年了，我可以肯定咁講我真係未經歷過婆媳糾紛，我對奶奶嘅感覺，只有感激同埋內疚。我覺得我個做新袍嘅，我冇可能付出到等價嘅野俾我奶，我只可以盡我同我老公嘅能力孝順佢。
#退一步海闊天高
#我的極品四大長老
#正面投稿
#要珍惜
#百年一遇
👇設計圖片
正面投稿 在 [閒聊] Intel校園電腦組裝大賽投稿-「藍色颶風」 的美食出口停車場