#明就明 #唔明就黎明
話說「明就明」呢句野近日變咗揶揄嘅金句。
老老豆豆，衝出嚟柒同衝出嚟擋，只係一線之差。當然「做人無公關，食屎架啦」呢句金句都out到大家未必記得(透露年齡系列唔好咁大聲話俾人聽)，但「公關」係咪一定要攪啲野、do something先至係好？
well，不敢拋書包，個人覺得公關就係睇事情作最好配合，將負面嘅影響減到最低。而負面嘅影響，係有機會因為你做咗啲野而增加嘅話，就不如唔好鬼做，由得佢die down。
記得數年前某品牌活動，阿客個product design瀨咗野(唔好問咩唔會講啦)，阿姐個新聞稿回應得十幾粒字。問：「其實有得解釋做咩唔寫清楚？」
答：「你覆得越多越有機會俾記者捉住問，每粒字問你一題你都死啦，不如簡潔交待。」
自此公關仔成日都袋住呢句金句，多一句不如少一句。
公關災難嘅嘢，你估真係天災咩，一定係有啲茂利做咗啲野先會發生。而果啲野，往往就係最想洗白嘅事。好多時越兜就越衰，解釋即係掩飾；原本有啲人因為鍾意而啞忍，想俾次機會你；又或者根本傻豬豬咁唔知發生咩事，依家咁樣出嚟「威一威」，各界討論同報道，原本唔知都變知，唔鍾意就更加唔鍾意，鍾意嘅又有機會變成唔鍾意，又或者因為太多人唔鍾意，所以唔敢表示自己都仲鍾意。而由唔鍾意變鍾意呢？明就明。
公關嘅嘢無他，雖然case by case，但最終法則都係咁：一係就唔好講，一係就真誠坦白。案例重溫：黎明中環新海濱演唱會啲防火布有問題，PR做得好，除咗因為佢係黎明，仲有因為佢肯承擔，講事實，所以大家收貨又體諒。當然呢個case唔係apple to apple，但有勇氣承擔坦白，世上有幾人？
無奈世間謊言多真相少，間接造就咗公關呢個行業。 不過公關又好做人又好，唔係你出嚟講同解釋就無事，做人無愧於心最重要。背叛不背叛，其實自己最清楚。
無咩事我都係返出去做野先，唔好話俾老細知我吞泡唔該。
#我愛黎明我愛黎明 #百發百中揸波龍爪手
