［唔好食過牛小排又當自己專家呀］已經冇乜睇書，但可以的話，我而家都係唔多睇金融嘅書。
＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
1. 實情我對上一半睇完嘅書，係吉澤明步嘅《單體女優》（冇錯係嗰個吉澤明步，AV女優唔可以出書？阿豬阿狗仆街死財演都出書啦）。再對上一本，係村上春樹嘅《第一人稱單數》。再之前，應該係吾友高天佑aka 黃曉南嘅《蕭條 CULT 片爆炸力》，或者都係吾友Rubio 陳成軍 同 張振華 Jamie Cheung 《去過北韓50次，你問我答》。再之前係 《誠品時光》同埋《之間》。再數上去先係一本「商業書」，NetFlix CEO兼創辦人 Reed Hastings嘅 No rules rules。另外你發現，而家我一個月都睇唔到一本書的。
2. 今日買嘅係呢本《牛兄牛弟》，講本地黃牛（＊）。本書其中一個搞手，正係楊屋道「三昌」老闆。
3. 本書其實內容好少，一半係食譜，咁咁啱我用。另外仲有唔少圖片講牛嘅各種部位，「Google都有啦」。我記得我年代大學宿舍啲友就貼張 USDA 牛部位嘅海報在門口，有啲就貼大閘蟹，就未有人貼桑拿咁痴線嘅。我地個年代好保守的
4. 不過，買咗先算。打咗咁多年邊爐，女都換咗N條，但一星期一次嘅習慣，好似持續咗15年了。
5. 而遇到話打邊爐但唔食牛嘅人，我多數都WTF。幸好而家仲有個玩法叫做兩個爐。
6. 但其實我講過我係獨家村，亦係同大家唔同，我係唔鍾意一班人打邊爐的。永遠有啲叫一大堆丸嘅契弟呀，食午餐肉嘅友之類。
7. 我係鍾意兩條友打，甚至自己打。唔係去大家樂喎，我去高流灣方榮記都可以自己打的。「有錢就是任性」
8. 關於我對打邊爐嘅迷戀，以下兩個故事應該可以知道。第一個故事係有一期鍾意麻油，但去開嗰間又冇，埃汾太直頭係手袋袋住支麻油的，朋友聽到呢個故事寃覺得我地CLS
9. 另一個故事，當然係海外打邊爐。澳門台灣大陸呢啲太小兒科，馬來西亞新加坡韓國日本你都估到。但我出trip去倫敦都可以自己一個打邊爐（開公數添）。而最痴線一次係去杜拜打 — 杜拜有得打唔出奇，但奇在我係在朋友屋企打，我由香港帶埋個爐過去！坐商務就是任性（中咗獎啦）
10. 直到而家，我都係可以由屯門坐屯馬線（以前坐61X添，架車dun到屎忽開花）去九龍城方榮記買嘢返屋企嘅。雖然你可以話，坐的士call UBER仲化算。「又唔係畀唔起」，「但唔抵」，「即係畀唔起」。
11. 亦都事實我係一個巴膠，仲係一個慢膠。歐遊時好多時我都寧願坐火車而唔係飛機，我知慢，但點解一定要快？之前呀煩精完全不能理解點解有人會坐巴士，又貴啲又慢啲，但我就係鍾意，吹咩。反正我又唔使九點鐘準時返工打卡。
12. 相對於坐巴士呢，坐地鐵，係不利於我思考，同埋睇嘢。就係個feel唔同。
13. 有人問我寫一篇Patreon要幾耐，答曰：定義「寫」。咁眾所周知我半個鐘可以打完兩三千字嘅文（注定我係食呢行飯），但，「寫」唔同打字嘛。
14. 我每日睇嘅各式newsletter 之類，應該都用三四個鐘起碼。未計我睇三份實體中文報紙，應該都粒幾鐘。咁搞篇Patreon出嚟，可能都兩三個鐘。你見真係加埋等於返工 — 當然你可以話，我搞唔搞Patreon，都係照睇咁多嘢架啦 —所以我咪就係我平時做開嘅嘢融入去我個Patreon．
15. 講返，雖然本書嘅內容唔多，但都係買咗先。支持作者嘛。斬牛肉就唔係作者？
（＊）即係大陸牛，抱歉毀咗你童年，但香港只有牛證係made in Hong Kong，咁都係本地屠宰嘅，今日劏咗唔少騰訊牛。
＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝
杜拜地鐵圖 在 [分享] 杜拜捷運圖集 - PTT 熱門文章Hito 的美食出口停車場
[分享] 杜拜捷運圖集. 看板, mrt. 作者, chewie. 時間, 2010年11月22日. ... <看更多>