我老婆隻鑽石戒指係假嘅(下)
上集:http://bit.ly/3lxzM7y
於是,我用手機影低假戒指,再拎去珠寶公司訂造。
有錢使得鬼推磨,我好快就買到一隻外表幾乎一樣,但係用真鑽石嘅戒指,然後再換走老婆隻假戒指。
坦白講,買真戒指嗰吓,我個心都有少少痛。
我唔係介意買嘢比老婆,只係洗咗咁多錢,老婆都唔知我買咗嘢畀佢,就覺得有啲唔抵囉。
好彩,之後嘅事都好順利,我用隻真戒指換走咗隻假戒指。
睇住老婆沖完涼,完全冇察覺咁戴上真戒指,我都鬆一口氣。
我將隻假戒指帶走,本來諗住丟咗佢。
但我又諗,呢隻戒指都跟咗老婆十年,無論鑽石真假,都係我第一隻送畀老婆嘅戒指,好有紀念價值,我就收埋咗隻戒指。
後來,我同一個兄弟講起呢件事。
兄弟感慨:「你隻假戒指仿真度都幾高,啲女人最鍾意戴住鑽石戒指,互相比較,你居然咁多年都冇穿煲。」
「我真係幾好彩。」我都忍唔住笑。
兄弟突發奇想:「你隻戒指喺邊度買?我都想買番隻,哄吓我條女都好,幾千銀之嘛。」
事隔十年,我真係唔記得,當年喺邊度買嗰隻假戒指。
兄弟話:「你咪睇吓裡面有冇舖頭名囉。」
老實講,我就唔覺得假戒指會有舖頭名,擺明係造假,刻個舖頭出嚟仲得了嘅?
但兄弟叫到,幫手睇吓都冇咩所謂。
夜晚,趁我老婆瞓著咗,我開大枱燈照隻假戒指。
我發現假戒指嘅內圈,隱約有幾個英文字母,唔通真係舖頭名?
仔細一睇,原來係一個男人名「Johnny Ng」。
注意,我唔叫Johnny,亦唔姓吳,更加冇喺假戒指上刻過名。
如果我冇記錯,Johnny Ng應該係我老婆嘅初戀男友嘅名。
我個心一直往下沉,我送畀老婆嘅結婚戒指,點解會刻咗佢初戀個名?唔通老婆對佢餘情未了?定佢哋直情係藕斷絲連?
我拎住隻戒指,去咗珠寶店搵人鑑定,我想知道,個名係幾時刻上去。
點知珠寶店職員鑑定後,講出一個令我震驚嘅真相:呢隻戒指係真嘅!係一隻真係值二十萬嘅鑽石戒指。
我目瞪口呆,我肯定當年我買嘅係假戒指,更肯定店主唔會咁傻,將真鑽石當假鑽石賣畀我。
排除所有其他可能性之後,剩低嘅答案只有一個。
我老婆戴咗十年嘅戒指,根本唔係我送嘅,而係佢初戀男友Johnny Ng送嘅,仲刻埋名。
咁多年都冇人發現粒鑽石係假,因為粒鑽石根本係真嘅。
我唔係一個細心嘅人,一向覺得隻隻鑽石戒指都差唔多樣,只有大細之分。
所以,老婆換咗隻差唔多大嘅戒指,我都冇發現到。
我拎住呢隻戒指,返去質問老婆。
老婆以為我咩都發現晒,講出真相。
佢話同我結婚冇幾耐,Johnny就喺外國返嚟搵佢,大家舊情復熾,Johnny係外國發咗達,所以買咗一隻三卡嘅戒指畀佢。
老婆強調:「但我愛嘅係你。」
我問:「咁十年來,你點解戴佢嗰隻戒指,唔戴我哋嘅結婚戒指?」
老婆無話可說,我更加失望,原來佢冇發現我送嘅第一隻戒指係假,佢以為嗰隻戒指係真,但佢都係揀咗戴Johnny嗰隻。
老婆再強調:「我哋已經分開咗啦,咁多年佢都冇再搵過我?」
我信唔信佢好?我都唔知。
呢個時候,老婆突然諗起一個問題:「點解你突然會偷偷換咗我隻戒指?」
我都唔知點答嫻,或者,事到如今,答咩都冇意義了。
有時,你以為自己係呃人嗰個;
到頭來,你先係俾人呃嗰個。
—完—
將專頁設定為「搶先看」/ "See first",最新故仔馬上睇!
新書《筍工重生高科技》已經出版了,現正發售中,
詳情可點擊這裡:https://bit.ly/32hgoSN
你的支持是我最大的動力!
#短故 #短篇 #小說 #陳美濤 #廣東話 #粵語 #tomatochan #我老婆隻鑽石戒指係假嘅
Search