［微軟又新高，300蚊都破埋］人類史上第二間睇下有冇機會出新埃瘋前過蘋果頭？爭7%。
1. 留意日期，舊年9月，差不多一年前寫。當時已經講睇好微軟成為第二間2萬億嘅公司，有冇老點你？結果今年6月就達標。
＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝
2. 呢排股價一樣日日創新高，由篇文到而家？升50%了。300蚊都升穿埋。
3. 你甚至唔使勇到疫情股災嗰時買（當時140蚊有找），舊年7月至10月嗰期，200蚊任你買。只計今年都升40%啦。冇錯，亦係即係舊年第四季冇乜點升，嗰時又個個話Big Tech已死升得慢。
4. 我甚至剛剛8月頭都仲係話：「呢一刻我Preference，應該係Microsoft＞Google～Facebook＞Amazon～蘋果」．原文照錄，自己睇8月5日Patreon。
5. 我甚至7月尾業績前寫「同蘋果市值仲爭15%，好彩嘅幾日可以過頭」。不過後來蘋果都生性就後話，亦都升得有道理，有機會寫新文，部新埃瘋又可以斬你一筆。但無論如何，兩者而家相差只係7%，依然睇好微軟有機會過頭
6. 當然，我係更加早買，幾年前已經買，80蚊買的。上過講座或者Patreon都見過貼過，而你睇我啲圖咁撚小學雞就知我會唔會識得Photoshop．況且以我呢啲自尊心咁強嘅人，點會做呢啲嘢？做呢啲嘢咪即係認自己唔掂？又唔係出術有錢分。
7. 講咁多，點解最初睇好。科技我識條鐵，但文無第一冇毛第二， 個撚個都話自己無敵架啦，我使唔識識整光刻機先識買ASML（8舊水了）？我又使唔使係工程師先識買NVIDIA？掉轉，屌，我夠CFA FRM MSC DBS WFH 你啲網友都嚟挑我機啦。
8. 我而家講金融唔係講技術喎，我使唔使識整Pizza先知Domino's Pizza上市一路跑贏同年上市嘅Google？你諗下都知，Google員工幫襯Domino's Pizza，一定多過Domino's Pizza員工去Google 落廣告咯（呢啲，就混帳邏輯啦，大家唔好學）（陸東去街市夠肯定多過街市佬幫襯UBS Whatever啦，但邊個有錢啲？）（呢度係第二個混帳邏輯，根本兩個例子都唔同）
9. 講返，呢度都有講過，for some 唔知點解嘅原因，微軟同政府關係相當好。美國就固然，侵侵年代直頭益佢唔益Amazon，但神奇在佢在大陸都吃得開！呢啲嘢好難複製，正如AIA可以咁多年獨資在大陸賣保險，呢啲先係值錢。
10. 第二，亦係呢度講過，全世界都搞科企，大陸就原始粗暴啲，美國都搞，但冇乜幾可搞微軟？因為廿年前一早搞過，搞到鬆晒（啲監管，你諗咗乜？），唔過癮。
11. 第三，明報篇文有寫（所以十蚊你都慳我真係幫你唔到），傳承。微軟傳到第三代，Steve Ballmer任內股價唔得，開國功臣兼標基同學一樣冇面畀要起身，就唔同啲同股不同權廿歲坐到一百歲嘅CEO啦
12. 當然仲有，Network Effect．唔係社交網（你估拎煙好好搵咩）都有Network Effect？當然有，人人用MS Office，唔通你話你冇開唔到叫人地整第個版本？剛剛話下年加價添啦！係咪加價你唔用？
13. 幾時買得？幾時都買得。最好嘅時機係舊年3月，第二好係而家。當然你可以繼續等等等等等調整嘅，但到調整你一樣唔會買。我當美股跌20%所謂熊市，都只係返返舊年年尾個位。
14. 一隻股票可以升100萬倍，但只能輸100%，所以沽空真係必死。得我知Michael Burry嘛，煙鏟鄧小平好長命添，亞視死埋有線都就死江澤民都未死添（呢個邏輯亦有問題，不過比較深）
15. 忍唔住講多句，仲有一種最常見嘅混帳邏輯，就係「downside有限 upside無限就好著數」「upside有限downside無限就好笨七」，仆街，輪王輪后啲花紅邊度嚟呀？你買輪夠downside有限 upside無限啦，咁你煲爆莊未？不過呢啲真係涉及啲數學，Improper Integral甚至去到Stochastic Calculus。唔係話拎術語撻鳩你，但知唔知點解最早啲輪商全部係啲歐洲行？坐館十件有九件都法國佬？正所謂認股證 認法興，買得準你戇卵。人地全部都搵巴黎精英大學嘅quant嘛
16. 好似唔記得話你知，本人英國Master其實係讀火箭數學，專做derivative pricing，但我後來點解冇做quant？十分簡單，因為技不如人。我嘅好處係我有自知之明，拍埋人地啲真正數學叻嘅人度，真係爭幾十班。
＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝
